Utilisateur:Mglovesfun/Bac à sable

C’EST DE L’ATRE PERILLOUS Ma dame me conmande et prie Que une aventure li die Qu’il avint au Bon Chevalier Et je nel puis mie laiscier Quant ele le m’a conmandé Des qu’il li plaist et vient a gré Or oiiés com il li avint A une Pentecouste tint Li rois Artus feste moult grant Ne remest chevalier errant De la mer des qu’en Cornuaille Ne damoisele qui rien vaille Qui a cele cort ne venist Et li rois grant honor lor fist Car moult lor dona rices dons Quant venu furent les barons Et asanlé le samedi Aprés le none avint, issi Que li rois s’aloit deduisant Qu’il ont veü venir errant Toute seule une damoisele Qui moult ert acesmee et bele Moult estoit de grant aparel D’un moult rice samit vermel Fu sa robe fresce et novele De son lorain et de sa sele Et de son autre acesmement Diviser or plus longement Ne me veul je mie entremetre Car grant paine i convenroit metre Au dire, tant est acesmee Ensi est en la sale entree Que onques son frain ne retint Desi que devant le roi vint « Rois, fait soi, cil sire vous saut Cil qui gouverne bas et haut Le ciel et la mer et la terre De mon païs vous vienc requerre Que vous me creantés un don Ja ne vous querrai mesproison Ne outrage ne vilonnie » Li rois bonement li otrie Que volentiers le don ara « Dites, fait il, que ce sera Et vous l’averés sans mentir Por tant que jel puisce aramir — Sire, fait el, vostre merci Or oiiés donc que je vous pri Je veul demain boutelliere estre De vostre coupe la plus mestre Et servir a vostre mengier Et si veul que un chevalier De çaiens, tout le plus prisiés Cil qui le mix est enteciés Me gart et desfende et honort Tant conme j’ere a vostre cort Que jou n’i aie vilonnie Car jou n’i oseroie mie Demorer sans moult bone garde » Li rois moult bonement l’esgarde « Bele, fait li rois, le servise Ferés a la vostre devise Mais je ne sai mie jugier Trestout le mellor chevalier De çaiens ne de ma maisnie Tant estes prox et ensegnie Espoir dit l’avés por aucun Et s’i vous plaist, només ent un Li quex vous volés que ce soit Je li quemant des orendroit Que il bien vous gart et desfende Et que a vous servir entende Tant com çaiens estre vaurois — Sire, fait ele, n’est pas drois Que j’en doinse a un tout le pris Ains en ai sor vous le fais mis Qui le don m’en avés doné Je cremiroie avoir mal gré Se par moi seule l’eslisoie — Ja Dix, fait li rois, ne me voie Quant j’en sai le mellor eslire Mais je vous veul proiier et dire Que vous m’otroiiés une riens Se vous veés que ce soit biens Sans ellire, vous veul baillier En la garde a un chevalier Bel et prox et cortois et sage Et s’il ne fust de mon lignage J’en deïsce une grant parole » La pucele qui n’ert pas fole Li dist, « Sire, només le moi S’il vous plaist, ains que je l’otroi — Bele, fait li rois, c’est Gavain En cui garde serés demain Et tant com onques vous plaira — Sire, fait el, quant je vinc ça Me fu forment Gavain loé Et g’i remain par vostre gré Car ne vous demant se lui non » Ensi li est greé le don Com la cose vous ai contee Et Gavains l’a tantost menee A moult grant joie a son ostel Et saciés que il li fist tel C’on n’i seüst rien que reprendre Car moult durement fist entendre A li servir une pucele Et sa seror qui moult ert bele Qui li porterent conpaignie Moult menerent joieuse vie Cele nuit dusqu’a l’endemain A grant joie leva Gavain Et les puceles toutes trois Puis ala o itel harnois Au moustier oïr le servise Car li rois ert ja a l’eglise Et la roïne et ses puceles Quant Gavains o les damoiseles I est de son ostel alés Quant li services fu finés Si s’en revindrent tout ensanble A la pucele, ce me sanble Si com el li fu creantee Fu la maistre coupe livree Car les tables erent ja misses A tant conmença li servises Moult grans et moult biax et moult rices Car li rois Artus n’ert pas nices Que voloit qu’il fust moult pleniers Mais ne m’est ore nus mestiers De dire qu’il fist ne coument Fors tant conme ci en apent De la coupe sert la mescine Les le roi seoit la roïne Et li rois de Wales aprés Gavains et Tors, li fix Arés Et Erec sist de l’autre part Et Carados Briesbras li quart Aprés sont tout li autre assis Maint chevalier i ot de pris Et mainte cointe damoisele Maint hanap et mainte escüele Ot devant ax d’or et d’argent N’orent pas mengié longement Car il n’orent c’un mes eü Quant un chevalier ont veü Venir par mi le porte errant Et saciés, s’il ne fust si grant Sous ciel n’eüst plus bel de lui Mais trop estoit grans a anui Moult par ert bel et bien armés Ensi est en la sale entrés Fors sa lance que il laisça Que dehors la sale apoia Tant fu orgellox le vassal Qu’ainques ne retint son ceval Tant que il vint devant le roi Et se vint par itel desroi Que son frain hurta a le table Onques uscier ne connestable Nel contredist de nule cose Quant esgardés les ot grant pose Sauf çou que mot ne lor sona Vers la pucele se torna Si l’a par les espaules prise Puis si l’a devant lui asise Desor le col de son destrier « Rois, fait il, celer ne te quier Ceste damoisele est m’amie Si l’ai en mainte cort sivie Puis que l’oi enprise a amer Onques mais ne la peuc trover En cort u jou l’osasce prendre Mais je senc la toie a si tendre Et de bons chevaliers si vuie (Je di por ce qu’i lor anuie Et que de li la saisine ai) Que ja par ex ne la perdrai Ains l’en porterai sans dangier Ja par le cors d’un chevalier De cex qui çaiens sont assis N’en ert vers moi son escu pris Sire rois, fait il, je m en vois Le haute voie vers ce bois Qui me menra en mon païs Savés por quoi je vous devis Par u je m’en doi repairier ? S’il avoit çaiens chevalier Qui par savoir u par folie Rien nule que je ci vous die Vuelle desdire par bataille Ne die pas que jou m’en aille Par une autre voie fuiant Voiant tox ensanle me vant Que par icele m’en irai Ne ja del petit pas n’istrai Desi la qu’i m’avesperra Je weul que cil qui me suirra M’ait a aise, s’il ne se faint Ains que je viegne au bos, ataint » A cest mot a sa voie enprise Por sa lance vient, si l’a prise Car il nel vaut mie laiscier Le petit pas de son destrier En est isçus hors de la porte Ensi faitierement en porte La damoisele en son païs Gavains fu dolans et pensis Qui les le roi sist au mengier Ne se set pas bien consellier Li quex li ert plus honerable U salir par desor la table Por parsuïr le chevalier U a seoir tant au mengier Que le service soit finé Longement a ensi pensé C’onques ne but ne ne menga Au deerain se porpensa Que le soufrir li ert plus bel Tant sent son ceval a isnel Que tost l’ara aconseü Et Qex, qui tout çou a veü A ses conpaignons apelés « Segnor, fait il, or entendés A servir ceste cort a droit Car il m’estuet sivre orendroit Cel chevalier qui tel sorfait A, voiant tox ces barons, fait Qui par orguel et par derroi A saisie devant le roi La damoisele a son mengier Onques n’i ot nul chevalier Qui desdeïst de nule rien Une cose saciés vous bien Onques mais a roi ce n’avint Des puis que primes feste tint Nule si grant desconvenue Quant ce failli ne se remue En qui garde li rois le mist Cent dehais ait qui primes dist Qu’en lui eüst bon chevalier » A tant se vait aparellier A son ostel moult ricement Quant armés fu delivrement Sor le bon ceval est montés Puis est u grant cemin entrés Par u li chevaliers s’en va Devant lui a terre esgarda Si en a coisi les esclos A tant se met es grans galos Por ataindre le erranment N’ot pas cevaucié longement Quant un tertre le vit monter Il conmença a escrier « Estés, estés, sire vassal La damoisele et le ceval En menrai jou ensanle o moi Et vostre cors rendrai le roi A faire del tout sa justise Mar i fu la pucele prise Devant lui si estoutement Se mort u pris ne vous en rent Je ne me pris une prounele » Cil descendi la damoisele Si guenci ariere son frain Puis si a dit, « Est ce Gavain Qui ci me suit si derreés ? — Nenil, fait il, ançois sui Kés Li senescax le roi Artur — Ore, fait cil, a mal eür Que vous ne demandoie mie De la vostre chevalerie N’est pas grans le los en ma terre » Lors va li uns l’autre requerre K’onques n’i ot autre tençon Kex le feri tout a bandon Desox la boucle de l’escu Qu’estroué li a et fendu Mais li haubers le garanti Onques maille n’en desmenti Kex l’enpaint bien, sa lance frousce Cil feri lui par tel angousce Que l’abat, lui et son ceval Kex caï el pendant d’un val Qui moult fu quaisciés et bleciés Ses destres bras li fu brisiés Par entre l’espaule et le coute Li cevax saut sus, si s’aroute Tout le cemin par u il vint Et cil a Keu nul plait ne tint Ains le laisça iluec gisant A la pucele vint errant Si la remonte devant lui « Bele, fait il, si com je cui Dans Kex ne vous en maine pas » Lors s’en vait vers le bos le pas Demenant grant joie a s’amie Au roi et a sa conpaignie Me convient des or reperier Qui encor seoit au mengier De l’aventure moult pensis Voiant tox a un coutel pris Si l’a ficié par mi un pain Puis i apoia si sa main Que le coutel froisça en dox Des chevaliers ne fu uns sox Qui ost enquere et demander Seul l’occoison de son penser Et li rois s’est aperceü Et set de voir qu’il ont veü Coment li coutiax fu froisciés « Segnor, fait il, moult sui iriés De ceste mesestance d’ui Sin ai encor grengnor anui Por la mesproison de Gavain Je cuidoie estre bien certain Que n’eüsce ja enconbrier Par le cors d’un seul chevalier Dont Gavains ne me desfendist Et s’a un autre avenist Qui la pucele en garde eüst Par mauvaistié que en lui fust Que il ne l’osast pas desfendre Si deüst bien Gavains enprendre A desfendre la por m’onor Moult me poise qu’a si bon jor M’en est tel anui avenu » Dont li dist Iders li fix Nu « Sire, fait il, ne vous cremés Li senescax i est alés Qui bien vengera ceste honte » Et li rois dist, « ce est nul conte Or croist et double mon anui Tant a grant prouece en celui Et tant est fors et sorquidiés Que ja par Keu n’ert damagiés Moult i puet avoir vaselage Onques mais en tout mon eage Plus outragex de lui ne vi » Et Gavains dist, « sire, merci ! Vous avés dit vostre plaiscir Mais je ne veul pas tresailir Par en son le table au mengié J’en cremisce avoir reprovier Se je l’eüsce tresaillie Tant estes de grant segnorie Et tant vous a Dix fait haut home Que, se l’enpereor de Rome Vous venoit çaiens manecier Por quoi seïsciés au mengier Ne mais que pis ne vous feïst Que ja por cose qu’il deïst Ne s’en devroit nus desrengier Et quant vendroit aprés mengier Si alast cil qui vous plairoit A qui la cose en aferroit Vengier vostre anui et le suen Je sent mon ceval a si buen Que je l’arai moult tost ataint Ne cuidiés pas que il en maint La damoisele sans calonge Ja puis Dix honor ne me donge Quant onques par el le laisçai Et se de riens mespris en ai Je sui tox pres de l’adrecier » A tant est levés du mangier Si a ses armes demandees Doi vallet li ont aportees Il s’est moult vistement armés Puis est u bon ceval montés Q’onques estrier n’i a requis Et quant il a son escu pris Et on li ot baillié sa lance De l’errer se haste et avance Gavains erre vers la forest A grant mervelle li desplest Quant il nel voit ne lonc ne pres A tant es poignant a eslés Le destrier Keu le senescal Gavains connut bien le ceval Sel saisi au destroit d’un mont Auques ot escorcié le front Si que tox jors venoit sainnant L’arçon de la sele devant Ot tout quassé et esmiié S’ot le frain rout et depecié Si qu’il n’i ot fors la cevece « Dix, dist Gavains, si grant prouece Ot cil qui si vous abati » De çou fu auques amati Qu’il crient qu’il ne soit mors u pris « A ! Dix, dist il, tant ai mespris Tant il m’est wi mesavenu Quant par moi a li rois perdu Le chevalier qu’il amoit tant Il m’ert tox jors mais mis devant En tox lius u j’ere trouvé Si m’ert laidement reprové Je ne di pas que ce soit tors Il est par ma defaute mors Qui la pucele en garde avoie » Lors garde loins en mi la voie A ce grant duel que il demainne Voit Keu lever a quel que painne De la u cil l’avoit laiscié Il a le ceval eslaiscié Si est venus poignant a lui « Sire, fait il, de vostre anui Sui moult dolans et abosmés Car je dout que vous me retés Qu’il vous soit par moi avenu — Malvais, Kex li a respondu Il m’est or avenus par vous Moult estes fiers et orgellox Dedans la canbre le roïne N’est mie povre ne frarine Cele a cui vous degniés parler Qui alec vous orroit vanter De hardement ne de prouece Ne diroit pas que par perece Par mauvaistié ne par soufraite Qui soit en vous, fust au roi faite Par le cors d’un seul chevalier Tel vilenie a son mengier Moult vous ai wi veü restif — Sire, fait Gavains, pas n’estrif Que je n’en aie moult mespris Mais j’ai ci vostre ceval pris Si i montés se il vous plest Et jou irai vers la forest Por parsivre le chevalier Qu’il m’estuet en oire vengier Le grant anui que il m’a fait » Et Kex li dist, « Cent dehais ait Qui ja de vos mains le prendra Ne qui ja tant vous prisera Qu’il vous doie nul gueredon » Gavains n’ot soing de sa tençon Sel loia les lui a un saus Puis vait vers le forest les saus Et les grans galos enforciés Mesire Kex s’est esforciés Tant que il vint a son ceval Puis l’acosta devers le val A quel que painne i est montés Si est en son païs alés A tout sa grant malaventure Et Gavains suit grant aleüre Le chevalier qui oirre a plain Et qui ja ot passé le plain Et fu en la forest entrés Quant aprés lui fu aroutés Soventre lui u bos entra Une grant piece issi erra Qu’onques nel vit ne pres ne loing A tant oï a grant besoing De trois damoiseles le cri Qui dissoient, « A ! Dix, merci ! Ices caitives que feront Quant toute la joie du mont Est wi cest jor tornee en ire ? Bien peuent les puceles dire Que tout lor secors perdu ont » Por le grant duel que eles font A Gavains son cemin laiscié Et vint a eles eslaiscié El cief les trova d’une lande Doucement enquiert et demande Quant il lor ot son salu fait Por qu’eles sont en tel dehait Ne por qu’eles font si grant duel « Lasse, fait li une, mien wel Fussiens nous toutes trois ocises C’est dolors que nous sommes vives Quant nous avon tel perte faite Qui jamais ne sera retraite Ne par bouce d’ome contee » A tant ciet a terre pasmee Si est reconmenciés li dex Il a regardé deriere ex Si vit gesir un damoisel Moult grant et moult gent et moult bel Qui moult estoit bien atornés Mais il avoit les ex crevés Ileuques tout nouvelement Qu’encor en ot le vis sanglent Moult par en fu gavains iriés Tant ert biax et bien atiriés Que bien paroit de haute gent Si quidoit bien a escient Que tout ce duel fust por lui fait « Bele, fait il, icest sorfait De cest vallet que je ci voi Coment fu il fais ne por quoi ? Grant talent ai que je le sace » L’autre respont, « Ja Diu ne place Que je vive mais longement Quant l’onor et l’afaitement La largece et la segnorie Et le flor de chevalerie Ai ci veü morir ensanble » A cest mot li cuers li trestranble Si que toute descouloree Kai dalés l’autre pasmee Gavains mist le tierce a raison « Bele, fait il, par gueredon Vous requier et pri par servise Qui soit fais a vostre devise Que me dites, se vous poés Dont ce duel vient que vous avés » La damoisele a respondu « Sire, por çou que j’ai veü Que vous avés si bel parlé Vous ert de cief en cief conté Et la dolor et l’ocoison Sire, le duel que nous menon N’est pas si grant que ne devroit Car se trestout le mont savoit Le grant damage et le dolor Qui est avenu wi cest jor Si en feroit il autretant Car li damages es si grant Onques si grans ne fu veüs Quant il sera par tout seüs Mendre est li dex que li damages Car cil qui tant ert prox et sages Et qui du mont avoit le pris Est en ceste forest ocis Orendroit ici devant nous Bien poés savoir a estox Qui cil est de cui je vous di — Bele, fait il, quant je nel vi Je n’en puis estre bien certains — Sire, fait ele, c’est Gavains Li niés le rice roi Artu Le bon chevalier esleü Qui tant ert proisiés et amés Wi erroit trestous desarmés Par ceste forest en deduit Sans conpaignie et sans conduit Il n’avoit arme o lui portee Fors lance et escu et espee Et si erroit sans conpaignie Troi chevalier qui Dix maudie Qui de viés l’avoient haï L’orent desque ci parsivi Quant il fu isçus de ce val Li uns lait corre le ceval Et vint poignant desi a lui Enbuscié se furent li dui Et li tiers a lui se mesla Tant longement l’estors dura Que Gavains en vint el desus Li doi nel peurent soufrir plus Que cil avoit el bos laiscié Ains i vinrent tout eslaiscié Por aidier a lor conpaignon Gavain misent en tel randon Qu’il ne se peut desfendre d’ex Qu’il erent trois et il ert sex Et s’estoit cascuns bien armés Cil vaslés qui vous la veés Qui de grant hardement ert plain I poinst por aidier a Gavain Son pooir fist de lui aidier Mais de li peut avoir mestier Car cil erent et grant et fort A ex valut peu sen esfort Car il estoit tous desarmés Au vallet ont les ex crevés Et Gavain ont tout detrencié Sire, le duel et la pitié Que nous avons, et la grant ire Loiaument le vous poons dire N’est pas por cestui seulement Ains avons le grant mautalent Del bon chevalier qui est mors » Lors conmenca uns dex si fors Que nus nel vous porroit retraire « Lasse, font el, que porrons faire ? Ahi ! Mors, tant par es avere ! Nous n’avions fors cestui frere Et si avons cestui perdu A ! Mors dolente, que fais tu Quant orendroit ne nous ocis ? C’est ta costume de toudis Qu’a celui qui ta venue aime Et a son besoig te reclainme Ne veus secorre ne aidier Tu as mort le bon chevalier Dont tox li mons sera en paine Ahi ! Mor, tant par es vilaine Qi les bons prens tout a eslais Et laisces vivre les mauvais En toi n’a raison ne mesure De ces trois lasses n’as tu cure Qui lor vie ont en grant despit ? » Et messire Gavains a dit « Beles, ne vous desconfortés Por trop grant nient vous cremés Car je vieg de la cort tot droit Si i vi seoir orendroit Au mengier monseignor Gavain Et saciés que jel vi tout sain A la cort quant je m’en parti » Et li vallés li respondi « Biax sire, ains est mors a estrox — Amis, fait il, que savés vous ? Coment en estes vous certain ? — Je fui, fait il, vallés Gavain Antan a un tornoiement Et si sai tout certainement Que c’est il qui est decaupés — Amis, dist il, car me moustrés Je conisterai bien le cors — Sire, fait il, cil sont ja fors De la forest qui l’ont ocis Quant il en orent le cief pris Trestox les membres li cauperent Laidement le desfigurerent Qu’il n’i remest ne pié ne poing Il sont ja bien trois liues loing O le cors qu’il en ont porté En lor païs a sauveté Il ne doutent wi mais nului » Se Gavains ot ire et anui Del vallet qui si ert destroit Et des puceles que il voit Por lui si grant dol demener Il ne fait mie a demander Por le vallet est tox dervés Car hom qui a les ex crevés Vit tox jors puis a grant anui Et set de voir que c’est por lui Que on li a cest mal tout fait Et del chevalier qui s’en vait Qui en porte la damoisele Par quoi ses dex li renouvele Si qu’il ne set que il fera La quele aventure il suirra La premiere u la daraine Vis li est que la premeraine Doit il premierement furnir Et si il s’en puet revenir Sans peril et sans enconbrier Si doit a cesti reperier Et vengier le s’il onques puet « Amis, fait il, errer m’estuet A Diu soiiés vous conmandé Et saciés bien de verité Que, se g’i fusce ançois venu Ains en fust percié mon escu Et mon hauberc rout et fausé Et jou par mi le cors navré Qu’on vous eüst fait cest anui Ne ja ne sarés qui je sui Devant la que je revenrai Ne ja mais jor ne finerai Puis que je serai reperiés Ains ere mors u vous vengiés » Les puceles a Diu conmande Poignant s’en va par mi la lande Tant qu’en sen droit cemin entra Une grant piece ensi erra Tant que la forest ot passee De l’autre part de la valee Voit loing le chevalier errer Il conmença a avesprer Et Gavains point tant son ceval Qu’i fu de l’autre part d’un val Lors vit devant lui un castel Tout clos de piere et de quarrel Dont li murs ot cent piés de haut Li castiax ne redoute asaut Tant estoit ricement fremé Il vit bien qu’il ert avespré Tant qu’il ne porroit sans mescief De sa bataille traire a cief Porpensa soi qu’il souferra Et que demain se conbatra Au cevalier qu’il parsivoit Car a escient set et voit Qu’el castel se herbegera Et il meïsmes i gerra Por atendre iluec sa bataille Ensi quide faire sans faille Mais moult li avint autrement Car li chevaliers eranment Dedens le premier baile entra Et li solax lors esconsa Si furent les portes fermees Il a les rues trespasees Tant qu’il vint amont u castel Devant le tor en un prael Seoit li sire aveuc sa gent Il le salue belement Aprés li a l’ostel requis Et il li dist, « Biax dous amis Vous l’arés, fait il, volontiers » Lors sailli sus uns chevaliers Qui descendi la damoisele Li sire ses vallés apele Por le chevalier desarmer Aprés li a fait aporter Un bliaut et un mantel gris Quant il l’ot delés lui assis Si li enquier moult bonement Son estre et son contenement Dont il vient ne quel part il va Et li chevaliers li conta Qu’onques ne l’en degna mentir A Gavain m’estuet revertir Qui encor oirre par la plaigne Ne li caut mais que il ataigne A estre de jor herbegié Il a son ceval eslaiscié Si vint poignant droit a le porte Por le vile qu’il voit si fort A moult le castel regardé Il a le portier apelé Si durement qu’il l’entendi Et li portiers li respondi « Biax amis, por noient criés Car li solax est esconsés N’i ara wi mais porte ouverte Ne le matin por nule perte Devant çou que sera grant jor Car li sire de ceste honor Et li clerc et li chevalier Serjant, borgois, et escuiier Ont tout conmunement juré Que ja por home qui soit né N’ert li guicés destorelliés Puis que li solax ert couciés Ains sera levés el demain — Amis, ce li a dit Gavain Travelliés sui, si est moult tart Car me di donques de quel part Je porrai wi mais ostel querre — Sire, fait il, en ceste terre De grans dis liues environ N’a il ne borde ne maison Je ne vous sai consel douner Toute nuit porriés errer Par mi bruieres et par bois — Amis, fait Gavains, je m’en vois A Diu soiiés vous conmandé » N’ot pas le trait d’un arc alé Quant il coisi une capele Dalés le cemin haute et bele Dont l’atre estoit enclos de mur Ileuc quida estre aseür Gavains et la nuit herbegier Mais s’onques li fu nul mestier D’estre prox, or l’en ert gregnor Onques mais de si grant paour Jor de sa vie n’escapa Desi a la capele va Si est en l’atre descendu Sa lance osta et son escu Si l’apoia a la capele Del bon destrier osta la sele Sel forbi bien et conrea De l’erbe paistre li laisça Puis est assis sor un tonbel A tant oï un damoisel Venir le trot sor son roncin Devers le bos tot le cemin Il est du cimentire isçu Si li demande, « Qui es tu Qui si tart trespasses par ci ? » Et li vallés jeta un cri Puis dist, « Dame sainte Marie Tenés moi en sens et en vie Gloriex Dix, tenés mon cors Que je n’isce de mon sens fors Et que diables ne m’afot » Gavains de ce grant mervelle ot « Amis, fait il, ne vous cremés Li vrais Dix que vous reclamés Deffende moi et vous de mal » Cil guenci vers lui le ceval Quant il l’oï de Diu parler Tantost li ala demander Qui il ert et de quel païs Et il li dist, « Biax dox amis Je sui Gavains, li niés le roi Por quoi eüstes vous de moi Paour quan je vous aparla ? — Sire, fait il, jel vous dirai Sire, fait il, ne savés vous Que c’est li Atres perellox U vous avés vostre ostel pris ? Cascune nuit, je vous plevis (Ne tenés pas mon dit a fable) S’i vient herbegier le diable U dex u trois, je ne sai quans Bien a passé plus de cent ans Qu’il n’i herbega chevalier Ne nul home de nul mestier K’on ne trovast au matin mort Arivés estes a mal port S’autre ostel de cest ne querés Mais se vous croire me volés Je vous herbegerai moult bien Car ce castel la sus fu mien Si le dounai un chevalier Et ma suer a tout a mollier Encor se dormoient trestuit Jewi quant j’alai en deduit Por berser en ceste forest C’est uns deduis qui moult me plest Eneslespas un cerf feri Trestoute jor l’a parsivi Tant que l’ataint un mien levrier Au desfaire et a l’escorcier Me sui longement demouré Ves le ci u je l’ai torsé Sin arons ja endroit moult tost Assés en esçau et en rost Sire, fait il, por Diu vous pri Que vous ne demourés pas ci Se vous avés vostre cors cier Mais venés laiens herbegier U vous arés moult bon ostel » Et Gavains dist, « Or n’oi tel Je vinc ore a le porte errant Si me respondi un serjant Que je crioie por noient Et m’afica moult durement Une rien dont moult me mervel Puis que coucié est le solel Sont tox jors les portes barees Ne ja ne seront desfremees Devant la qu’il ert grant matin — Par foi, fait il, ce est li fin De çou vous dist il verité Mais nous venrons ja au fossé Ens jeterai ma venison Et nous meïsmes i sauron Puis irons vers les murs amont Mi vallet qui la dedens sont Qui or ne sont pas aseür Aront tost trait en son le mur La venison et vous et moi — Amis, dist Gavains, quel conroi Seroit il de nos cevax pris ? — Sire, fait il, par cest païs Les lairons paistre toute nuit Le mien en est moult tres bien duit Ja del mur ne s’eslongera — Li miens, fait Gavains, que fera Qui ne counoist pas le païs ? S’or le m’avoient leu ocis U aucune beste sauvage Il me seroit tout mon eage (Qu’il ne poroit estre celé) En ma contree reprové Que je l’aroie seul laiscié Comme couart par mauvaistié Si l’aroient estranglé lex Certes ja n’i remanra sex Ains prendrai o lui bien et mal — Se vous, fait il, por un ceval Vous i laisciés de gré morir Por fol vous en porrés tenir Cevax recouverrés assés Mais se vous croire me volés Vous en venrés ensanle o moi A ce castel u aler doi » Gavains li dist, « Ce est l’estrox Je n’irai pas ensanble vox Quant mes cevax n’i enterroit Mais je vous pri, s’estre pooit Que vous me creantés un don Dont vous arés bon gueredon Se je puis escaper de ci » Et cil li dist, « Jel vous otri Sor la loiauté que jou ai Que, se je puis, jel vous donra — Amis, dist il, or enten donc Un chevalier qui trop est lonc (Se ce ne fust, si fust trop bel) S’est herbegié en ce castel Si en porte une damoisele Grande et gente et cortoise et bele Si le prist wi par son derroi En ma garde a le cort le roi Moult par en ai esté mari Trestoute jor l’ai porsivi Onques ataindre ne le poi Ainc de rien si grant corox n’oi Com s’il la gardoit anuit mais Por m’amor en prendés tel fais S’il onques puet estre a nul fuer K’anuit mais le gart vostre suer Si m’arés moult servi a gré S’il en faisoit sa volonté Je n’aroie ja mais honor Et demain quant il sera jor Si en soit tout en pais saisi Se faire le poés issi Ne m’en caut puis quel part il aille Que lors venrai a ma bataille » Cil li respont, « Il ert bien fait » Les grandismes galos en vait Que plus demourer n’i osa Au fossé vint, si apela Ses vallés, qui as murs estoient Et qui moult grant paour avoient Qu’il ne fust mort u afolé Sa venison jete u fossé Et il meïsmes i sali Son caceor el camp guerpi Quant le harnois en ot osté Tout en a aveuc lui porté Le harnois et la venison Ainc n’i ot autre arestison Vistement l’ont sor le mur trait Au segnor la novele en vait Que li vallés estoit venus Il est contre lui acourus Hors du castel par une rue Liés et joians de sa venue La dame meïsme i acort Et toute la gent de la cort N’i remest ni wiscier ne gaite Onques tel joie ne fu faite Por le cors d’un seul damoisel Com on fist de lui u castel Qu’a escient savoient tuit Qu’il estoit alés en deduit En la forest por arcoiier Si cremoient qu’au repairier Por çou que tant ot demouré L’eüst le diable afolé Qui gardoit l’Atre perellox Si en furent moult peürox Qu’il n’en i ot nul si hardi N’en fust trestout acouardi Lors s’en sont en la sale entré Et li vaslés a regardé Le chevalier qui se seoit Et la pucele que il voit Dont Gavains li fist la proiiere Auques le counut a la ciere A le maniere et au sanblant Del chevalier qui si ert grant Lors mist a raison le segnor « Sire, dist il, si grant dolor N’avint onques, ce saciés vous La hors en l’Atre perellox Ne si grant mais n’i avenra Com en ceste nuit i ara Bien doit tout le monde plorer Car el monde n’avoit son per De largece et de cortoisie Et por sa grant cevalerie N’estoit il nient plus orgellox Maudis soit l’Atre perellox Quant il onques s’i herbega Quant li rois Artus le sara Tout en destruira cest païs Car li bons rois poesteïs Nous demandera tout par droit Son neveu qu’il pert orendroit Il le pert, c’est moult grans damages A Dix, com grans duel ses lignages En aront quant il le saront ! Et trestoute la gent del mont Quil connoiscent nes d’oïr dire Aront de sa mort duel et ire Car moult ert proisiés et amés Sire, fait il, or escoutés Par quel sorfait et par quel tort Et l’ocoison dont il est mort Cel chevalier que je la voi Vint orains a la cort le roi Quant il seoit a son mangier Cele pucele i vint des ier Presenter au roi son servise A la cort remest en tel guise Que de la coupe serviroit Et que Gavains le garderoit D’enconbrier de honte et d’anui Orains le saisi devant lui Cis chevaliers par son orguel Par mi la forest de carduel L’a Gavains toute jor sivi En l’Atre perellox le vi U j’ai grant piece o lui esté Si m’a de cief en cief conté Com il l’a sivi toute jor Je li priai par grant douçor Qu’il venist caiens herbegier Mais il n’i vaut sans son destrier Venir i en nule maniere Ne se vous avés m’amor ciere Ne riens que je faire vous puisce Gardés que bon ami vous truisce Car une cose vous demant » Et cil li dist, « Je vous creant Quanques vous me vaurés requerre Nis se c’estoit toute ma terre — Sire, fait il, vostre merci De ceste pucele vous pri Que ma suer le gart anuit mais Et le matin le rait en pais Li chevaliers qui l’amena Mesire Gavains m’en pria Que fust anuit hors de sa garde » Et cil fierement le regarde Puis li a dit, « Ce n’iert ja fait Max cinc cens mile dehais ait Ki en tantes cors l’a sivie Et qui en fist tele estoutie Devant le roi a son mengier Orains voiant maint chevalier S’anuit le garde nus fors moi Ne se jou ja le vous otroi Tant com je puisce estre sor piés » Li sire fu moult afaitiés Qui li pria moult bonement Que il le baut sans matalent La dame l’en pria aprés Et toute la gent du palés Que il l’otroit, si fera bien Et cil respont, « Ce ne vaut rien Je nel feroie por nul home » Li vaslés dist, « Ce est la some Que se mon plaiscir n’en est fait Que je sui cil qui s’en revait A monsegnor Gavain arriere Et dirai li que sa proiiere Ne puet estre par moi furnie Il est plus bel que je li die Quant jou en fin faire le dui Et que je aille ariere a lui Por prendre o lui et bien et mal Qu’il me tenist por desloial » Quant li sires ot et entent Que cil adecertes l’enprent Et qu’il s’en veut aler ariere « Amis, fait il, se par proiiere N’en puet estre vostre bon fait J’en ferai ançois un sorfait K’u mais isciés de ce castel Amis, fait il, ce est plus bel Que la me bailliés par amor Si i arés gregneur honor K’el vous soit par force tolue Que ja ne vous sera rendue Se on le vous taut par meslee Et s’el m’est par amors livree En pais le rarés le matin » Cil set tres bien, ce est la fin Que por droit nient s’en defforce Que rendre li estuet a force Si qu’il n’en puet passer par el « Sire, fait il, en vostre ostel Me herbegai par bone foi Or entreprendés trop vers moi Qui dites que ja m’ert tolue Ne ja ne me sera rendue La pucele que je tant aim De traïson i a un rain Nus ne vous en porroit desfendre — Amis, je vous ferai entendre Fait li sire, qu’estre l’estuet Et qu’autrement estre ne puet Se vous a raison entendés La pucele que vous portés N’est pas vostre, ains l’avés toloite Dont est raisons et fine et droite Que ne doit pas o vous coucier K’il a la hors un chevalier Qui gist anuit a la capele Et vous suit por la damoisele Si dist ce qu’il se conbatra Et que demain desraisnera Ke a tort en estes saisi Et s’il le puet prover isi Dont ariiés vous a grant tort De li ne joie ne deport A grant tort ariiés eüe Joie ne soulas de sa drue S’il le puet isi desraisnier — Sire, ce dist le chevalier Il n’est pas par son dit prové Bien m’eüst ataint et trouvé Ains que çaiens fusce venu S’il i eüst son preu veü Car j’esroie oult belement Et le ceval n’estoit pas lent Sor quoi il m’aloit porsivant — De droit nient m’alés plaidant Fait li sire, ce est l’estrox Je le prendrai ja voiant vox U el m’ert par amors livree » Cil set moult bien que par meslee Ne la puet il mie desfendre Si la veut mix par amors rendre K’estre laidis et perdre la « Sire, fait il, quant isi va Que rendre le m’estuet en fin Quant je la rarai le matin Jel souferrai a quel que paine » La dame le prent, si l’en mainne En sa canbre qui moult ert bele Entre li et la damoisele Et mangierent moult lïement Li sires o toute sa jent Mangierent en la sale tuit A grant joie et a grant deduit Fors soulement le chevalier A celui desplaist le mangier Quant il n’i voit sa damoisele Par le vile va la novele Ke Gavains estoit herbegiés Puis que li solax ert couciés La hors en l’Atre perelox Moult par en furent angousçox Clerc et borgois et chevalier Tout le pule cort au mostier Priier Diu qu’il le gart de mort La oïsciés un duel si fort Qu’il ne porroit estre conté Li auquant sont as murs monté Por escouter que ce sera Et conment il esploitera Mesire Gavains est assis Sor un tonbel de mabre bis Entre le mur et le cancel Tant par fu rice le tonbel Que je n’en os dire le taille Car je dout moult que je n’i faille A deviser l’entailleüre Por çou du deviser n’ai cure Ne s’i fu pas sis longement Que desous lui esmouvoir sent Contremont et sordre la lame Mervelliés fu quant n’i vit ame Qui i abit ne tant ne quant Et la lame se leva tant Que les piés li sordent de terre Il va un autre siege querre Que cil ne lui agree pas N’ot pas alé seul quatre pas Que le tonbel fu tout overt Et qu’il i vit tout en apert Une damoisele gisant Et el se lieve en son seant Tout voiant monsegnor Gavain Et il leva sa destre main Por segnier son cief et son vis Et nequedent, a son avis Des l’ore primes qu’il fu né Et qu’il sot counoistre biauté N’ot il si tres bele veüe Et fu moult ricement vestue Mi partie de dous samis Qu’il en fu auques esbahis L’un en fu vert, l’autre vermel « Gavains, fait el, moult me mervel Se vous avés paour de moi — Damoisele, fait il, je voi çou que jou onques mais ne vi Se un peu en sui esbahi Il ne fait mie a mervellier Il n’a si hardi cevalier El roiame le roi artur Qui fust mie bien aseür S’il vous eüst trouvé isi — Sire, fait ele, je vous di Que je sui cose de par Dé Et Dix vous a ci amené Por jeter moi hors de prison Je sai moult bien, se par vous non N’iscisce ja mais a nul jor D’ire et de paine et de dolor Mais j’en istrai anuit par vox — Bele, de l’Atre perillox Me dites, fait il, tout le voir Car j’ai grant talent de savoir De cest non coument il l’ot primes Si veul savoir de vous meimes Des quant et por quoi et coument Vous estes ci si soutiument » Ele respont, « Sire, mon pere Prist fenme aprés la mort ma mere Qui moult fu de lui au desus Moult ert bele, mais j’ere plus Si ot de moi moult grant envie Par caraude et par sorcerie Et par traïson engigna Sifaitement m’ensorcera Que j’en isci fors de mon sens Foliant alai un lonc tans Que jou ne soi que je fasoie Seule erroie un jor une voie Si encontrai, ce est la some Un diable en sanlance d’ome A raison me mist erranment “Bele, fait il, de cest torment Et de la grant enfermeté U vous avés lonc tans esté Se vous voliés estre moie Encor wi cest jor vous garroie ” J’euc de garir moult grant talent Si li craantai erranment A faire del tout son plaiscir Et il mist painne a moi garir Ainc puis n’oi touce de ce mal Il me monta sor son ceval Si m’aporta de si que ci Des ice tans que je vous di Ai puis esté ensanble o lui Moult ai vescu a grant anui Car trestout son plaisir faisoie Cascune nuit, et si gisoie Cascun jor seule en cest tonbel Et neporquant quanque m’ert bel A son sens et a son pooir Me faisoit il trestout avoir Tout m’aconplisçoit mes aviax De beles robes, de joiax Et de viande a mon plaisir Mais je vausisse miex morir Qu’estre soie, tant le haoie Quant cascune nuit le veoie Venir si lait et si hideus Por c’est ci l’Atres perilleus Que c’ert ci tos jors son hostel Sire, dist ele, or n’i a el A lui conbatre vous couvient Car je sai de voir que il vient Et qu’il n est mie lonc de ci Or ne soiiés mie esbahi Aiiés en Diu bone esperance Si vous avés bone creance Ja mar le douterés de rien La crois vous le conisciés bien Dont je voi le signe lasus Et quant vous onques serés plus Angouscex de vostre bataille Regardés la sans nule faille Reprenés ileuc vostre alainne Et des dous pars de vostre painne Serés maintenant alegié Se vous n’avés de moi pitié Biax sire, si l’aiiés por vous Car saciés bien tout a estrox Qu’il vous ocirra u vous lui Ne ja mais n’ere hors d’anui Si vous anuit ne m’en jetés Biax dous sire, or vous atornés Si montés sor vostre ceval Car le traïtre desloial N’est pas lonc demie louee » Et Gavains a sa teste armee Si est u bon ceval monté La pucele au cors acesmé De l’armer se haste et avance Son escu li baille et sa lance Estes vous le diable au mur « Or soiiés, fait ele, aseür » Ens est entrés par mi la porte « Pute, fait il, vous estes morte Et vostre lechierres honnis Vilainement ert departis A cort terme cest parlement Mar vit le vostre acointement » Cele respont conme cortoise « Certes, fait ele, moult me poise Que onques fui vostre putain Mais vés ci monsegnor Gavain Qui moult est proisié et loé Et j’ai bien ma creance en Dé Qu’il li sera anuit aidans Si n’ere plus vostre soignans » Quant cil sot que ce Gavains fu A mervelle en fu irascu Car bien set que bien est prisiés Lors est l’uns vers l’autre eslaisciés Tant com ceval porent randir Si se fierent de tel aïr Des lances desox les mameles Qu’anbedex volent en asteles Onques por çou ne s’aresterent Si durement s’entrencontrerent Des cevax, des cors, des escus K’anbedex sont entrabatus Et ex et les cevax ensanble Gavains de mautalent trestranble Si est tantost en piés saillis Et cil ne fu mie esbahis Ains a mis le main a l’espee A tant conmence la meslee Onques hom si dure ne vit Moult doute l’uns l’autre petit Au sanlant que cascuns d’ex fait Le deable les saus li vait Sel fiert del brant en l’elme amont K’en plusors lius li quase et ront Gavains fierement le reçoit Bien li paie çou qu’il li doit Car il le fiert tout a bandon Cent caus li done en un randon Ains que l’assax fust departis Moult par fu grans li fereïs Li diables le fiert del brant Amont desor l’elme luisant Que le cercle l’en a ronpu Li caus glaçoie sor l’escu Si l’en abat plus d’un quartier Gavains le fiert du branc d’acier Si durement en l’elme amont Les bones pieres qui i sont Esmeraudes, safir, topace Abat devant lui en la place N’i remaint ne or ne esmal Qu’il n’abate tout contreval Li caus descent desor la hance De la brogne qui si ert blance A abatu le destre pan Anbedoi sont en grant ahan En grant angousce et en grant paine Car cascuns d’ex forment se paine De l’autre grever et laidir Li diables ot grant aïr Moult grant prouece et moult grant force Gavain recule des qu’el porce A l’entree de la capele « Gavains, ço dist la damoisele Dont ne creés vous bien en Dé Le gloriex de maïsté ? Vés la le signe de la crois » Gavains a entendu la vois Et la parole a la mescine Sore li cort de tel ravine Qu’il l’a reculé quinze piés Moult par fu le deable iriés Quant voit que reüser l’estuet Sore li cort a l’ains qu’il puet Se li fait une autre envaïe Desor le hiaume de Pavie Le fiert devers la destre part De l’elme li abat le quart Et des mailles de l’auberc cent Li caus sor l’espaulle descent Si qu’il l’a en dex lius navré Ferant ferant l’en a mené Tant qu’el porce l’a enbatu Gavains tint le brant esmolu Si se desfent au mix qu’il puet Li diables les saus li muet Si li a fait le tierc asaut Li sans qui des plaies li saut L’a moult grevé et afoibli Longement se conbat issi Et se desfent a quel que paine Por peu qu’a son voloir nel manne Li diables qui grant force a Ne mais que gavains s’esforça Por la pucele qui ploroit Et neporquant mestier li ot Ce qu’il ot adosé l’arvol Qu’il ot en la teste et el col Et es espaulles mainte plaie La pucele forment s’esmaie Qui si afebloiier le voit « Lasse, fait ele, ce que doit Que deable a si grant vertu ? A ! bon chevalier, que fais tu ? De la crois dont ne te sovient ? » A Gavain sa force revient Sa prouece et son hardement Sore li cort moult radement Quant il ot la crois regardee Tel caup li done de l’espee Que a genox l’a abatu De cief en cief li fent l’escu Que les moitiés cieent a terre Autre fois l’est alés requerre Car il voit qu’i l’a moult grevé Sor un tonbel l’a raüsé Qui ert deriere ses talons Li tonbiax ert et grans et lons Si l’a enpaint par de desus Que vous en diroie je plus ? Si durement par desus ciet Qu’il n’a pooir qu’il se reliet Au caoir que l’aversier fist Et au grant branle que il prist Est le hiaume en terre ferus Si que li las en sont ronpus Et qu’il vola loins en la place Gavains en voit nue la face Sel fiert du brant en mi le vis Par desus les ex en a pris La face et demi le menton Puis le refiert tout a bandon Si qu’il en a la teste prise Lors s’est la damoisele asise Qui moult a grant peor eüe Puis dist, « Iceste sorvenue Soit de Damediu beneoite Longement ai esté destroite En grant angousce et en grant ire Bien puet trestox li mondes dire Que c’est ci le Bon Chevalier Et cil qui tox jors seut aidier As damoiseles au besoig » Bien ont oï l’estor de loig Et les asaus et les cembiax Cil qui estoient as cretiax Bien sevent que l’un est vencu Mais ne sevent li quex ce fu S’ont de Gavain moult grant paor Issi soufrirent dusqu’au jor En tel ire et en tel pensé Et il a son cief desarmé Si s’est couciés les la capele U devant a la damoisele Tantost com il fu ajorné Et que le solel fu levé Point li vallés a la capele N’ot chevalier ne damoisele Ne borgois en tout le castel Ne cort aprés le damoisel Por monsegnor Gavain veoir Si ont grant talent de savoir Com il ot la nuit esploitié A grant mervelle furent lié Quant sain et sauf l’orent trové Et a mervelle ont esgardé Le diable qui ert ocis Por çou qu’il gastoit le païs En ont grant joie demenee La nouvele est partout alee Que le diable estoit destruit Et si seüscent bien trestuit Que l’Atre avoit son non perdu Li chevaliers levés se fu Si demanda sa damoisele Quant il ot fait metre sa sele Et il se fu moult bien armés Puis est el grant cemin entrés Qui le menra en son païs Et Gavains a a raison mis Le damoisel qui a lui vint « Biax amis, fait il, que devint La pucele et le chevalier ? — Sire, fait il, sor son destrier Estoit montés quant je vinc ça Et je sai bien que il s’en va Le grant cemin en sa contree Mais bien fu ersoir acievee La proiiere que me feïstes Car tout issi com vous deïstes Le garda ma suer toute nuit Puis le remist en son conduit Geui quant il se fu armés — Dous amis, fait il, or pensés Et de moi et de mon destrier Que nous eüsçons a mangier Si ert vostre bontés parfaite Moult ai anuit male nuit traite Si ne mengai des ier matin » Cil est montés sor son roncin Qui est grant et fort et isnel Si s’en va poignant au castel Dex de ses vallés apela Pain et vin assés lor bailla A grant planté haste rostis Et un pasté de dex pertris Assés lor baila un et el Blans doubliers et hanas et sel Si lor bailla avainne et fain Puis revint poignant a Gavain Qui l’atendoit el cimentire De ce n’i a il plus que dire Mais qu’il mangierent lïement Gavains conmanda erranment A metre son frain et sa sele « Sire, ce dist la damoisele Por Diu et por honor vous pri Que vous ne me laisciés ici Car moult remanroie esgaree Aler veul en vostre contree Ensanle o vous, s’il vous est bel — Sire, ce dist le damoisel Menés ent la pucele et moi Et g’irai por un palefroi S’il vous plaist, que cevaucera Car j’ai grant volenté pieça D’aler ent en vostre servise — Amis dous, a vostre devise Veul jou, fait il, qu’i soit tot fait » Et cil por un palefroi vait Vistement arriere au castel Onques ne veïstes plus bel Ne plus cointement acesmé Le palefroi a amené Si est la pucele montee Et Gavains a sa teste armee Si est montés sor son ceval Puis oirrent aprés le vassal Tout troi ensifaitierement Cevaucié ont bien longement En tel guise com je vous di Tant que vint aprés mïedi Adont virent le chevalier Bien loins devant ex cevaucier Mais il l’ont bien recouneü Et au destrier et a l’escu Qui ert d’une color vermel Si reluist contre le solel Si l’ont por çou mix avisé Qu’il l’avoit deriere jeté Por la pucele qu’il portot La damoisele grant duel ot Que Gavains trouva u sarcu Plus devint vermelle de fu Quant ele sot que c’estoit il « Sire, fait ele, est çou cil A cui vous vous devés conbatre ? Se troi l’asaloient u quatre Il aroient ains moult a faire Qu’il li peüscent riens forfaire En Bretaigne n’a chevalier Plus outrecuidié ne plus fier Ne plus douté en son païs Maint bon chevalier a ocis Par sorfait et par estoutie Si vous poés, sans vilonie Et sans grant blasme, retorner Je vous os bien dire et loer Que vous laisciés ceste bataille Onques ne feïstes sans faille Nule, neïs celi d’ersoir Dont tant vous deüsciés doloir Com vous deveriés de cestui Tant ai oï parler de lui De sa force et de sa valor Que jou en a moult grant paor » Et Gavains dist, « Ja Diu ne place Que je m’en fuie ensi de place Tant com soie ne sains ne vif Ne qu’il ait ensi sans estrif La damoisele qu’il en porte — Mix vaudroie estre, fait el, morte Que vous perdisciés devant moi Par force nis le petit doi Car de dolor m’avés jetee Et je dout tant ceste meslee K’onques mais si grant paor n’oi Sire, par le diable soi Qui il ert et de sa valor Il a dusqu’a none de jor La force de trois chevaliers Les plus hardis et les plus fiers Que on puist en nul liu trover Quant le solel doit decliner Des qu’il est none et en avant Va un petit afebloiant Petit et petit afoiblie Desi a l’ore de complie Mais tox jors est fors et hardis Ja ne sera si afoiblis Ce saciés vous veraiement Que il n’ait force et hardement Contre le mellor chevalier Que ost vers lui armes baillier Une autre cose vous en di Si savés bien si est ensi Vostre mere si fu moult sage Auques vous dist de son corage Je sai bien qu’ele fu faee Si vous dist vostre destinee Et vous acointa sans mentir Quanques vous devoit avenir Moult vous proia que prex fuissiés Que ja nul jor ne vesquissiés Ne seriiés vencus ne mors Par nul home qui tant fust fors Ne mais que vous dist de cestui Que vous vous gardisciés de lui Car el ne doutoit se lui non Et je vous dirai ja son non Si porrés mix par çou savoir Si je vous di mencongne u voir Je sai bien qu’ele vous nouma Et si vous dist et devisa Qu’il n’avoit si fel chevalier Si outrequidié ne si fier Ne plus fort en toute Bretaigne C’est Escanors de la Montaigne Itant vous dist el de cestui Que s’il vous couvenoit a lui Conbatre, qu’ele ne savoit Ains ert en doute, qui vaintroit — Bele, dist il, c’est verité Ensi com vous l’avés loé Le me dist ele et devisa Mais ja Dix tant ne me herra Que je m’en voisce arriere issi Mix aim estre mors que honi Car la mors est tost trespassee Mais la honte a longe duree Car cascuns le dist et raconte Et je ne porroie sans honte Ce veés vous bien, retorner Tant m’estuet aprés lui aler Que il m’ocirra u jou lui — Moult dout, fait ele, vostre anui Et quant autrement ne puet estre Et vous savés ja tout sen estre Et son errement et sa vie Et savés bien qu’il afoiblie A l’esconsement du soleil Se volés croire mon conseil Ja a lui ne prendrés meslee Desi que none soit passee — Bele, fait il, je vous kerrai Aprés none m’i conbatrai Si com vous le m’avés loé » Toute jor ont issi erré Tant qu’il vinrent a une haie Et cil qui point ne se delaie Qui grant pieça l’avoit passee Fu entrés en une valee Si que Gavains en ot perdue Une grant piece la veüe Et que il ne vit ne ne sot Quel part li chevaliers errot Lors se conmença a haster Puis le vit devant lui errer Bien loins par mi une canpaigne Il esgarda aval la plaigne Si vit devant lui un castel Onques si bien clos, ne si bel Si rice, ne si bien assis N’ot mais veü a son avis Lors quida bien de verité A ce que il ert avespré Que li chevaliers qu’il sivoit U castel se herbegeroit Si vit bien que por nul besoing Tant estoit li chevalier loing Ne l’ataindroit il ains l’ostel « Vallet, dist il, or n’i a el Je voi bien que ce chevalier S’ira ja laiens herbegier Et nous conment le porron faire ? » Cil qui ert frans et debonaire Li respondi, « Sire, moult bien Mar vous esmaierés de rien Tant que je soie sains ne vis Cis castiax et tox li païs Et ceste grant forest fu moie A une autre suer que j’avoie Dounai trestout en mariage A un chevalier preu et sage Et le païs et la contree O ma suer qu’il a espousee Si quit bien que cel chevalier S’ira ja laiens herbegier Et nous irons ciés un borgois Qui est rice et sage et cortois Qui fu hom son pere et le mien Si nous herbegera moult bien Car ce ne seroit mie bel Que nous alisçons u castel Por nul besoing, prendre l’ostel Aveuc vostre anemi mortel — Va donc, fait il, sans demorier Faire l’ostel aparellier Que delivre et bel le truisons » Li vaslés fiert des esperons Le ronci qui moult tost l’en porte Lors vit entrer par mi la porte Le chevalier qu’il vont sivant Il va les rues trespassant Tant qu’il est venus au segnor « Cil Dix, fait il, vous doinst honor Biax sire, qui por nous sauver Se laisça en la crois pener — Amis, fait il, et Dix vous gart Travellié estes, si est tart Et je vous ferai sans dangier En ce castel bien herbegier Car bien est tans de prendre ostel Sire, fait il, je ne quier el La vostre tres grande merci » Lors est un chevalier sailli Que la damoisele descent Uns escuiers son ceval prent Et doi le courent desarmer Or m’estuet del vaslet parler Qui est ciés le bourgois venu Et quant le bourgois l’a veü Moult en a grant joie menee « Sire, fait il, vostre jornee Est parfaite, çou saciés vous Herbegiés estes a estrox Ja mar proiier vous en ferés Demain tout a loisir irés Veoir vostre suer u castel — Sire, ce dist le damoisel Je sui herbegiés voirement Mais or montés delivrement S’irons encontre un chevalier Que j’amain çaiens herbegier Si li faites moult grant honor Que onques son per ne mellor Ne fu nés en toute Bretaigne Des les pors dusqu’en Alemaingne Nen est nus si bien enteciés Si vous devés faire moult liés De çou que vous est avenue Si grans joie de sa venue » Moult en est li ostes joians Tantost apele ses sergans Si lor conmande a atorner Les seoirs, le fu, le souper Si delivrement et si bien C’on nel peüst blasmer de rien Puis est montés sor son destrier Qu’il ot grant et fort et legier Si s’en est de la vile isçus Et Gavains estoit ja venus Desi as portes du castel Mervelles les apele bel Li borgois, qui o lui le maine En la soie maison demaine Ens el palais le fist descendre Il avoit fait tapis estendre Et coutes pointes u seoir Si i mena Gavain seoir Devant ex ert le fu moult grant A tant acourent li sergant Por lui desarmer errament Mervelles le sert bonement La damoisele o le cief bloi « Or vous soufrés, fait il, un poi Je n’iere encor pas desarmés » Lors a son vallet apelé « Amis, fait il, va tost et cour La sus amont en cele tour Et si fai tant par ton porcas Que cil n’ait joie ne soulas De la pucele que il maine Por moie amor i met grant painne Que ta suer anuit mais le gart Et si di de la moie part Que s’il nel veut acreanter Que il n’i a fors du monter Car je m’en conbatrai ançois C’anuit mais le gart sor mon pois » Li vallés vistement i cort Alé s’en erent de la cort En la sale u il se seoient Et quant li chevalier le voient Moult par l’ont tout bel apelé Et Escanors l’a regardé Si l’a moult bien recouneü Puis dist, « Mal soiés vous venu Sire fol gars mesafaitiés Ja mais nul jor ne serai liés Des que de vous vengiés me soie Se hors de çaiens vous tenoie Je m’en vengeroie moult bien Ke de m’amie maugré mien Ersoir departir me feïstes Segnor, dist il, ainc ne veïstes Si fol garçon, ne si sorfait » Trestout lor a conté le plait Com le soir devant l’ot servi Et li sire li respondi « Sire, ja Dix li fix Marie Ne vous doinst force ne baillie De lui enpirier ne grever — Or laisçons, fait il, çou ester Qu’il morra encor a mes mains » Li vallés qui n’ert pas vilains Li respondi trestout en pais « Sire, fait il, je n’en puis mais Se me haés por cest mesfait » Fait il, « Segnor, a cel forfait Je m’en met en vo jugement Se je fac le conmandement Monsegnor Gavain a qui sui Et encor le ferai je wi Que ja por lui ne le lairai Segnor, fait il, je vous dirai Por quoi cest estrif est monté » Lors a de cief en cief conté Conment il prist devant le roi La pucele par son derroi Et conment Gavains l’a sivi Et conment il se conbati A l’aversier el cimentire Onques rien n’i laisça a dire Com il l’a suï toute jor Lors mist a raison le segnor « Sire, fait il, je vous requier Que se vous m’avés de rien cier Que vous un don me creantois — Par foi, fait il, ce n’est pas drois Que je de rien vous escondie Non ferai jou ja en ma vie De rien que je puisce aramir Bien vous devroie a gré servir Qui me dounastes le castel — Sire, ce dist le damoisel Mesire Gavains me proia De cele damoisele la Que ma suer le gart anuit mais Si soit rendue tout en pais Le matin a cel chevalier Et je vous veul forment proiier Que vous issi le faciés faire » Lors ne se pot Escanors taire Qui la parole a entendue « Veus me tu, dist il, de ma drue Com ersoir faire departir ? Mix vauroie orendroit morir Que ja mais tant com je vis soie Soit en garde fors en la moie Sire, dist il, se vous creés Ce garçon que vous la veés Vous en arés honte et anui Quant par vostre proiere sui Herbegiés en vostre maison Se on m’i faisoit se bien non Il vous seroit a mal torné — Par foi, fait il, c’est verité Jou meïsme vous herbegai Mais au vallet acreantai Que je feroie sa proiiere Or ne sai jou en quel maniere Le quel je doie mix laiscier — Sire, ce dist le chevalier Ce est drois et fine raison Que vous gardés de traïson Que vous en seriiés retés Se de rien i ere grevés Par vous ne par vostre seü Se g’i avoie mal eü Vilenie ni enconbrier Vous en ariés reprovier A tox les jors de vostre vie » Et li sire la li otrie Et li dist qu’il soit aseür Que, se c’estoit le roi Artur Ne li consentiroit il mie Que il li feïst vilenie Tant com il fust en son castel « Amis, fait il au damoisel Je ne l’en pus pas dessaiscir S’il nel veut de sen gré soufrir Ne je ne doi por nule perte Faire traïson si aperte Por vous ne por vostre consel — Par foi, fait il, moult me mervel Que vous ne faites tout mon buen Soit tors soit drois, ains que le suen Et, puis que faire nel volés Li chevaliers est tous armés Qui porsuit por la damoisele Encor n’osta ne frain ne sele Si est la jus ciés un borgois Si s’en conbatera einçois K’anuit mais sor son pois le gart Et je li di de soie part C’orendroit remont si s’atort Car ja sera en vostre cort Ce saciés vous tout a estrox La bataille par devant vous » Lors court por Gavain a l’ostel Li sire dist, « Or n’i a el Escanors, quant Gavains ça vient A lui conbatre vous couvient Mais je vous lo c’autrement aille Laide seroit ceste bataille Et coustouse, s’ele ert par nuit Trop seriés coustox, je cuit Se ne la metés en respit » Et li chevalier li ont dit Que ce seroit grans vilenie Il est plus bel qu’il baut s’amie En la garde a la dame wi mais Et le matin le rait en pais La dame meïsme l’en prie Et si li creante et otrie Que loiaument li gardera Et le matin le ravera Greanté l’a a quel que paine La dame le prent, si l’en maine En sa canbre dedens la tor Si li a fait moult grant honor Conme de boire et de mengier Et de bel lit a li coucier Li ostes, qui grant joie en a Un de ses vallés apela « Cor, dist il, si di a Gavain Qu’il se herbert duqu’a demain Que li chevaliers a livree La damoisele sans mellee En la garde a la dame wi mais » Et cil i cort tout demanois Si est ciés le borgois venu Monsegnor Gavain a veü Tout prest d’armes, et si devoit Aler a la cort orendroit Cil li a dit k’i se demort Et k’il n’aille pas a la cort Mais toute la nuit se repost « Amis, dist Gavains, ains que j’ost Mes armes, di moi verité S’Escanors a acreanté Le mandement que je li fis » Et cil li dist, « Jel vous plevis Qu’il l’a graé a mon segnor Alee s’en est en la tour O ma dame, si que jel vi » Gavains, qui pas ne l’en creï Qui mix en veut estre avoiié I a son vallet envoiié Por savoir se c’ert verité Si conme cil li ot conté Li vallés s’en cort a le tor La damoisele et sa seror Trova desor un lit seant Puis s’en vint a l’ostel corant Si li a dit que c’ert bien voir A tant s’ala Gavains seoir Si l’ont maintenant desarmé En main liu ot le vis hurté Si que li sans en ert saillis Si en ert un peu enlaidis Que du sanc que de la suor Li sires ot une seror Bele et courtoise et debounaire A qui il ot un baing fait faire Por baignier monsegnor Gavain Moult par l’ot bien fait et a plain Si qu’il ert ja tout apresté Si l’ont en la canbre mené Si l’ont baignié et costeï Moult tres doucement l’a servi Li suer a l’oste a son pooir Et si poés de fi savoir Que cele qu’il ot amenee C’est de lui servir moult penee Quant baigniés fut tot a loisir Et il s’en vaut du baing iscir Lors li aporte par francise Li suer a l’oste une cemise Et unes braies de cainsil Plus blances que n’est flors d’avril Quant fu baigniés et atorné Dont fu li mengier apresté Lors a on l’iaue demandee A aise les la ceminee Est assis mesire Gavain Si fist devers sa destre main Seoir l’oste o la damoisele Qu’il amena de la capele De l’autre part devers sa coste Fist seoir o la suer son oste Son vallet qu’il ainme forment Puis orent moult plenierement Pain et vin et car et poison Oisiax rostis et venison Et quanques lor vint a plaisir Moult les fist l’ostes bien servir A grant joie et a grant deduit Moult orent grant plenté de fruit Tantost com il orent mengié Por çou qu’il erent travellié Firent les le feu son lit faire Je ne vous porroie retraire L’onor que li bourgois li fist Que moult durement s’entremist Et cascuns d’ax a son pooir De quanques il porent avoir Ensi dormi et reposa Et Escanors s’aparella Au matin quant il fu grant jor Ke mout li desplest le sejor Moult li poise que de sa drue Avoit la saisine perdue Cele nuit et cele devant Vistement l’arma un sergant Si li mist son fran et sa sele Il demanda sa damoisele Et la dame li amena A Gavain la novele en va K’Escanors, qui point ne se targe A ja pendu au col se targe Si est pieça hors de la porte O la pucele qu’il en porte Quant Gavains l’ot, moult li desplest Vistement saut sus, si se vest Si a ses armes demandees Por çou k’el erent trop usees Li a li borgois aporté Ki moult le veut servir a gré Hiaume a visiere de Senlis Et hauberc de çanbel faitis Et cauces blances et treslices Onques ne veïstes si rices Moult fu clere et trencant l’espee Qui aveuc li fu aportee Et li escus noviax et frois Et si ert d’un moult rice orfrois La guige et toutes les enarmes Onques Gavains si rices armes N’ot mais veü en son aé Un ceval fort et desreé Roide et isnel et lanceïs Le mellor de tout le païs Li ont amené en la place Et Gavains dist, « Ja Dix ne place Que cest service soit perdu Et Dix me doinst force et vertu Et pooir qu’en tel liu vous truise Ke gueredoner le vous puisce Que moult m’avés fait grant honor — Sire, fait il, je vous honor Por mon segnor que je ci voi Et por çou que je quit et croi Que prodome estes et vaillant Je ne vous sai aler offrant Mais prenés çaiens sans dangier Quanques onques vous est mestier Car tout vous met en abandon — Moult a ci, fait il, rice don Je ne le vous osaise querre Si ne quit que en nule terre Si grant honor mais faite fust A home k’on ne couneüst Et j’en avoie bon mestier Mais de l’espee et del destrier Ne veul je pas, vostre merci Je l’ai grant et fort et hardi Espee doree trencant Moult par est le gueredon grant Que je doi encor del sourplus Armer m’estuet, qu’il n’i a plus Moult me dout de trop demorer » Grant paine ont mis a lui armer Li vaslés et les damoiseles A tant furent mises les seles Puis ont les cevax amenés Mesire Gavains est montés Que onques estrier n’i requist Et li vaslés son escu prist Quant il fu montés, et sa lance Li ostes le sert et avance Qui a la pucele montee Qu’il orent o ex amenee Si se misent tout a la voie Et li bons ostes les convoie Tant que il vinrent dusqu’au bois « Sire, dist il, je m’en revois A Diu soiiés vous conmandés » Lors est Gavains u bos entrés Tout li cemin k’Escanors oirre Et il le recounut en oirre U il aloit baisant s’amie Et mesire Gavains li crie Qui consentir ne li veut plus « Vassal, fait il, metés la jus Trop l’avés longement portee Ja plus ne l’arés sans meslee Trop en avés esté saisi » Et Escanors li respondi « N’en blasmés nului se vous non Car, par saint Lasdre d’Avalon Bien m’eüsciés ataint des ier Se trop n’est lent vostre destrier Car je n’erroie fors le pas Mais je ne quit ne ne croi pas Que ja par vous en soit enprise Vers moi bataille en nule guise Je ne vous en depri de rien Une cose saciés vous bien Que jou tramis de mon païs La damoisele o le cler vis Toute seule a le cort le roi Puis i alai par grant derroi Prendre la voiant maint baron Por avoir raisnaule ocoison De conbatre moi contre vous » Et Gavains dist, « Ce est l’estrox Ja en averés la meslee Quant vous tant l’avés desirree » La damoisele iree estoit Et li vaslet, por çou qu’il voit Que la bataille est si matin « Sire, fait il, en cest cemin N’ert pas ceste bataille bel Je sai pres de ci un prael Et une lande bele et grant Si seroit moult plus avenant K’i alisciés, s’il vous plaisoit Et jel jugeroie par droit Faire vostre bataille en pré Trop vous seroit a mal torné S’ele estoit ci en ces quarieres En ces tais et en ces raiieres » Escanors dist, « C’est verité Il n’ert ja par moi destorné Se Gavains veut, que je n’i aille » Tox jors demoure la bataille Sin a li vaslés joie grant « Amis, font il, va ore avant Et nous te sivrons dusque la » Et cil en une sente entra Si a tant par le bos alé Qu’il est en une lande entré Qui moult estoit et grande et bele Lors descendi la damoisele Escanors sor l’onbre des carmes Puis estraint entor soi ses armes Et Gavains est aparelliés Lors est l’uns vers l’autre eslaisciés Et se sont si entreferus Que des espix croiscent les fus Et qu’il volerent en tronçons Ainc ne se murent des arçons Quant Gavains ot sa lance fraite Vistement a l’espee traite Sel vait irïement requerre « Gavains, dist il, ens en ma terre N’est pas coustume ne usage S’uns chevaliers par son outrage A vers autre bataille prise Ja n’i ara en nule guise Espee traite desi la Que li uns d’ex keüs sera Ains s’entressaient au jouster Et font des lances aporter Et jostent tant, quoi qu’il lor griet Que li uns d’ex a terre ciet Ce dient cil de Normendie Que si bele chevalerie N’a el siecle que de jouster Faisons des lances aporter S’ert plus bele nostre bataille Prions cest vallet qu’il i aille Ki a ronci fort et isnel Vistement arriere au castel Si nous aport un fais de lances — Amis, font il, car nous avances Mervelles t’en saron bon gré » Et cil i est moult tost alé Ki moult volentiers se travaille Por çou que il veut la bataille Desi a none delaiier Et cil s’alerent onbroiier Tant que li vallés s’en repaire Qui moult a en soi grant contraire Et qui moult a le cuer dolent Et cil s’asisent erranment Cascuns dalés sa damoisele Son escu, son elme et sa sele Osta cascuns d’ex por laiscier Rafrescir soi et son destrier Ensi se demourerent tant Que li vaslés revint poignant Ki a sis lances aportees Grosses et grandes et quarees Ki moult li fissent grant rancune Mais si tres longe en i ot une Grosse et quarree de quartier Qu’il n’avoit si prou chevalier Si grant ne si fort ne si dur El roiame le roi Artur Ja tant ne se penast de poindre Qu’il le peçoiast par ajoindre Gavains les lances esgarda D’une cose se porpensa Dont tox li mons le doit prisier « Va, fait il, a cel chevalier Si li porte de moie part Ces sis lances, et si esgart Les quex trois il en aime plus Si m’en raporte le sorplus Car je veul qu’il en ait le cois » Et cil par dejouste le bois I va poignant par une sente Toutes les lances li presente De par Gavain en tel maniere Que les trois l’en renvoit arriere Et les trois a cois en retiegne Il ne veut pas, quoi qu’il aviegne (Car bien voit qu’il est pres de none) Se Dix la victore l’en done Ke par armes vaintre le puisce Que cil nule occoison i truisce Ne qu’il die pas que ce fust Por çou que le cois en euest Des lances, ains veut mix par tant Que Escanors coisisce avant « Ahi, Gavains, fait Escanors Trestout ausi comme li ors Tox les autres metax sormonte N’est il de nul chevalier conte Ki ait bones taces fors vous Moult par devés estre joiox Ki tant avés honor et pris Que neïs a vos anemis En couvient bien par force dire Je meïsmes en ai grant ire De çou que onques porcaçai Ceste bataille que jou ai Si nel di jou pas por doutance Mais qui destorne et desavance Chevalier si bien entecié S’en doit estre forment irié » Des lances les trois grosses prent Et les autres au vallet rent Si li prie forment et dit Que de soie part li mercit Gavain de son rice present Et se ratort delivrement Et mont et relaist sa ventaille Et si reviengne a sa bataille Grant cose a en faire l’estuet Car nus d’ax laiscier ne le puet Sans blasme, des qu’i l’ont enpris Li vallés s’en revint pensis Ki de Gavain grant paour a Et Gavains se raparella Moult furent anbedoi vassal Cascuns lait corre le ceval Et se fierent en mi les pis Des lances, si que les esclis En volent en haut et en loins Car il froiscierent dusqu’es poins Puis a cascuns une autre prise Et se ferirent en tel guise Des lances desox les mameles Qu’anbedex volent en asteles Au daerain prist Escanors Sa grant lance, c’ert ses trasors Et son estoi que il ot fait De li quide il entresait Por çou que valoit autres quatre Par sa force Gavain abatre Et Gavains la soie reprent Si laiscent corre vistement Li uns vers l’autre le destrier Escanors le feri premier Por le longor que sa lance ot Mais onques froiscier ne le pot N’il ne pot abatre Gavain Si en fu moult de corox plain Et Gavains se tint si tres bien Onques ne desgrea de rien Ains li est volee des poins En mi le pré la lance loins Si qu’el caï sor un boison Gavains le feri a bandon Desous le boucle de l’escu Qu’estroé li a et fendu Si que sa lance peçoia Onques de point ne desgrea Vistement ont lor tor repris Et s’entrevienent vis a vis Quant Gavains ot traite l’espee Vistement vint a la meslee Sel fiert par mi le hiame amont Et cil si tres bien li respont Que Gavains moult s’en mevella Moult par fu dure et moult dura La bataille des dous vassax Des escus, des cors, des cevax Se sont mainte fois encontré Mais il erent si bien armé Et lor auberc si fort estoient Ke peu mesfaire se pooient A monsegnor Gavain avint A une fois que a lui vint Por lui grever et asaillir Qu’il le feri par tel aïr Amont sor le hiaume luisant Que contreval glaça le brant Si descendi desor l’escu Des qu’en la boucle l’a fendu Si qu’il n’en pot son brant ravoir Et cil par force et par pooir Se parti tantost de Gavain Se li fist voler de la main La bone espee que il tint Dont a Gavain grant ire avint S e Gavains douta la meslee Quant il ot perdue s’espee Nus hom ne s’en doit mervellier Il esperone le destrier Par devant Escanor se lance Et saisi vistement la lance Qui ert caüe a Escanor Il ne le dounast por tout l’or Qui soit desi en Antioce Le bon destrier ariere broce Si retorne a loi de hardi Por requerre son anemi Endementiers qu’il le requiert Se porpensa se il le fiert Sor le hiame u sor l’escu A ce qu’il a si grant vertu Que sa lance peçoiera U que des puins li volera Si n’ert ja, conment qu’il en ciee Que durement ne l’en mesciee Car a escient set et voit Se sa lance perdue avoit Qu’il ne porroit arme trouver A desfendre u a prover Dont il peüst faire nul bien Lors se porpense d’une rien Qu’il ne li puet faire nul mal S’il ne fiert par mi le ceval Lors esperone le destrier Et cil qui tint le branc d’acier L’a moult fierement atendu Gavains a le ceval feru A l’encontrer par mi le pis Si que li fers en est saillis Par mi le senestre costé Lors s’est d’Escanor acosté Au caoir que li cevax fist Par le bort de l’escu le prist Si li a del col erracié Si en a son brant fors sacié Moult fu cil iriés, quant il voit Son ceval mort et lui caoit Moult vistement en piés resaut « Gavains, dist il, por cest asaut Ne sui je pas ne mors ne pris Si en estes de vostre pris Vers moi durement enpirié O moi serés parex a pié Se le brant d’acier ne me faut » Gavains set bien se il l’assaut A ce qu’il est et grant et fort Ja li ara son ceval mort Mix le veut il requerre a pié Car durement seroit irié S’il veoit mort le Gringalet Poignant s’en vint a son vaslet Tout de son gré est descendu Son ceval li baille et l’escu Qu’il ot a Escanor toloit Puis revint arriere tout droit El pré u Escanors l’atent Et cil plus de demi arpent Vait encontre les menus saus La veïsciés moult durs assaus Menuement reconmencier Et sous les espees d’acier Fauser moult souvent les haubers Tout devienent vermax les fers Qui plus erent blanc d’une flor La peüsciés moult dur estor Entre les dex vassax veoir Car saciés de tout son pooir Grieve li uns l’autre et enconbre Li damoisiax qui ert en l’onbre Et les puceles font grant duel « Lasse, fait cascune, mon wel Seroie jou orendroit morte » A mervelle se desconforte Cele qu’Escanors amena Por le grant paour que ele a Caï a la terre pasmee Et quant ele fu relevee Si conmença un duel a faire Conme de crier et de braire « Lasse, fait el, maleüree Se je en estrange contree Pert sifaitierement ensi Mon soulas, mon cuer, mon ami Dont i ving jou en mal endroit J’ai oï dire, et si est droit Que de sorfait ne vint nus biens Li tors est mon ami et miens Car il estoit en son païs Rices manans et poëstis Et jou de tout bien aaisie Si fui par sorfait envoie Toute seule a le cort le roi Puis vint mes amis aprés moi Prendre moi, voiant maint baron Por avoir raisnable ocoison De conbatre soi a Gavain Il cuidoit estre bien certain Se il Gavain vaintre peüst Que en tout le siecle n’eüst Chevalier qui l’osast atendre » Li dex celi n’est mie mendre A la pucele o le cief bloi Que moult avoit corox en soi Que Gavains prist el cimentire « Lasse, fait el, ne sai que dire Se je en tel guise pert ci Le bon chevalier, le hardi Qui m’a jetee de tel painne Et qui a tel honor me mainne Ensanble o lui en sa contree Lasse, dolante, et esgaree Remandrai ci a grant martyre » Et li damoisiax par grant ire Ront ses caviax et crie et brait Onques si grant duel ne fu fait Par seul trois gens com il demainent Et li doi chevalier se painent D’ex ocirre, c’est grant damage Mais Gavains a grant avantage Por l’escu qui au col li pent Et neporquant bien se deffent Escanors qui nel doute mie Par sanblant, vaillant une alie Gavains irïement li vint De la bone espee qu’il tint Desus le hiaume le feri Si qu’il li trenca et fendi Tox les las, que les lui el pré Est le hiaume en tere volé Puis le refiert tout derecief Cil se deffent a moult grant grief Et neporquant tel coup li done Sor le hiaume, que tout l’estone Si que li caus est descendus Si durement desor l’escu Qu’il l’i abati dusqu’au heut Escanors qui forment se deut Et qui mais ne s’a dont deffendre Merci li crie et se veut rendre Mais Gavains ne le veut recoivre Qu’il crient qu’il nel veulle deçoivre Por çou qu’il li ert mescaoit Et crient se de lui revenoit El desus, que ne l’oceïst Por çou que sa mere li dist Que ja ne doutast se lui non Ce l’en a mis en soupeçon Et tant le het dedens son cuer K’il ne souferroit a nul fuer K’il li escapast vif ne sain Lors le feri trestout de plain A descouvert par mi le vis Par desus les ex en a pris Tout le nés et l’une des faces Del caup i parurent les traces Des qu’es espaules l’a fendu A cel caup l’a mort abatu Lors i vint le vaslet pognant Et cele, grant joie menant Que Gavains o lui amena Et cele grant duel demena Qu’Escanors avoit amenee Mais que Gavains l’a confortee Ki por li corut erranment Moult par li prie doucement Qu’ele l’oublit si se confort « Bele, fait il, se je l’ai mort Ne me doit estre en mal retrait Car ç’a esté par son sorfait Ki vous esmut de sa contree Por porcacier ceste mesllee Mais de çou soiiés toute certe Bien vous restoerai la perte Se volés croire mon consel De nule rien ne me mervel Se vous avés ire et pesance Mais de ce soiiés a fiance Que je vous en menrai o moi A grant joie a la cort le roi Si i arés a grant honor A vostre cois dru u segnor Le quel que vous vaurés eslire — Sire, dist el, n’i a que dire Fait ert vostre conmandement Quant en vostre merci me rent Faites ent tant a cief de tor Que prou i aie et vous honor » Lors s’aparellent de l’errer La damoisele fait monter Que Gavains o lui amena Sor un bon palefroi qu’ele a Gavains monta sor son destrier Et le vaslet, qui ert legier Et qui moult volentiers le fist Le damoisele Escanor prist De devant lui sor le roncin A tant se mettent au cemin Lors le mena le damoisel Herbegier au premier castel U il orent ostel moult rice Car li sire n’estoit pas nice Qui d’ex grant joie demena Por le vaslet quis amena Si rot grant joie de Gavain Le chevalier n’ert pas vilain Ki fist au matin atorner Quant il vit qu’il durent monter Un palefroi moult ricement Tout en ert fres l’acesmement Li lorains, li frains et la sele Sel dona a la damoisele Que cil portoit sor le roncin A tant se mettent au cemin Or oirre moult Gavains plus bel Qu’o lui porte le damoisel Son escu, son elme et sa lance Gavains, qui de l’errer s’avance Tant crut et hasta sa jornee Qu’il aproca de sa contree Une gaudine aprés un bruel Trespassa, tant que de Carduel A set petites liues vint Une aventure li avint Ileuc, que je ne doi pas taire Car il oï crier et braire Une pucele a grant besoing Et ert en la forest si loing K’a grant paine en oï le cri « Vaslet, fait il, as tu oï Que j’ai oï ? » Et cil respont Et les damoiseles si font Qu’eles l’ont pieça entendu Et Gavains a lors respondu « Par foi, fait il, je ne lairoie Por rien el monde que je voie Que je n’aille a li por savoir Quele ocoison el puet avoir De plourer qui si se demente Et je quit bien que ceste sente Me menra trestout droit a li Vallet, et tu m’atendes ci Entre toi et ces damoiseles Tant que je sace ces noveles Por quoi ele est en tel esmai Et quant je le voir en sarai Je revenrai ici tout droit Et saces que c’ert orendroit S’autre ocoison ne me detient Biax amis, et se ce avient Que je tele aventure truisse Que bien tost revenir ne puisse Trestout ce grant cemin tenras Droit a Carduel, et si diras A la roïne de par moi Que ces puceles li envoi Et si li di de moie part Que por le moie amor les gart Et bel les apiaut et honort Tant que je venrai a la cort Et s’el te demande nouveles Ne de toi, ne des damoiseles Qui ele sont, bien porras dire — Volentiers, fait li vaslés, sire Ja de mot menti ne l’en ert » Et Gavains des esperons fiert Le Gringalet cele part droit U la pucele oïe avoit Quant il ot une piece alé Et il ot un tertre avalé Si a la pucele veüe De la robe qu’ele ot vestue Ki tant ert avenant et bele De son lorain et de sa sele Del palefroi qui si ert rice Si com le conte le m’afice Ki plus ert blanc que nule flor De son frain et son ator Ki trestout vauroit deviser Et bien i vauroit aviser N’a si bon clerc dusqu’a Paris Ja tant n’i metroit son avis K’il en deïst por nule painne Tout le voir en une semainne K’il n’i trespassast quoi que soit Mesire Gavains tres bien voit Que nus hom ne li faisoit mal Il esperone le ceval Si est venus tout droit a li « Cil Dix, fait il, qui ne menti Bele, vous doinst joie et honor L’ocoison de vostre dolor Por quoi vous faites dol si grant Vous requier et pri et demant Ke me dites, s’il ne vous poise » Cele qui ert france et cortoise Li respont, « Sire, volentiers Sire, fait ele, uns chevaliers Biax et prox et cortois et sage Ki m’amena en cest boscage M’amoit par amors et je lui L’ocoison de mon grant anui Vous conterai, jewi matin Quant nous alion ce cemin Entre moi et mon ami cier Si oïmes un duel moult fier K’une pucele demenot Ensi le fist, ensi li plot Que en cel cemin me laisça Le bai de Gascogne eslaisça Por aler l’aventure querre En ceste piece ci de terre Me rouva que je l’atendisse Mais ains que de li departisse Me bailla un sien esprevier K’il amoit plus et tenoit cier Que rien en cest siecle vivant Bien savoie qu’il l’amoit tant Com il pooit plus amer rien Fors seul mon cors, si me dist bien Que sor toute rien li gardasse Et jou conme caitive et lasse De grant folie m’entremis L’esprevier a disner enpris Ki d’oisiax moult petit savoie Endementiers que jel paisçoie D’un oiselet qu’il avoit pris Li espreviers, qui ert assis Sor mon puig, si m’est escapés Mes amis en sera dervés Quant il venra, si sui traïe Par mescaance et par folie Jel counois tant a orgellox A felon et a estorçox Que je dout que ja mais ne m’aint Et je n’ai ki l’oisel reclaint S’uns autres ne s’en entremet » Et Gavains li dist et pramet Que son esprevier li rendra Ne de li ne se partira Desi qu’ele en soit resaisie La damoisele l’en mercie Qui de la pramesse a grant joie « Sire, fait el, Dix vous en cie Ke l’esprevier puisciés reprendre Car se vous le me poés rendre Dont m’arés vous toute garie N’il n’ert ja mais jor de ma vie Que seul del dire ne vous aim — Bailliés moi, fait il, le reclaim S’irai l’esprevier apeler » Moult s’entremet du reclamer L’oisel, qui siet el caisne haut Mais nule cose ne li vaut Car il ne fait sanblant ne ciere Il vait avant et puis ariere Mais tout içou ne li vaut rien Et de çou li va auques bien Que l’esprevier pas ne s’eslongne K’il est ataciés a la longne Quant il voit que rien ne li monte Moult vistement el caisne monte Ne mais qu’il fu ains dearmés Quant il fu u caisne montés A tant es vous le chevalier Les armes vit, et le destrier Si a demandé qui il sont « Au mellor chevalier del mont Fait la pucele, et au plus prox Bien les en os aatir tox Fors vous seul, que je n’i met pas » Conté li a eneslespas Com il l’avoit ileuc trouvee Seule, pensive et esplouree Por la perte de l’esprevier Lors li respont le chevalier « Pute, fait il, vous i mentés N’est pas l’afaire issi alés Moult va autrement la besoigne Je sai moult bien com cil s’eslongne Qui sa barate veut couvrir Cuidés me vous por fol tenir Et mencoigne prover a voir ? Je puis a escient savoir Car maintes fois l’ai esprové Ke moult a tost fenme trouvé Qu’ele doit dire a son besoing » Por mon conte que je n’aloing Ne veul lor barate descrire Assés m’en avés oï dire En autres lius, si m’en tairai Mais li chevaliers sans delai Prist le palefroi par le frain Et le ceval a l’autre main Que Gavains avoit amené Puis est vers celi retorné Et li dist qu’en sa conpaignie N’iert el ja mais jor de sa vie Iluec le laira toute seule Ja mais nel servira de boule Trop l’en a servi longement N’onques mais si apertement Son barat ne seut ne ne vit Et mesire Gavains li dit « Sire, dist il, ne cuidiés mie Que jou por vostre vilenie Venisce ça, n’onques n’avint Onques seulement ne me vint En corage ni en porpens Ja n’arai tant perdu de sens Que jou tel outrage requiere Or oiiés de çou ma proiiere Ke en prengiés mon escondit Et je juerai sans respit Quant vous plaira, moult volentiers Moi vintisme de chevaliers Ke je vostre honte ne quis Ne jou parole ne li dis Se vous l’aviiés toute oïe Dont el fust par vous enhaïe » Et li chevaliers li a dit « Ja n’en prendrai vostre escondit Moult pris poi vostre sairement Je sai moult bien conment cil ment Que de tel barate s’essoigne » A tant o les cevax s’eslongne Si qu’il ne sorent qu’il devint Et mesire Gavains revint A la damoisele au cler vis Quant il ot l’esprevier repris Si l’a doucement confortee « Or ne soiiés mie effree Ma damoisele, fait icil Qui d’autres homes valoit mil Por amor, honor et francise çou saciés bien que sans faintise Avrés mon consel et m’aïe Ne ja mais nul jor de ma vie Ne vous gerpira duqu’a tant Que ce soit par vostre conmant Por aventure qui m’aviegne — Sire, fait el, Dix vous maintiegne Et gart d’autre mesaventure Car saciés de ceste aventure Ai je grant ire et grant dolor ar por bien faire et por honor ous est issi mesavenu Vous n’estiés a moi venu Fors por moi conforter de m’ire — Bele, fait il, n’i a que dire Del desconforter n’i a rien Une fois mal et autre bien Couvient a prodome avenir Ne ja ne li doit souvenir S’il puet autre fois honor faire Que por çou s’en doie retraire » Quant Gavains ot prises ses armes Qui gisoient desox les carmes D’iluec s’en part, plus ne sejorne O la damoisele s’en torne Ne set quel part ne en quel tere Aventure veut aler querre Si ne set ne conment ne queles Mis volentiers les queïst teles S’il onques faire le peüst Que il l’aventure seüst U le chevalier est alé Ki son ceval en a mené De ce est en moult grant porpens Lors conmença uns si lais tens De noif et de pluie et de gresle Ki tout caoient pelle et mesle Tounoille, foudre et espars Ki caoient de toutes pars Si qu’il ne set que faire puiscent Ne de quel part plus pres il truiscent Castel ne borc ne herbegage Car seulement un ermitage N’a il en toute le forest « Sire, dist ele, si vous plest Je vi orains sor cest cemin Par u je ving jeui matin Pres de ci une crois couverte Et se nous poions sans perte Desi a le crois parvenir Encor porrions bien garir A l’aïe del creator — Bele, fait il, il n’i a tor Fors de l’aler delivrement » A la crois vinrent erranment Si s’i mucierent anbedui Moult i soufrirent grant anui Entre la pucele et Gavain Car toute nuit dusqu’au demain Dura cele tormente isi Ne nus d’ex d’ileuques n’isi N’il n’i mangierent ne ne burent A la nue terre se jurent N’il n’i orent nule rien plus Je ne vous di rien du sorplus S’il i orent autre delit Mais itant vous di que lor lit Fu moult durs et mesaaisiés L’orés, qui n’ert pas acoisiés Lor fist grant mal et grant contraire Et Gavains, qui ne pot plus faire A la pucele de soulas Le tint toute nuit en ses bras Si que il jut devers l’oré Et si tint son escu doré Detriés son dos por le tormente Ki si le destraint et tormente Et si a l’esprevier assis Que il avoit u caisne pris Amont sor le las de la crois Si orent cavé un destois K’il n’i orent autre cousin En tel guise dusqu’au matin Soufrirent, et quant il fu jor Par le plaisir au creator Si fist bel tans et cler et pur Et li niés au bon roi Artur Fu forment iriés et pensis Moult par se tint a entrepris De la pucele qui fain a C’est li tiers jors que ne menja N’il n’en puet prendre nul conroi Mais la grant paour et l’effroi K’ele a eü du grant orage Li taut de mengier le corage Se qu’ele a le fain oubliee « Bele, fait il, que vous agree Que vous plaist il que nous façons ? Ja consel ne secors n’arons Por demorer ci en cest bois — Sire, fait ele, a vostre cois Je ferai tout vostre plaiscir Mais je ne sai le quel coisir Le sejorner u le mouvoir Car nous n’avons nul estovoir Par quoi nous puisçons sejorner Et tel mal me fera l’esrer Que je ne sai le quel en prendre — Pucele, fait il, a l’atendre Voi jou nostre grant enconbrier » A tant es vous un cevalier Qui le cemin venoit vers ex Li chevaliers n’ert mie sex Qui bien paroit pro et vassal Ains faisoit mener un ceval A un escuier devant lui Ensanble le virent andui Entre Gavains et la pucele Et il wida tantost la sele Del palefroi, quant il les vit A soi meïsme l’avoit dit K’il ont d’aïe grant mestier Et si pense que d’ax aidier Por çou qu’il sanlent bone gent Seroit moult grant afaitement Et c’on lor face aucun secors Vers eus torna trestout le cors A l’ançois que il onques puet Et mesire Gavains s’esmuet Et la pucele, contre lui Si le saluent anbedui Cil bonement les resalue « Biax sire, de vostre venue Fait Gavains, nous ert grans mestiers — Dites moi, fait li chevaliers Si vous plaist, conment vous errés Ki vous estes et dont venés Et u avés anuit geü Et s’avés mengié ne beü Puis qu’entrastes en la forest Et si me dites, se vous plest U vous aves enpris ceste oirre » Et Gavains li respint en oirre Si li a ensi raconté Com je vous ai ici conté Et cil qui bien fu ensegniés S’est de la mervelle segniés Que si lor est mesavenu « Des que je sui a vous venu Et vous m’avés conté vostre estre De mix, fait il, vous en doit estre Je vous aiderai se je puis Mais un don vous demant et ruis Ançois que vous aiiés men don Que me dongniés un gueredon Au jor que je demanderai » Et Gavains dist, « Jel vous donrai Volentiers a vostre plaiscir Ne mais que jel puisce aramir » Cil li a dit, « Ne cuidiés mie Que je face tel vilonie Que je don vous demant por rien Que ne puisciés aramir bien Que ce seroit trop grant forfait » Et Gavains dist, « Dont ert il fait Quant vous issi le demandés » Et cil dist, « Dont me conmandés Tout en travers vostre plaisir Cel mien ceval poés saisir Aveuc vostre oex, car jel vous doig Bien ai veü vostre besoing Dont vous estes moult esmaiiés Por çou me plaist que vous l’aiiés Et veul que ceste damoisele Ki me sanle cortoise et bele Ait por le besoig que je voi De moie part ce palefroi Ensi com il est atornés Il m’ert moult bien gueredonés A mon besoig, et en liu mis Des que vous le m’avés promis Je ne vous en redout de rien » Et Gavains dist, « Vous dites bien Je vous en rent cinc cens mercis Ne devés pas estre escondis Quant si bel don m’avés doné K’il ne vous soit gueredoné Se j’en pooie en liu venir Vous i porrés bien avenir » Fait soi li chevaliers par tans « Et je sai bien que a nul sens Ne remanra, se jel demant Que je n’aie mon couvenant Mais je requier, s’il ne dessiet A la pucele qui la siet Et vous, que j’en veul moult priier Que me doigniés cel esprevier Que je voi sor cel las seoir En atente de mix avoir Moult me sanleroit le don grant Savés por quoi jel vous demant ? Se je ja mais vous reveoie Et l’esprevier o moi avoie Par çou vous ramenberriiés K’un guerredon me deveriés Por çou le vous ai demandé » Et Gavains a lors conmandé A la pucele que li baut « Sire, fait il, se Dix me saut Se je peüsce autre conroi Por le grant bien que en vous voi Prendre de vous en nule guise G’i eüsce grant paine mise Mais saciés bien que je ne puis » Et Gavains dist, « Je ne vous ruis Nule riens plus que fait m’avés » Et cil li dist, « Vous ne savés Qui je sui, ne ja ne sarés Desi a tant que vous arés Pooir de mon guerredon rendre » Lors fist son escuier descendre Conme sages et bien apris Et quant il ot d’ex congié pris Si est montés sor son roncin Ariere trestout le cemin A par mi la forest tenu Ensi com il estoit venu Gavains a pris le palefroi U il avoit moult rice agroi Conme de lorain et de sele Si a montee la pucele Et il est u ceval montés Puis s’apensa des grans bontés Ke li chevaliers li a faites Par maintes fois les a retraites Et porpensees en son cuer Et si doute que en nul fuer Ce l’en a fait moult esmaiier Ne l’en puist a son gré paiier Ensi conme li est avis Et la damoisele au cler vis Est en grant joie et en grant hait Del secors que Dix li a fait Car moult estoient esmaiié Mais or sont il bien avoiié De bons cevax bien atorné Lors s’en sont ensanle torné Et oirrent une voie plaine Si com aventure les maine En tel guise com je vous di Oirrent dusqu’apres miedi K’il n’ont ne mengié ne beü Lors a .I. carbonnier veu Que il n’a gaires conneu Venir vers eux le grant chemin Deus asnes maine et .I. ronchin Si venoit mout grant aleure Gavains li demande a droiture Nouveles se il les savoit De quel part il trouveroit Plus prés hostel a herbegier Sire che dist le charbonnier Chi prés est la Rouge Chité Mais ne vous viengne a pensé Ne pour besoing ne pour destroit Que vous ailliés ja la endroit Qu’il y a .I. malvais trespas Gavains li dit isnel le pas Biaus amis dist il dites moi Quel li trespas est et de quoi Vous m’avés ainsi devisé Sire le Roi de la chité Est mout outrecuidiés et fier Si n’a nul si boin chevalier Des les pors dusqu’en Alemaigne Chi devant a une fontaine Le trouverés ja tout armé Car ainsi l’a acoustumé Les .IIII. jours de la semaine Vient tous, jours a chele fontaine Avoec li une puchele Onques homme ne vit si bele De li ne vous sai plus conter Mais qui bien seust deviser Tout son atour et sa biauté Dire peust en verité C’onques ne fu si bele femme Car ele est tant et bele et gente N’ot pas le quart de sa biauté Et sachiés bien de verité Quel le puchele iert en grant paine Car toute nue en le fontaine Qui mout estoit froide et obscure Veulle ou non jusc’a la chainture L’a fait entrer ens encor plus Si qu’il en pert, tout par le desus Le teste et toute le poitrine Plus blanche que n’est flor d’espine Ainsi est ilec toute jour En le fontaine a le froidour Ne ja hors de l’iaue n’istra Devant chou qu’il avesperra Dont s’en retrait et si remonte Il est nul si haut roi ne conte Se il parloit ne poi ne grant Qu’il ne morust des maintenant C’a lui le couvenroit combatre Et sachiés que .I. et quatre Se sont a li ja combatu Qu’il a tous ochis et vaincu Tout decopés et detrenchiés De chiaus et du pais plus prisiés Qui fussent en tout le regné Or sont si tuit espoenté Et tant en ont veu morir Qu’il n’en osent mais plait tenir Quant matés les a et vaincus Si fait fichier en peus agus Qu’il a fait fichier en estant Le chief et le hiaume luisant Il ne puet estre si prodom Qu’il ait ja autre raenchon Que li Rois l’a juré ainsi Et vous le verrés ja ichi Se vous alés en la chité Il ne puet estre trestourné Que n’ailliés par devant le Roy Biau Sire prenés bien le conroy De vostre vie garandir Se par yloec volés venir Vous morrés ja en fin sans faille Je n’en passerés sans bataille Se en parlés ne tant ne quant Et Gavains li dist maintenant Amis trop m’en avés conté A Dieu soiés vous commandé Mais itant sachiés bien de voir Que je irai la pour veoir Le puchele et le chevalier Chil qui a fait les peus drechier Seur le chemin par son orguel Si li dirai que savoir vel Si li plaist et vient a talent Son estre et son contenement Car mout volentiers le saroie A chest mot se met a la voie Si se parti du carbonier Tant esperonne le destrier Qu’il ot passee le montagne Lors a veue la fontaine Qui sist mout prés de le chité Et vit le chevalier armé Sor .I. destrier fort et hardis Onques en trestout le pais N’en ot .I. si trés bel veu Et sachiés bien que son escu Sanloit estre de cuir tané Mais tant fu fort et bien ouvré Que mout vous seroit fort a dire Car n’est pas legier a descrire S’armeure qui tant est riche Si com li contes nous afiche Il n’i ot seur le point de blanc Ains iert plus rouge que nul sanc Lanche roide grosse et quarree El fer devant bien acheree Espee fourbie et trenchant De coulor rouge flamboiant Et fu es estriers affichiés Es vous Gavains tout eslaissiés Si salue le damoisele Qui estoit a mervelle bele Puis li dist Monseigneur Gavain Qui de grant franchise fu plain Sire fait il pour quel meffait Faites a ma dame si lait Et si vielment le demenés Vassal se savoir le volés Dites liquele le vous die Et vous ferés grant courtoisie Se vous l’en poés geter hors Mais vostre vie et vostre cors Y couvient remanoir en gages Dist Gavains vous dites outrages Si vous convenroit adrechier Aler le veul ore prier Se il li plaist qu’ele me die Par amor et par courtoisie Pour quoi et des cant et comment Il vous fait souffrir chest torment Chest grant anui et cheste paine Chele qui iert en la fontaine Li respont Sire volentiers Sachiés bien que chis chevaliers Est Rois de la Rouge Chité Mais tant est fel et sorquidié Qu’il ne crient nul homme vivant L’autre an m’aloie deduiant Avoec li en .I. vergier Il dist qu’il n’avoit chevalier El roiaume le Roi Artur De chou iert il bien asseur Qu’il ne conquisist par bataille Et je li dis sans nule faille Comme chetive et mal senee Que on disoit en ma contree Que chil de le Tavle Roonde Erent tuit li mellor du monde Et Mesires me respondi Damoisele si com je qui Il n’i a nul meillor de moi Je di Sire je quit et croi De mellors en y a assés Mout est chil fol et sourquidiés Qui quide estre tout le mellor Et d’un roiaume et d’une honnor Il me respondi par afit Damoisele a mout grant despit Me tenés ore bien le sai Et de che mie ne m’esmai Car chou avons assés veu Sansons fortin qui tant preu fu Fu decheus par sa moullier Femme veut tous jours mix prisier Autrui que le sien par nature Vis li est qu’ele a la resture De trestous chiaus de la contree Si s’en tient mout a enganee Et s’il iert le melleur d’un ost Tant le honniroit ele plus tost Or sachiés bien de verité Trop avés le cuer escaufé Quant vous m’avés si despisié Si veul qu’i vous soit refroidié Pour che que vous m’avés blasmé Jusqu’a tant que aiés trouvé Qui me puisse d’armes oster Et par forche vaintre et mater Ou tout mors ochire, en bataille Iert seur vous prise si grant taille De le semaine .IIII. jours Vous ferai entrer voiant tous En le noire fontaine obscure Sans point de nule vesteure Serés ileuc tout en estant Dusques a soleil esconsant Loiaument le jur et plevis Et si mandés a vos amis Se vous vous i fiés de riens Car je quit et croi et sai bien S’aucun venoit par son desroi Qui vausist desraignier vers moi C’a tort vous faiche chest anui Se je vieng au dessus de lui Chest jugement est tous seus Que prés de vous en peus agus En ferai les testes fichier S’il en y venoit .I. millier Entre tant que la creature Qui iert en l’iaue a le froidure Parloit a Monseigneur Gavain Li Rois qui n’estoit pas vilain A le damoisele apelee Que Gavains avoit amenee Si li prie qu’ele li die Par amour et par courtoisie Qui est chest chevalier armé Qui tant est fol et sourquidié Qui est venus par estoutie Voiant moi parler a m’amie Mout grant talent ai de savoir De son estre trestout le voir Chele respont mout franchement Sire fait ele se Dix m’ament Je ne vous sai dire son non Ne le savés par mon chief non Comment va dont pour saint Thumas Chele li conte isnel le pas Com il l’avoit el, bois trouvee L’aventure li a contee Onques ne l’en deigna mentir A Gavain m’estuet revenir A qui chele de le fontaine Conte son anui et sa paine Qu’ele a plus de .III. ans soufferte Mais plus l’en poise, de le perte Des nobles chevaliers de pris Qu’il a par bataille conquis Et quant il les avoit vaincus Si fait fichier des peus agus Le teste y met o l’iaume cler Chi devant en voi .I. ester Ou il n’a encor riens fichié Ne mais qu’il y a apoié Che veés vous bien .I. escu Il fu au derrain vaincu Che saichiés bien chertainement Que li peus vostre teste atent Il atent qu’ele y soit fichié Si com le chose est prononchié Des qu’il iert yleuc ferus .I. autre pel iert embatus Delés cheli qui atendra Tant que .I. autre revenra Sire or sachiés de verité Que mon estre vous ai conté Se vous l’avés bien entendu Et Gavains li a respondu Gavains dist damoisele lors Issiés de le fontaine hors Par un couvenant que orrés Que vous jammais n’i enterrés Tant com je soie sains ne vis Ele a erraument ses dras pris Qui ierent prés de le fontaine Le chevalier a longue alaine Li escrie mout fierement Mar veistes chest parlement De che soiés trestout chertain Vassal chou li a dit Gavain Manechiés tant com vous plaira Je sui chil qui ja ne fuira Pour vous ne pour vostre manache Ains serai trouvés en le plache Tous appareilliés de deffendre S’est qui estour me veulle rendre Veés me chi tout apresté L’un d’eus a l’autre deffié Si s’alerent entreferir Tant com cheval les puet ramir Et fierent par mi les escus Grans cops des fers trenchans agus Que les escus perchent et croissent Les lanches esclichent et froissent Et si volerent en asteles Ains l’un d’aus ne se mut des seles Le Roi de la Rouge Chité Fu mout dolent et abosmé Quant voit qu’il ne l’ot abatu Il trait le boin branc esmolu Si fiert Gavain ireement Amont en l’iaume qui resplent Qu’il li fent jusqu’a capeler A poi qu’il ne le fist verser Mais bien se tint qu’il ne chai Et Gavains ra lui envai Si l’a si radement feru Amont au, plus haut de l’escu Que par le boucle l’a copé Et que du boin auberc saffré En a mil mailes abatues Le branc descent au cop qui rue Par entre l’archon et le Roi Le feutre et trestout l’aroi Li trencha tout rouondement Et le boin destrier ensement Si que li Rois est trebuchié Entre les deus tronchons a pié Mais mout fu tost en piés, saliz N’estoit pas des armes falis Puis dist vassal par saint Amant Chest cop ne fu mie d’enfant Ains ne m’ama ne ne tint chier Qui seur moi vint tel cop lanchier Mais quant de moi departirés Ja mar costre coupe en batrés Or soiés franc et afaitié Si descendés o moi a pié Se ne faites tant vous veul dire Vostre cheval ferés ochirre Si ferés mout plus que vilain Adont se pourpense Gavain Que de che li dist il bien voir Qu’il puet a enscient savoir A che qu’il est trop fort et fier Ja li ara mort son destrier Par tant descendi a le tere Si va son anemi requerre Mais chil si bien se deffendi Que Gavains tout s’en esbahi Qu’il li avoit tel cop donné Amont seur le hiaume gemé Qu’il en embati contreval Fleurs et bericle et esmal Desseur l’escu le cop descent L’escu jusqu’a le boucle fent Et le haubert lés le costé Est tout trenchié et decopé Dix fu bien a Gavain garant Qu’el poing tourna arrier le branc Si ne li fust el poing tourné Jusqu’el foye l’eust copé Chil l’a empaint de tel vertu C’a poi qu’il ne l’a abatu Mais Gavains pas ne s’en esmaie Quanqu’il li doit mout bien li paie Une envaye li a faite Seure li keurt l’espee traite Et chil l’a mout bien requelliz Mout par fu grans li fereis Qu’il font seur les hiaumes gemés Toute le gent de le chitez Il sont a grant eslais venu N’i remest jone ne chanu Homme ne femme droit ne tort Grant ne petit feble ne fort Qui aler puisse qu’il n’i voise En le chité ot mout grant noise Et grant bruit par toutes les rues Car les grans gens et les menues Clers et bourgois et chevaliers Dames pucheles esquiers Y keurent tous communaument Pour veir lor contenement Le campagne ont avironné Et li Rois lor a quemandé Si chier com cascuns a sa vie Qu’il n’i ait .I. seul qui mot die Pour riens qu’il oye ne qu’il voie Car a mes .II. mains l’ochirroie Ja ne seroit de tel renon Ne vaurroie que traison Fust a li faite plus qu’a moi Et je li jur bien et otroi Se il se puet de moi deffendre Ja ne li estuet garde prendre D’autrui ne soit ja en freour Grant paour ont de lor seignour Trestuit li baron du rengné Le Roy de la Rouge Chité Si dist a Monseignor Gavain Com chil qu’il n’estoit pas vilain Vassal fait il que vous est vis Contre le gent de mon pais Qui vienent ver le bataille Je vous afi et jur sans faille Ne soiés ja en nul effroi Que n’avés garde fors de moi Ychi pour nul meschaement Tous sui el dessus de ma gent Qu’il n’i a conte ne baron Qui pour le barbe du menton Ne pour le nés ne por le dent Trespassast mon commandement Et je vous ai asseuré Loiaument plevi et juré Gavains respont vostre merchi Couvrés vous dont je vous deffi Et je vous dist le chevalier Mais Gavains le feri premier Amont seur l’iaume rougoiant L’escu li trenche par devant Si qu’il li trencha les enarmes Et chil qui mout savoit des armes En paint son cop de tel vertu Que l’aubert a tout derompu Et trenchié par dessus l’aissiele Que rés a rés de le mamele Li trencha le char du costé Laidement fu le Roi navré Le sanc l’enkeurt a grant randon Aval dessi qu’a l’esperon Quant li Rois se senti blechié A grant merveille fu irié Mais ne fu pas espoventé Il tint le boin branc acheré Ou il se fie durement En li a pris son hardement Gavain feri de tel air Que tout en fait l’escu croissir Et le branc en fist enbraier En l’iaume jusqu’au chapeler Jusc’au tés li achiers n’areste De l’os li trenche de la teste Que mout iert trenchans l’alemele Mais ne toucha en la chervele Gavains a sentue le plaie Qui de riens nule ne s’esmaie Ains le requiert mout vassaument Et chil mout trés bien se deffent Bien escremissent ambedui Chil fiert Gavain et Gavains lui Et nepourquant tel cop li donne Seur le hiaume que tout l’estonne Et chelui a li referu Que le moitié de son escu Li trencha tout roondement Et de l’aubert .C. mailles prent Si que le branc est descendu Deseur le brach tout nu a nu Si l’a navré jusques a l’os Que le sanc en defile hors Que tout contreval le braihier L’en fait le sanc vermeil raier Mout sont fier andui li vassal Si se combatent par ingal Que nus qui le voir en veut dire N’en seust le meilleur eslire Li plus preuz ne li plus hardiz Plus enprenant ne alentis Fors tant que Monseigneur Gavain L’assaloit tous jours premerain Mout sont lor aubert derompu Et detrenchié sont lor escu Si que d’entier n’i avoit tant Qui lor peust estre garant A descouvert souvent se fierent Mout s’entreblechent et enpirent Ainsi dura cheste bataille De l’eure de tierche sans faille Dessi a soleil resconsant Ambedui ierent si vaillant Que nus ne puet l’autre grever Ne conquerre en camp ne mater Nepourquant mout trés bien l’assaut Gavains com chil a qui ne faut Proeche forche ne hardement Et chelui mout bien se deffent Qu’il ne doute pas par semblant Une seule frese vaillant Gavains fu durement irié Que la bataille a tant duré Seure li keurt par mout grant ire Laidement le bleche et empire Si l’a de tel air feru Seur le penne de son escu Si que le cop en vint glachant Seur le poing ou il tint le branc Est descendus li achiers frois Le pauch et .II. autres dois Li eust copé tot a net Mais tant vint l’espee a souhet Qu’il tenoient encore as, ners Du poing li vole en travers Le boine espee loing de lui Mout ot grant ire et grant anui Quant il se vit ainsi blechiés Par grant ire s’est efforchiés Et avoit saisie s’espee Et a sa guiche retournee Et prent l’espee a l’autre poing Si com li ensengne besoing Et keurt vers li plus que les saus La veissiez mout durs assaus Menuement recommenchier Chil fiert Gavain du branc d’achier Et Gavains a lui referu C’a poi qu’il ne l’a abatu Le Roy de son escu se keuvre Et chil Gavains son cop rekeuvre Et quida ferir de rekief A descouvert par mi le kief Mias chelui tint l’espee traite Une envaye, li a fait Dont Gavains deut estre grevé Se Dix ne l’en eust gardé Amont seur le hiaume d’achier Qu’il le couvint agenouillier Puis va Gavains par tel angousse Fiert son escu qu’il li defroisse Fiert et refiert tout abandon Vint cops li donne d’un randon Le hiaume esquartele touz Et le ventaille de dessous Li avoit hors du chief tiree Le teste li eust copee Mais chil qui se senti matés Li dist merchi vaincu m’avés Puis qu’il ne puet estre autrement Tenés m’espee je le vous rent Mais Gavains ne la rechut pas Ains en a juré saint Thumas A bien poi que ne vous ochi Ha ! Gentiex chevalier merchi Trop grant mesproison feriés Se vous hui mais m’ochiés Quant en vostre merchi me rent Gavains li a dit esraument Prison, vous couvient afier Et le matin sans demourer Entre vous et vostre puchele Qui est franche courtoise et bele Vous rendrés a le court le Roi Et si li dites de par moi Que de vous li fais un present Et a la Roine ensement Conterés tout le mellee Ainsi comme ele est alee A li et au boin Roy Artur Et chil respont a beneur Vostre plaisir en ferai tout Ja mar en serés en redout Que je mout volentiers n’i aille Le verité de le bataille Si com faite l’avés vers moi Conterai je mout bien au Roi Mais vostre non savoir vaurroie Que dirai je qui m’i envoie Quant a le court serai venu Biaus amis j’ai mon non perdu Je suis le chevalier sans non N’en sarai plus dit par foi non Ytant dites en cheste voie Que chil sans non vous y envoie Si vous apele, et honourt Tant que je reviengne a le court Dites bien que je revenrai Quant je men non trouvé arai Or me dites le vostre non Brun sans Pité m’apele on Rois sui de le Rouge Chité Vous n’estes de rien sournommé Fait Gavains che sachiés de voir Mais une cose poés savoir Anuit mais serés en repos Et quant li jours sera esclos Si ferés metre vostre sele Entre vous et vostre puchele Si com vous m’avés couvenant Et chil li affia errant Qu’il se rendra en sa prison Les gens qui furent environ Chevaliers bourgois vavassor Mout font grant deul de leur seignor Qui mout laidement iert navré Et vont tout droit a le chité Et Gavains dist qu’il s’en ira Et que plus ne sejornera A le damoisele quemande Qu’il trouva el bois en le lande Qu’ele mont sor son paleffroi Par foi chou li a dit le Roi Je vous pri requier par franchise Se il puet estre en nule guise Que vegniés o moi herbegier Tuit l’en prient, li chevalier Et le courtoise damoisele Qui mout iert avenans et bele Mais il lor dit que riens ne monte Il ne remaurroit pour nul conte Si les commande tous a Dé Et eux y ont lui quemandé Mais li Rois li jure et otroie Demain se metra a la voie Sans faire plus de demourer Gavains ne se veut plus targer A son droit chemin s’en retrait Et ot mout grant mestier d’entrait Pour ses plaies medeciner Chele ne finoit de plourer Qui aloit en se compagnie Il li dist bele douche amie Ne plourés pas je garrai bien Une chose sachiés vous bien Onques mais en tout mon aage Ne vi hom de tel vasselage Comme est chestui chevalier Je ne veul o lui herbegier Car chou n’iert pas drois ne raison Trop fessise grant mesprison Se je me herbegaisse o lui Car trop li ai fait grant anui Mais de tant sui je mout irié Que n’avés beu ne mengiés Ha ! Biau Sire, je n’ai pas fain Il n’a el monde si boin pain Dont je mengaisse orendroit pas Ainsi s’en vont plus que le pas Ne sai quel part querre aventure Mais les a coisi a droiture .I. chevalier armé et fort Qui .I. chevalier avoit mort Yleuc trestout nouvelement Encore en iert trestouz sanglent Son branc d’achier cler et fourbi Qui mout iert fort si com je qui Si le salue franchement Mais chelui mie ne li rent De son salu mais li escrie Vassal fait il n’en menrés mie La dame ainsi se Dix me saut Je vous ferai ja .I. assaut Que vous comperrés mout trés chier Dont estuet Gavains courouchier Puis s’entredeffient, et fierent As fers des lanches se requierent Andui de toutes lors vertus Qu’il depiechent tous lor escus Si s’entrefierent vassaument Chelui le fiert premierement Sus en l’iaume par tel air Que il en fait le fu salir Et Gavains a lui referu A descouvert seur son escu Qu’il l’a fendu dusques au foie Le destrier saut et va se voie Au travers par mi le forest A Gavain merveille desplest Car ne se sot pas conseillier Qu’il ne veut pas seule laissier Pour nul besoing le damoisele Le destrier traine la sele Fuiant s’en va mout effraés Et Gavains s’en est retournés Que le puchele n’ait paour Chele nuit dessi qu’a grant jour Ont trestous deuz el bos geu Et quant il ont le jour veu S’en sont d’ilec andui tourné Pour son escu qui fu usé Qui ne li puet avoir mestier A pris l’escu au chevalier Puis montent andui si s’en vont Trestoute jour chevauchié ont Dusques bien prés de miedi Et sachiés que il iert tierz di Qu’il n’orent mengié ne beu Lors ont .I. chevalier veu Armé moult bien et moult a droit Qui venoit vers ex trestout droit Li chevaliers lor dist en haut « Biax sire, fait il, Dix vous saut Et vostre bele conpaignie — Chevalier, Dix vous beneïe Fait Gavains et vous doinst honor Ensi ai erré toute jor Ne sai quel part, par aventure » Et cil respondi a droiture Ançois que il li laist plus dire « Dites moi, fait il, biax dox sire Vostre non, s’a plaisir vous vient S’il vous plaist, savoir me couvient Ki vous estes et dont venés Vous me sanlés gens esgarés Et qu’en cest bos avés geü Moult i avés anuit eü S’il est issi, mauvais ostel N’i eüstes ne pain ne sel Vin ne poisçon ne autre rien (Je m’en sui aperceüs bien) Que vous peüst mestier avoir Se vous eüsciés tout l’avoir C’onques eut le rice Soudain N’eüsciés vous por tout un pain Ne un tout seul hanap de vin — Vous estes, fait Gavains, devin Ensi nous est il avenu » Et cil qui ert a ex venu Li dist, « Frans chevaliers, itex Ne fu pas ersoir mes ostex Ains me vant bien k’une pucele La plus cortoise et la plus bele Qui soit desqu’au porce de Rome Et si est fille a si haut home Tant qu’ele est dame du castel Me fist ersoir tout le plus bel C’onques nul chevalier eüst Car nule rien qui me pleüst Ne me fu desdit ne veé — Moult fustes dont mix areé Fait li Gavains, que je ne fui Nous n’eümes ne ier ne wi Entre moi et ceste pucele Qui vausist pas une cenele De rien que on peüst mengier — Biax sire, fait le chevalier Je vous pramet bien et otroi Que ains que vous partés de moi Ja mar en serés esmaiiés Serés vous moult bien avoiiés D’avoir ostel et bel et cointe Je weul moult estre vostre acointe Et en vostre conmandement Mais or oiiés premierement Ançois que vous aiiés del mien Conment je vinc primes a bien Biax dox sire, il avint jadis Bien a passé cinc ans u sis Quant j’estoie encor jovencel Aprentis d’armes et novel Que je amai une pucele La plus cortoise et la plus bele Qui soit desi a Carlion Hardi me fist conme lion Amors qui en ses las me mist Cortois et enprenant me fist Tant que je le requis d’amor Pensis li mostrai ma clamor Au plus sagement que je poi Ele prisa mes dis moult poi Et se seut en moult grant despit Porquant si m’en quist un respit Et dist que s’en porpenseroit Et quant elle me reverroit Si m’en respondroit son plaisir Je ne voil pas longes soufrir Ains le revinc veoir par tens Et si li priai del porpens Et del respons qu’ele dut faire Conme cortoise et debonaire Me respondist sa volenté Quant je me fui moult dementé Et ma mesestance contee Ele ne fu pas esgaree De respondre raisnablement Et me prouva moult vistement A buens et a verais ses dis Ainc ne furent par moi desdis Car je vi bien que c’ert raison N’el ne querroit fors ocoison Par quoi je m’en fuisce tornés “Amis, dist el, se vous m’amés Et vostre parole est certaine Que por moi soiiés en tel paine Com vous m’avés dit et conté Dont sai je bien de verité Ke vous ne querrés par ma honte Il n’a fil a si rice conte En Gales ni en Engletere Ki m’osast proiier ne requerre Que je l’amasse en tel maniere Que je feïsse sa proiiere Ne qu’il eüst por nul porcas De moi ne joie ne soulas Neïs seulement d’un baisier Devant la qu’il fust chevalier Et se vous el me querriés Dont sai je bien que vauriiés Veoir ma honte apertement Mais je vous di seürement Que se vous estes chevalier Et je vous oi d’armes prissier Si que le pule bien en die Ke je devenrai vostre amie Ja mar en douterés de rien Aseürés en serés bien Ançois que vous partés de moi Par cest anelet de mon doi A ceste esmeraudete fine Vous fas de m’amor la saisine En tel guise com je devis Et si vous di, biax dox amis Que je vous fas tel convenant Ke vous ne me querrés avant Car saciés que par le sorplus Perderiés le mains et le plus ” Moult fui liés quant je tant en oi De li pris çou que prendre en poi Car l’anel del doi li saca Par l’anel l’amor atacai Et par le don qu’ele me fist Et la damoisele me dist Moult doucement, au departir Ke se je voloie joïr De li, ne de sa druerie Que d’orguel et de vilonnie Me gardaisce, et de tout sorfait Et je li dis que c’ert bien fait Quant ele l’avoit conmandé Et quant j’euc congié demandé Si m’en alai en mon païs Par mon pere et par mes amis Euc armes dedens la quinsainne Et saciés que je mis grant paine A porcacier pris et honor Tant fis que la gent de l’onor Et li jone et li cenu Distrent qu’il n’avoient veü Onques mais a un chevalier En tant de terme porcacier Si grant pris com j’avoie fait Je ne vous puis pas cascun fait Ne cascune ouvre raconter Mais bien vous os dire et conter Que j’en soufri maint grant ahan Et quant ce vint au cief de l’an S revinc a ma damoisele S li ramenbrai la querele E le couvent qu’ele me fist Et la damoisele me dist Que j’avoie trop entrepris N’estoie pas de si grant pris De tel los, ne de tel bonté Que je deüsce estre monté D’avoir la si tres tost conquise Et se je euc grant paine mise Le premier an, a querre pris Saciés de voir que je i mis En l’autre aprés tes quatre tans Et quant vint au cief de deus ans Si revinc a m’amie arriere Si li ramanbrai ma proiiere Et le convent qu’ele me fist Et la damoisele me dist Que je querroie grant sorfait N’avoie pas d’armes tant fait K’encor le deüsce requerre Le tierc an alai men pris querre Si que tout mon pooir i mis N’onques n’oï de nul païs Parler, ne de nule contree U il eüst nule asanlee De guere ne de tornoiier Que je n’i fusce le premier Por çou que g’i peüsce ataindre N’onques encor ne me soi faindre D’estre cortois et honerable Que vous feroie longe fable ? Tant fui dedens cel an prisiés Si cortois, et si envoisiés Si biax, et si prox, et si gens Et tant amés de toutes gens Par tout u j’ere couneü Encore est il moult bien seü Car la parole en ert trop grant Si fas que vilain qui m’en vant Mais por le voir que je vous cont De cief en cief le vous racont Si com l’aventure m’avint Et quant au cief de trois ans vint Si revinc arriere a m’amie Dis li que de sa druerie M’avoit saisi par un anel Si n’estoit pas seant ne bel Que plus le me contretenist Et la damoisele me dist Que je disoie bien raison N’i avoit que une acoison Que bien ne la deüsce avoir A escient pooit savoir Tant l’en avoit le monde dit N’i avoit mais nul contredit Que d’armes si grant pris n’eüsce Que par droit avoir le deüsce Mais encor i ot une essoine Puis me dist, “Ce vous en eslogne Une cose vous nuist vers moi La trecerie que je voi Par tout le monde conmunal Car tant sont trestout desloial Que cascuns qui a cief en trait Et de s’amie ses bons fait Je n’en voi nesun trestout sous Que des que il en est saoul Que tantost autre ne requiere ” Puis me dist qu’en itel maniere Ne me voloit el pas amer En travers me voloit clamer A estre siens s’ele estoit moie Ja de li saisine n’aroie Desi qu’ele en fust bien seüre Et je respondi a droiture Ja mar en douteroit de rien Je l’en aseüroie bien Par sairement u par fiance El dist que par tel seürtance Ne seroit el ja aseür Le neveu au bon roi Artu Gavain le prou et l’enseignié Ki tant est amé et prisié Voloit qu’en plege li livrasse Oiiés com el fu fole et lasse Et dolante et maleüree Car par trestoute la contree Ert seü qu’il estoit ocis Et je demaintenant li dis Qui dire pas ne li voloie Sa mort, que pas nel counissoie Si ne sai s’il me plegeroit Quant de rien ne me counisoit Quant Gavains oï ces noveles Du vallet et des damoiseles Li resouvint donques a primes “ Non fac jou, dist el, jou meïsmes Ki en plege le vous demant Quoi que je face a en avant Nel conois or fors d oïr dire Mais a tout le mont l’oï eslire Que c’est tot li mix enteciés Li plus loiax, li plus prisiés Li plus prox et li plus raisnable Qui soit de la Reonde Table Quant il est tant loiax et prox Et je l’oi aficer a tox Que nus ne l’ose contredire Nis cil qui de lui ont envire Ne s’osent de rien entremetre Bien m’os donc en son plege metre Se vous issi le me livrés Car se vos ne l’en delivrés Bien sai qu’il s’en deliverra Et vostre cors me liverra S’il vous ataint, volliés u non Car il est de si grant renon Si cortois et si bien apris Se vous avés vers moi mespris Ne entrepris de nule riens Tant est loiax que je sai bien Se par vous en plege l’avoie Et je me meïsce a la voie D’aler l’en a la cort semondre K’il m’en venroit çaiens repondre Et comme pleges contenir Et se il vous pooit tenir Par force tant vous destraindroit K’amender le vous covendroit En sa loiauté tant me fi Que jel recevrai bien de ci Je nel quier ja aler avant, ” Et je li dis, “ Jel vous creant, ” Qui bien savoie qu’il ert mort Ensi fumes a un acort Entre moi et ma damoisele Or fu ma parole plus bele Quant ele m’ot tel couvenant Ke vous iroie jou contant ? Ersoir premere fois m’avint Que ma besoigne a droit point vint Et que je jui ensanble o li » Et Gavains lors li respondi « Dites moi dont u vous alés Savoir weul, quant vous tant valés Et vous avés si bele amie Por quoi l’avés si tost guerpie » Cil li dist, « Jel vous dirai bien Veoir vois la plus bele rien Qui soit de ci desi qu’a Tors Priie l’ai lonc tans d’amors Si me doit wi cest jor respondre — Bien vous doit ore Dix confondre Fait Gavains, et si di que fox Car laidement avés or sax A la pucele son servise Vous l’avés nouvelment conquisse Et si l’avés trois ans proiie Et s’est la premiere foie K’ox en avés eü vos buens Si devés estre trestox suens Par le counvent que li feïstes Si qu’a vostre dit li meïstes En plege le Bon Chevalier Or alés un’autre proiier Ci ne voi je mot de raison Car vous n’avés nule ocoison Par quoi enhaïr le doiiés Por Diu vous pri que vous soiiés Vers la damoisele loiax Cil qui sont treceor et fax Vers celes qui ne lor meffont Fuscent or tout segnié el front Pleüst a Diu le tout poisçant Car il en a par le mont tant Qu’i font as loiax grant contraire » Et cil dist, « Qu’avés vous a faire De moi ne de ma damoisele ? Cele est tant avenans et bele Si cointe, et si noble, et si sage Et si est de si haut parage Qui me doit faire mon respons Ke trestout les plus haus barons Qui soient desi a la mer Metroient paine a li amer Li autre m’a tant travellié Tant en ai pensé et vellié Si m’a rendu mon gueredon Et el m’a de s’amor fait don Je l’ai moult tres bien deservie Car tant l’ai amé et servie Et tant ai a çou entendu Qu’el ne m’aroit oan rendu De mon service la moitié Et quant je ai tant esploitié Ke jou qui ai en painne esté En ai sor li la poesté De faire li corox avoir Li veul issi faire savoir L’anui que j’ai por li soufert Tel merite a qui issi sert » Gavains li dist, « Gentil franc honme Por tox les sains c’on prie a Rome N’entreprendre ja vers li tant Ains li tenés son convenant Si ferés bien et que cortois Il n’a sou ciel si rice rois Se il avoit vers li tant fait Que ce ne fust trop grant forfait Se il le deguerpissoit si » Et li chevaliers respondi « De nient vous oi entremetre Je ne vos en veul rien prometre Que moult bien tenir ne vous velle Il me plaist moult qu’ele s’en duelle Quant ele m’a tel anui fait Et ce est la some del plait Je n’en feroie rien por vous » Et Gavains dist, « Ce est l’estrox J’amai tant monsegnor Gavain Ke je feroie que vilain Se je soufroie qu’il eüst Reproce la u mes cors fust Ne se il a mort u a vie Estoit retés de vilenie Quant vous por raison ne por bien N’en volés faire nule rien Ne por moi qui tant vous en pri Une cose de voir vous di Quant vous volés tant entreprendre Il vous convient de moi deffendre » Et cil respont, « Or sui jou pris Moult m’avés de legier conquis Ki quidiés que je rien en face Ne por vous ne por vo manace » Que vous en diroie je plus ? Lors se traient un poi en sus Bien s’acesmerent les vassax Et laiscent corre les cevax Se se fierent par tel angousce Que l’une et l’autre lance frousce Mais quant li uns ot l’autre outré Il se sont si entrencontré Car il vinrent si radement Et se li livres ne me ment Il se sont si entreferus Des cevax, des cors, des escus Ke il et li ceval caïrent Et li chevalier sus salirent Tantost com Gavains sus sali Radement et bien asali Le chevalier, l’espee traite Tele envaïe li a faite Ke cil en est tox esmaiiés Neporquant bien li a paiiés De tox ses caus les gueredons Nes a pas receüs en dons Ains li a bien gueredonés Car tes set vins l’en a donés Dont uns autres moult s’esmaiast Ki en tel guise li paiast Neporquant mesire Gavain L’outra d’armes au daerain Si que cil ne se pot deffendre Mais quant il vaut s’espee rendre Mesire Gavains li dist lors Que ja s’espee ne son cors Ne recevra en tel maniere K’il ne vaut onques sa proiiere Orains por nule painne oïr Mais s’il a talent de joïr Ne de son cors ne de s’onor Tenir li convenra l’amor K’a la damoisele a pramisse Et se li dist qu’en itel guisse Conme lui et li convendroit Quant en sa prison li rendroit L’en feroit il la seürté Et cil qui ert d’armes outré Li respont, « Volentiers, biau sire — Dont vous couvient vostre non dire Fait Gavains, que savoir le veul Por conter ceste ouvre a Carduel » Et cil dist, « J’ai non Espinogre En tout le roiame de Logre Ne quidoie je pas trouver Ki me peüst d’armes outrer Et si est de Wi men sornon Or me dites le vostre non Et de quel terre estes venu Car s’il m’est issi avenu Ke hom qui ne soit de grant pris M’ait a armes vencu ne pris Por que m’amie dire l’oie Ja mais a nul jor n’arai joie Et s’il m’est issi encontré Ke miudre de moi m’ait outré Mendre en ert mon corox et m’ire — Je ne vous puis le mien non dire Fait Gavains, que je l’ai perdu Si ne sai qui le m’a tolu Or le me couvient aler querre Mais ne sai u ne en quel terre Si vous couvient o moi venir Et, se vous volés, contenir A mon plaiscir et a mon gré » Et cil li respont, « Jel vous gré Que jou irai moult volentiers Conme cil qui est vostre entiers Et que par droit avés conquis — Quant nous l’aron, fait Gavains, quis Et nous dex arons tant ouvré Que nous aron mon non trouvé Jel vous dirai eneslespas Et saciés bien, n’en doutés pas Jel vous met bien el couvenant Que je vous ferai entretant Se je puis, bele conpaignie Onques en toute vostre vie Chevalier tant ne se pena Plus bele ne la vous mena » Li chevaliers sans contredit Tout issi que Gavains ot dit A la parole creantee Et Gavains reçut lors s’espee Par le couvent que il ont fait K’il doit adrecier le meffait Si com li contes est contés Lors sont sor lor cevax montés Ki les ex erent estraiiers Puis les mena li chevaliers Au castel dont il ert partis Trestox et les fais et les dis A la damoisele conterent En quel guise il s’entrencontrerent Com cil sen conte li conta Et com li estris tant monta K’en la forest se conbatirent Et coment il s’entrabatirent Conme la concorde fu faite En itel guise les afaite Gavains, qui fist, sans demorer Ileuc au chevalier jurer Que ja mais en toute sa vie Par amor ne par drüerie N’amera fenme se li non Lors veut cele savoir son non Mais il li dist, « Ce ne puet estre » Car il set ja tant de sen estre K’il nel puet a nule rien dire Et cele li dist, « Biax dox sire Vous qui n’avés pas vostre non Bien sai que moult estes prodom Et que forment vous doi amer Bien sai, s’il m esteüst clamer A Gavain de cest chevalier Ke moult par fust men droit plenier Quant onques parler n’en oï N’onques mes amis ne joï De nule amor fors de la moie Ne mais qu’il ert entrés en voie D’aler une autre porcacier Or le m’a ci cest chevalier Por la soie amor ramené Tant l’a a armes demené K’il m’a çaiens son cors rendu Et si li a moult cier vendu Le fol pensé qu’il ot enpris Moult par est Gavains de grant pris S’en doit a Diu mercis et grés Ke tant est prissiés et amés » La pucele prist a droiture Ki grant joie a de l’aventure Lor escus, et ses fist descendre Puis fist ses vallés moult entendre A ex honerer et servir Grant painne mist a deservir La bonté que Gavains li fist Ki en aventure se mist Por faire li son dru avoir Le castel, l’ostel et l’avoir Li a tout mis en abandon Si li prie par gueredon K’il en face conme del suen Moult orent ostel bel et buen Et moult furent la nuit a aise Car quanque cuident que lor plaise Fu fait, qu’onques n’i ot essoigne Mais por mon conte que n’aloigne Ne voil aconter tox lor mes De beles cars, de poisçons fres Et de venisons et d’oisiax Dont li services fu moult biax Et d’autres mes a grant plenté Ki ci ne seront pas conté De vin de diverse maniere Mais plus valut la bele ciere Que la damoisele lor fist Ke le sien a bandon lor mist Q’a lor volenté en preïscent Ke quatorze mes ne feïscent Que vous iroie jou contant ? La damoisele lor fist tant Com el pot plus joie et honor Et l’endemain quant il fu jor Li doi chevalier se leverent Delivrement et bien s’armerent Puis se sont a la voie mis Et la damoisele au cler vis Cele qui ert o eus venue A o ex sa voie tenue Et lor oste a Diu conmanderent Arriere en la forest entrerent Par u il vinrent cele part Et se fortune nes depart Ja mes nul jor ne finiront Si com il dient, ains iront Amont et aval par la terre U qu’il soit le Gringalet querre Et quant il l’aront si bien quis K’il l’aront par armes conquis S’iront querre les damoiseles Celes qui discent les nouveles A Gavain qu’il estoit ocis Si ont devisé et enquis Aprés queront cex qui a tort Se sont vanté que il l’ont mort Et quant il trovés les aront Par armes lor contrediront C’onques mort ne reçut par ex Et si se conbatront as dex Et puis au tierc, s’il est trouvés Et quant il les ara prouvés Si dist que il Gavain querra Et que moult bien le trovera Car bien set qu’il est devenus Quant au plain furent revenus Devisant lor oirre et lor oeuvre Es vous que del bois lor descuevre Un chevalier en une lande Des le mer dusques en Islande N’en ert nus si bien atornés Rades, isniax et sejornés Ert li cevax u il seoit Li chevaliers pas ne veoit Les dous chevaliers qui venoient A mervelle li avenoient Toutes les armes qu’il portot Cauces de fer caucies ot Plus blances que n’est nus argens Et il ert biax et grans et gens Et bien paroit delivre et prox Et saciés que il ot desox Son hauberc un porpoint vestu Couvert d’un moult rice boufu Son hauberc ert safré menu Et si ert a plus cier tenu De tox çax qui veü l’avoient Que les cauces de fer n’estoient Moult ert fort et legier et cler Et si avoit cote a armer D’un paile de Constentinoble Et sa çainture ert cointe et noble K’il ot desus sa cote çainte Car s’amie ne s’ert pas fainte Ki envoie li avoit A faire les oeuvres a droit De caviax et d’or et de soie Anuis seroit, se je voloie Tout deviser de cief en cief Seul de l’elme qu’il ot el cief Et del cercle et de la visiere Sor le hiaume ot une baniere De ses armes moult bien taillie Que s’amie li ot baillie Et donee par drüerie Son ceval ert de Lonbardie Fort et isnel et tost alant Et saciés qu’il ot en talant S’il puet ses anemis trouver Que il vaura ja esprover Et veoir son rice corage Lors li fist son rice bernage Qui a bien le faisoit entendre L’escu par les enarmes prendre Si mist la lance sox l’aisele Et s’afica dedens la sele Puis a son ceval porficié Et saciés qu’il ot aficié Son col d’un cointe fremal d’or Et si avoit pendu un cor A son col dedens son escu L’escu de geules couvert fu A un lion ranpant d’ermine En sa grosse lance fraisnine Avoit un gonfanon pendant Si a çaint le plus rice brant De tout le roiame de Logre Entre Gavain et Espinogre Moult bonement esgardé l’ont Li chevaliers dont je vous cont Venoit grant joie demenant Et un sonnet d’amors cantant K’avoit nouvelement apris Lors a par les enarmes pris Son escu et sa lance ensanle En mi le camp, si com moi sanle A tout jeté par mautalent Et saciés qu’il ot en talent De conmencier un duel a faire Come de crier et de braire Et de ferir ses poins ensanle Si qu’a tox qui l’esgardent sanle Qu’il ait grant talent d’estre mort Sans ce qu’il eüst nul confort C’onme ne fenme li feïst Son escu et sa lance prist Si s’est estraint et porficié Si a son ceval eslaiscié Moult radement lance alongie Si a sa cançon conmencie Dont il avoit dous vers cantés « Est cil chevaliers encantés Fait Gavains, qui si se contient ? » Et cil la lance que il tient Et l’escu rejete a la terre « A ! las, fait il, tant je vois querre Ceste aventure a grant mescief » Ses dex conmence de requief Si fort que nul qui le veïst Ne fust que pitié n’en preïst Quant i l’ot longement mené A guise d’ome mal sené Tout de recief reprist ses armes L’escu saisi par les enarmes Si ra son ceval porficié Et le sonet qu’il ot laiscié Reconmença lués a canter « Bien me puis, fait Gavains, vanter Ke j’ai veü mainte aventure N’onques mais en ceste mesure Ne vi chevalier contenir Je ne me porroie tenir Que je n’aille a lui pour enquerre Dont il vient et que il va querre » Vers lui poignent par mi la lande Mesire Gavains li demande Mais qu’i l’ot salué ançois Conme debounaire et cortois Que il li die, se lui plaist Dont cele joie et ce duel naist K’i li voit ensanle mener Car il se porroit bien pener De querre tant com terre dure Ains qu’il trovast tele aventure Et por çou li requiert et prie Que l’acoison del duel li die Et de la joie qu’il demaine « Sire, fait il, por nule painne Qui ci me devroit acorer Ne poroie je demourer N’o vous tant longement ci estre Que dit vous eüsce mon estre Dont je vieg ne quel part je vois Car a un gué dehors ce bois Ki est plus de cinc lües loing M’estuet ja estre a grant besoig Mais itant de voir vous en di Se jou n’i sui ains mïedi Que jou arai le tout perdu Si vauroie estre mix feru De dous espix par mi le cors » Et Gavains li respondi lors « Sire, dist il, si vous plaissoit Je sui ci qui o vous iroit Cele part u vous iriiés Tant que devisé m’ariiés Et vostre duel et vostre joie Moult ai grant talent que je l’oie Por savoir cele grant mervelle » Et cil de dire s’aparelle Tout en alant, oiiés le conte Si com li chevaliers le conte « Sire, dist il, jadis avint Que ciés un grant rice home vint Un mien sires a cui jou ere Moult nous i fist on bele ciere Et moult eümes bel hostel Je n’uc onques puis autretel Ce saciés vous veraiement Et se je de rien vous en ment Si soie jou honis ancui Si vous di je bien que je sui Qui a vous m’en avou si fort En grant aventure de mort Moult fist li sire grant honor Et grant feste de mon segnor Et de cex qui vinrent o lui Quant vint au mengier, assis fui Ki du segnor estoie acointe O sa fille, ki moult fu cointe Et cortoise et bien acesmee N’avoit si bele en la contree J’ere adont chevalier nouvel Tant parlai seanmant et bel Et tant fu ma proiiere bele Et plaissans a la damoisele Ki de grant biauté ert garnie Que me dona sa drüerie Je le plevi et ele moi Que tox jors mais en bone foi Sans barat de fause traïne Durast nostre amors enterine Si qu’el n’ameroit se moi non Je li refis autretel don Que je fors li nen ameroie A escient jurer porroie K’encor dure l’amor ensi C’onques nus de nous n’en isci Ne ne fausa de couvenant En tel sens dura l’amors tant K’a une fois nous mesavint Je ne sai conment ce avint Dont ce sortit ne dont ce mut Ne mais sa mere s’aperçut Et qu’el sot bien qu’ele m’amot A grant mervelle li desplot Or l’a gardee si por moi Que ne peut puis prendre conroi Que je parlaisse ensanble a li Si a bien deus ans et demi Qu’ele est por moi issi gardee Or l’a requisse et demandee Uns rices hom de cest païs Par le consel de ses amis Et par le porcas d’un sien frere Li a creantee li pere Si l’en doit mener wi cest jor Et el en a si grant dolor A poi qu’ele n’est morte d’ire Mais el ne l’ose contredire Car son pere l’a conmandé Si m’a priveement mandé Qu’ele en ert wi cest jor menee La joie que j’ai demenee Que veïstes premierement Je vous di bien seurement Ke ce est por çou que jou sai Ke jou ja endroit le verrai Et le duel que je fac aprés Je le fac por çou que ja mes Ne le verrai, sin a tel ire Que jel ne porroie a rien dire Si vaudroie mix estre mort Et aprés si me reconfort Por seul itant que je bien sai Que jou ja endroit le ferai Si tres bien par devant ses ex Que nus nel porroit faire mix Car quant je verrai ja lor gent Je les ferrai si durement Et tant serai prox et seür Que nus fors le bon roi Artu Que je n’i met pas et Gavain, Si fas que fol et que vilain Qui m’en vant, mais itant vous di Que tant serai prox et hardi Que nul chevalier fors ces dex Ki a tant fust asanblé sex Nel feroit si bien por ses ix Ke jou nel face encore mix Si grant duel ai que cil l’en mainne Que nus ne porroit la grant painne Ne le fais d’armes endurer Tant conme je porrai durer Que je souferrai por li ja Si me plaist moult que le verra Car nus hom qui le devroit pendre Ne porroit, s’il n’amoit, enprendre Le fais d’armes que cil enprent Quant amors le tient et esprent L’autre duel que je fac aprés Se le fac grant je n’en puis mais Car j’ai un moult grief fais enpris Que chevaliers prox et hardis A aveuc le chevalier vint Ce me dist cil qui a moi vint Et qui l’uevre me reconta Et se me dist qu’il les conta A l’oiscir, ains qu’il partist d’ex Or sai de voir, quant je sui sex Et j’ai enpris si grant outrage Ke je porcas mon grant damage Encor me dist çou li mesages Ki moult estoit cortois et sages Que il les vit moult bien armés Or oiiés, se vous nel savés Por qu’il sont armé si tres bien C’on ne puet celer nule rien Ains est auques l’uevre seüe Que la damoisele est ma drue Et que je l’aim par drüerie Si doutent ma grant estoutie Por çou qu’il sevent que je l’aim Et por le droit que je i claim Se doutent, et ne gardent l’eure K’a un mal pas les core seure Bien en peüscent estre en dute Se j’eüsce une bone route Car tantost com je le veïsse Isi grant calenge i meïsse Que bien parust qu’ele fust moie Et ja soit çou que je seul soie Si vous di jou, conment qu’il ciee Ke ele ert moult bien calengie Si sai moult bien, quoi que jou die Que jou n’en souferroie mie N’onques ne fu nul chevalier Neïs Rollant et Olivier Ki peüst soufrir tel estor Que il n’en fust au cief del tor Se mervelle n’est, mort u pris Mais je l’ai en tel guise enpris Que c’est la fin, u j’en morrai U jou m’amie rescourrai — Espinogre, fait lors Gavain Moult est le chevalier vilain Et outragex, qui autre voit D’amor en si tres grant destroit Si nel secort a grant besoing — Sire, fait il, pas ne m’essoing Se vous en volés entremetre Que men pooir n’i wuelle metre Car je sui vostres par raison N’il n’i puet avoir ocoison De quanque vous vaurés enprendre Ke bien n’en welle mon fais prendre Ja n’en serai vers vous escis » Lors li ont anbedui pramis K’a cel besoig li aideront Et li chevaliers lor respont « Segnor, fait il, les vos mercis Se mes outrages vous ai dis Que j’ai enpris par ma sotie Conparer ne les devés mie Ne jou de çou ne vous requier Se jou mon grant outrage quier Dont jou ne me puis departir Ke vous pas i doiiés partir Car ce seroit moult grans damage Se nus de vous par mon outrage Que j’ai par ma folie enpris Ert de ceste oeuvre mort ne pris » Quant ç’oï monsegnor Gavain Qui de grant francisse estoit plain Lors l’en est moult grans pités prise Ke il set bien que par francise Les ensengne il et escuse Et lor secours por çou refuse K’il crient qu’o lui lor en mescie « Sire, font il, conment qu’il cie Quant nous l’avons issi enpris Nous en serons u mort u pris U nous vous rendrons vostre amie » Li chevaliers les en mercie Qui a mervelle s’esjoï De la pramesse qu’il oï « Segnor, fait il, Dix vous en oie Que rendre me pusciés ma joie Dont j’ai esté lonc tans en paine Cil qui d’onor faire se paine Dix li refait au cief del tor A son besoig joie et honor N’il n’ert ja tant desavoiiés Que il ne soit tost avoiés Car Dix le secort et avoie » Lors se sont tot mis a la voie Por aler en ceste besogne « Sire, se ja Dix bien me dogne Fait la damoisele a Gavain Il m’est prise si tres grant fain Ke me verrés ja erragier Se je n’ai moult tost a mangier Si vous di tot seürement Que se je n’ai delivrement Une piece de pain au mains Que je mengerai ja mes mains C’onques rien si grant fain nen ot » A Gavain mervelles desplot Quant il oï ceste novele Lors a dit a la damoisele « Bele, fait il, por Diu merci ! Nous ne porrions trouver ci Riens el monde por nul avoir Qui nous peüst mestier avoir Et vous savés que par raison Ne puet avoir nule ocoison K’il nous couvient andex aidier Orendroit a cel chevalier Car nous li avon couvenant Si ne seroit mie avenant Quant convenancié li avon K’a ce besoing li falison Ki ensi fali li aroit Des que le pule le saroit La reproce en seroit toudis Gardés que ne me soit de pis Et que n’i aie deshonor Por le francise et por l’onor Que vous avés en moi trové Tox jors vous seroit reprové Ceste ouvre, s’il estoit seü Ke vous li eüsciés neü Je vous pri qu’il ne vous desplaise Et que soufrés vostre mesaise Tant que ceste euvre soit passee — Je n’iere tant fole provee Fait ele, que je par mon gré Ceste parole si vous gré Et que je tox jors mix ne veulle Autrui anui, qui que s’en duelle Et cui qu’il desplaisse de rien Que je ne vauroie le mien Ne cuidiés pas que je me faigne Et que li fains ne me destragne Gregnor que je ne die encor Ki me donroit cinc cens mars d’or Por soufrir dusque vers midi Sor ma loiauté le vous di Ne porroie je soufrir mie Et ce sera grans vilenie Quant je sui ci en vostre garde Se g’i muir par vostre mesgarde Sire, fait ele, je vous di Que j’ai autrefois esté ci Si vi ci devant un castel Un petit outre ce vaucel Il n’i a pas liue et demie Onques en toute vostre vie De beles tors, de rices sales En Engleterre ni en Gales N’en veïstes seulement sis Qui si fuscent a droit assis » Mais j’ai aillors m’entente mise Que a dire vous la devise Si com cele le devisa Car ele dist et reconta Moult tres bien quanques ele i vit Et si li a conté et dit K’il siet dedens un plaisceïs Et que li castiax est garnis De quanque il couvient a prodome « Li asnes ciet par la sorsomme Fait Gavains, ç’ai oï retraire Mais or voi qu’il le m’estuet fare Et k’o vous aler m’en couvient Quant issi a plaiscir vous vient » Salemons dist en un sien livre Que cil n’est pas del tot delivre Ki conpaignie a fenme prent Que cil qu’ele tient et souprent Puis qu’il est soupris de s’amor Moult a de quoi faire clamor S’il avoit seul itant de cuer Qu’il s’en osast plaindre a nus fuer Mais nus ne s’en ose clamer Et cil qui plus couvient amer Et qui plus est d’amor en paine Et cil qui tox jors plus s’en painne De servir le a volenté Et plus en est entalenté Et plus lor fait bien et honor Plus s’en repent au cief de tor A autre ouvre li cuers me tire Revenir wel a ma matire Car assés ai de fenmes dit N’il n’i a mais nul contredit Qu’il en i ait se petit non Qui ne soient de tel renon « Espinogres, fait Gavains lors Or m’est bel ke avés deus cors Cascuns de vous en a un buen Sonés le vostre et il le suen Tant que on l’oie quatre mos Et je vous suirrai les galos Des que j’arai tant esploitié Ke la pucele ara mengié Mais ains m’estuet tant porcacier Que la pucele ait a mengier Ke jou face nule autre rien — Nous le veon, fait il, moult bien Que ne puet pas autrement estre » Lors tornent un peu a senestre Entre Gavain et la pucele Si errerent une sentele Tant qu’il sont au castel venu Ki n’ert pas clos de pel agu Mais de haut mur et de fossé Si ot un grant bos adossé Et un plaiseïs tout entor Ki clooit le baile et la tor Si qu’il n’i ot fors une entree La pucele est laiens entree Ki bien counisçoit le païs Et cil qui n’en ert pas naïs Ne nul honme n’i counissoit Entra par la porte tout droit Si ala vers le tor amont Tout a ceval passa le pont Sans ce que nul home veïst Ki de rien li contredeïst La pucele remest defors Et cil qui sans non estoit lors Entra tantost dedens la sale Un doublier qui n’ert mie sale Mais blanc que sor la glace nois Vit estendu desor un dois Une coupe ot desus d’or fin Toute plainne de moult bon vin Flans, gastiax, gaufres et pastés Poivre caut i vit et lardés Dedens une blance escuele Et si vit une damoisele Ki au disner estoit assise Et, se biauté puet sans francise Nule damoisele amender Dont se puet ele bien vanter C’onques Nature ne pot faire Plus bele, s’el fust debonaire Mais tant ert orgelloxe et cointe Que nus qui de lui fust acointe N’en peüst bien dire a nul fuer On aime le cors quant u cuer A cortoisie et loiauté Si vous di bien par verité K’en orguel a moult malvais oste Biautés qui a orguel s’acoste Est en maint liu toute perdue Et li chevaliers le salue Moult bonement, si li demande Que li doinse de sa viande « Or entendés, fait il, pucele La hors a une damoisele Tout a ceval en cele cort Et se on tost ne le secort Et on a mengier ne li porte Ja mais n’istra de cele porte Ains sera morte sans retor Ele esta devant cele tor Ele vous prie par francise Par guerredon et par servise Que vous m’aidés a cest besong — Sire, se je ja rien vous dong Dont soie je, fait el, honie Ains me sanle grant estoutie Si estes moult outrecuidié Quant vous seulement ce cuidiés Que je doie por vous rien faire N’estes pas de si grant afaire Que seul penser le deüsciés Malvais apel i eüsciés Se mes frere fuscent ci tox Dont jou ai set hardis et prox Mais il sont en cele forest — Pucele, fait il, si vous plest Ke je por un moult petit don Vous doie un bien grant gueredon Il ert moult bien gueredonés Se vous seulement me donés Un seul gastel et un pasté — N’ert pas issi le mien gasté Fait la pucele, par mon cief — Ja n’en venrés issi a cief Fait uns nains qui devant li sert On dist que ses paroles pert Souventes fois qui cort a ciens Ja n’esploiterés vers li riens Je connois moult bien sa maniere Par francise ne par proiiere Mais par orguel et par sorfait Erent tot vostre plaiscir fait Dites moi, qui en cort hantés N’est par orguel orguex dontés ? Metés orguel encontre orguel Jel vous lo ensi et sel weul Quant vous avés si grant besoig La viande n’est mie loig S’en poés a grant plenté prendre — On doit moult douter a mesprendre Et je crienbroie trop mesfaire Sel voloie si en pais faire Fait cil sans non, se je peüsce Que jou sen mal gré n’en eüsce — Ce n’iert, fait soi li nains, ja mes » Et il est lors alés plus prés Si prist un pasté et un pain Et un lardé a l’autre main Dont l’escuele ert toute plainne Et li nains par le frain l’en mainne A la pucele qui l’atent Et il la viande li rent Si li prie de soi haster Car n’ert loiscirs de sejorner Grans mestiers ert qu’il se hastast Et grans besoins que il alast A la rescouse au chevalier A cui il doit en oirre aidier Si com li a en couvenant Et cele li dist maintenant « Sire, dist el, se Dix me voie Je serai moult tost a la voie O vous, mais il m’estuet penser Ançois de ma vie tenser Dont j’ai en grant espreuve esté Cest mangier qui ert apresté M’a rendu a estrox la vie Nel tenés pas a vilonie De mes grans besoins amentoivre Il m’esteüst avoir a boire Je sui de si grant soi souprise Qui des jewi matin m’est prise Que je ne le puis endurer Si ne porroie pas durer Longement, se je ne bevoie Et j’ere moult tost a la voie O vous, des que j’ara beü » Lors est cil san non esmeü Que n’i estut autre proiiere Si revient en la sale arriere Puis vait au dois la coupe prendre Mais quant il i vaut la main tendre Cele qui ert au dois asisse A ains de lui la coupe prise Si li a moult fierement dit « On i meïst ja contredit Et u vin et en la viande Si cil qui sont en cele lande Et en cel bois en lor deduit Fuscent ens en la sale tuit Mais or m’avés sole trouvee Si avés sor moi esprovee Vostre proece, grant honor Vous est a faire deshonor A une seule damoisele » Et li nains par ire l’apele Si li dist, « Sire chevalier Ja n’arés de li sans dangier Vaillant un seul quartié de pain » Cil prist la coupe ens en sa main Vuelle u ne welle, si l’en porte Celi qui l’atent a la porte Et l’autre qui siet a la table Li dist, « N’estes pas bien raisnable Sire vassal, ne bien apris Qui ci avés sor mon pois pris Mon mengier, Se cil fust en vie Dont tout le monde avoit envie Por le bien qui en lui estoit J’en eüsce encor moult haut droit Ahi ! Mors, tant par es costoxe Felenesse et contralioxe Que ja n’espargneras prodome N’a damoisele duqu’a Rome Ne de la duques en Espaigne Ki esgaree n’en remagne Ahi ! ahi ! dist el, Gavain Ne fust pas traite de ma main Ma coupe, se vous fuisciés vis Ne mon mengier devant moi pris Je n’en eüsce nul regart Or n’est il mais qui nos drois gart Ne qui i mete contençon » Cil qui n’ot soig de sa tençon A au nain la coupe livree Et cele qui s’ert delivree Et de la viande et del vin Se rest o lui mise au cemin Il n’ont mie granment alé Puis qu’il ont le pont avalé K’il ont trouvé le chevalier Qui li ot doné le destrier A la crois, et le palefroi A tout le sele et tout l’agroi Dont il avoit moult grant besong Si tint l’esprevier sor son poing K’i li avoit ileuc donné Et si estoit si bien armé Et si a droit, qu’en nule terre Plus acesmé n’esteüst querre Il le salue, si li quiert Com cil qui a besoig le quiert C’or li rende le gueredon Et si li amentoit le don Dont li gueredons est deüs Et s’il n’est orendroit rendus Et il veut tant ne quant atendre Ja mais n’ara pooir de rendre « Si vous dirai, fait il, por quoi Ce castel est lassus tout quoi Il n’i a orendroit nului Qui faire vous peüst anui Li chevaliers de laiens tuit Sont en cel bos en lor deduit J’en sai tres gewi la novele Et laiens a uene pucele Dedens cel castel enfremee Que j’ai plus de trois ans amee Si vous pri que le me dounois — Par foi, fait il, ce est bien drois Que vous l’aiiés, se onques puis Et se je el castel le truis Ja m’en trouverés tout loial » Lors torne arriere le ceval Si revint arriere en le sale Et cele qui forment le male Par parole, et moult le maudit Li a moult estoutement dit Que mal i soit il retornés Et il est lors vers li alés Si l’a par le destre bras prise Puis si l’a devant lui asise Sor son ceval, puis si s’en torne En la sale plus ne sejorne Et cele qui tenrement pleure Le maldist, et si prie et eure Que Dix mal entente li doigne Et quant ele voit qu’ele esloigne Et qu’ele est ja hors de la porte A mervelle se desconforte Lors tort ses poins et brait et crie Et dist en haut, « Aïe ! aïe ! Lasse, fait el, tant Dix me het Ainmi lasse, que or nel set Mon frere le prox Codrovain ? Ahi ! ahi ! dist el, Gavain Tant avons de vous grant damage Ja ne fust pensé cest outrage Cest grant orguel et cest sorfait Ke cis chevaliers m’a ci fait Se vous fuisciés sain et delivre » Et il toutes voies le livre Et tent a celui qui tant l’ainme Et ele tot adés reclainme Et si afice çou et jure Que ja ceste grant desmesure Ne fust faite, se il vis fust Uns siens frere, qui a un fust Estoit lors afustés por traire Oï la damoisele braire A grant paine l’a tresoïe Et la pucele autre fois crie Il ne set quoi, car trop est loing Mais bien entent qu’el a besoing C’ert Codrovain qui reclamoit Et li chevaliers qui l’amoit Qui or la tient en sa baillie Li a dit, « Bele douce amie Je sui Ragidel de l’Angarde Et puis c’or estes en ma garde Moult en devés grant joie avoir A escient poés savoir Que je sui ci li vostre amis Ja m’avés vous tox jors pramis Que vous n’amiés rien fors moi Se on vous croit par vostre foi Que j’en ai de vostre main destre Dont en doi jou aseür estre » Quant la damoisele l’oï A mervelle s’en esjoï Dont a dit, « Sire chevalier A qui je veai mon mengier Je vous en doi gage en merci Et de ceste oeuvre vous merci Car moult m’avés a gré païe C’estoie or forment esmaïe Moult dolante et moult esgaree Car je quidoie estre livree A honme que je pas n’amasse Ja mais a nul jor ne manjasse S’il me fust issi avenu Bien soit cel chevalier venu Ki si m’a wi païe a gré Jou afi volentiers et gré Se lui plaist, que a vous me doigne Et si li proi qu’il me pardoigne Et que il pas ne prenge a pris çou que tant ai vers lui mespris — Bele, fait il, jel vous pardoig Mais tant i a que je vous doig A ce chevalier que vous tient Ma damoisele, et si couvient Que de çou que je vous ai fait Car je sai bien que j’ai mesfait Que me pardonés le mal gré — Sire, fait ele, jel vous gré » Ses frere qui oïe l’ot A l’ançois que il onques pot Est venus au castel poignant En la cort trova un sergant Si li demande qui faisoit La noise que oïe avoit Et cil sans nule demoree Li a la verité contee Onques ne l’en menti de riens « Or n’est mie cis païs miens Fait il, se il l’en mainne issi » Eranment d’une estable issi Moult vistement un sien vallet Si li tramist le Gringalet Si li mist le frain et le sele Puis monta en une torele Qui ert desus le maistre porte Moult delivrement li aporte Son escu, s’espee et sa lance Et il hors del baile se lance Des qu’il fut montés el destrier K’il estoit icel chevalier Qui laisça Gavain o s’amie U bois par sa grant jalousie Et qui lor cevax en mena De l’esploitier tant se pena Puis qu’il fu del castel isçus K’il a les chevaliers veüs Et les damoisseles ensanble Et se il ja nes desasanble Et il ne depart cele route Et desconfist vistement toute A çou qu’il est chevaliers buens Et li cris du païs est suens Il ne se prisse un angevin Cil sans non l’oï le cemin Venir poignant par mi un val Et quant il counut le ceval Que li chevaliers cevaucoit Onques isi grant joie n’ot D’angousce rien ne li enquiert Mais hardiement le requiert Et cil lait corre contre lui Si s’entrefierent anbedui Li chevalier le fiert avant El quartier de l’escu devant Que sa lance en asteles vole Com se ce fust une ventvole Cil sans non l’a aprés feru Desox le boucle de l’escu Com chil qui ne l’espargne point Que l’escu li a au bras goint Et le bras au costé li serre Tout estendu le porte a terre Puis a mis le main a l’espee La teste li eüst caupee Quant la damoisele li prie Et requiert que pas ne l’ocie « Sire, dist ele, ce m’est vis Que se vous l’aviiés ocis Ja mais nul jor joie n’aroie » Et li chevaliers li otrie Et dist qu’il fera tout son buen Par si que il face le suen « Sire, dist Codrovain le Rox Tant a prouece et bien en vox Francise et debounaireté Que ne devés estre reté De rien nule que m’aiiés fait Que ç’a esté par mon sorfait Et por çou otroi bien et gré A faire tout le vostre gré — Sire, dist il, vostre merci A ceste damoisele ci Vous pri c’ox pardounés vostre ire Et si vous veul encor plus dire Dont je vous veul forment priier Ke welliés que ce chevalier Ait par vostre otroi vostre suer Car il l’ainme de tout sen cuer Et je quit bien qu’ele aime lui Et si vous acordés andui Entre vous et la vostre amie Sans rancune et sans vilonnie Jel vous ofri des avant ier Quant je montai por l’esprevier Ke je sor sains vous juerroie Moult volentiers que je n’avoie A la pucele cose dite Se j’ere renclus u ermite Le plus saint et le plus prodome Ki soit de ci desi qu’a Rome Dont je fusce reté de rien — Je vous en croi, fait il, moult bien K’ains n’en fu mot par vous parlé » Ensi com il fu porparlé Et la cose fu devisce Fu la concorde creantee Lors a repris le Gringalet Cil sans non, qu’i n’i eüst ret Ja mais sans nule contençon Et se li fist del sien le don Si vous di je bien que li suens Estoit assés et biax et buens Si frere, qui le noise oïrent Tantost des esperons ferirent Si passerent tertres et vaus N’espargnent mie lor cevaus K’il n’ont pas trouvés lens ne frains Ains esperonent qui ains ains Puis ont demandees noveles Ançois qu’il otascent les seles A un vaslet qu’il ont trouvé Cil a qui il l’orent rouvé Lor dist ensi com il avinrent Et il lors en la sale vinrent Si ont lor armes demandees Cil qui el furent conmandees Lor livra, il se sont armé Puis sont es bons cevax monté Et sont isçu par grant desroi Et jurent que se c’ert le roi Ki eüst enpris tel sorfait Si seroit il de lui tot fait En tel guise qu’il en morroit Que rien garantir nel porroit Ne targa gaires qu’il les voient Lors se porficent et desroient Si ont les lances alongies Et les enarmes enpongnies Des escus, por corre lor seure Codrovains li Rous en is l’eure Ki lors ert u ceval montés Laist corre, sis a encontrés Si lor a moult fierement dit S’un d’ex ert par ex desconfit Ke ja mais un n’en ameroit Et si jure que il feroit Por ex çou qu’onques ne fist nus Car se cil en faisoient plus Il se torneroit ja vers ceus Et se conbateroit por ex « Segnor, dist il, or entendés Je ai dous chevaliers trouvés Prox et cortois et ensegniés Et cil de ça est tant prissiés Ki a a moi cangié ceval Tant l’ai trouvé prou et loial Ke nus ne vous diroit por rien Seulement le moitié del bien Ke on porroit trouver en lui » Mais ce est traval et anui De reconter vous tout le conte Si com Codrovain le reconte Com il ert en caisne monté Si lor avoit dit et conté Com il i ot l’esprevier pris Et com il l’i avoit soupris De cief en cief lor conte l’uevre Puis lor dist aprés et descuevre Com il a faite le concorde Tant lor a dit qu’il les acorde Et que l’uevre fut creantee Ensi com ele ert devisee Lors l’ont proiié de remanoir Et qu’il s’en voist a lor manoir Ensanble o ex, et s’en soit sire Et il lor conmença a dire Moult bonement, qu’il ne pot estre Car il lasça or sor senestre Un chevalier dous liues loig Ki d’aïe a moult grant besoig Lors li a l’uevre recontee Ensi com cil li ot contee Ki aloit rescorre s’amie Et il jurent qu’il n’ira mie Se il ne vont ensanble o lui Et il lor dist, « Segnor, je cui Que j’ai ici trop sejorné Mix me vendroit estre acoré Quant je li ai couvenancié K’il ne fust par moi avancié Car j’en seroie en fin traïs Si vous en renc grés et mercis De çou que vous m’avés offert Et il vous sera bien soufert K’ox i venrés ensanble o moi Et je vous pramet et otroi S’o moi vous i plaist a venir K’a vostre me poés tenir » Il li pramettent qu’il iront Et s’aficent que il feront Tout lor pooir de la rescoxe Codrovains a la Teste Roxe Li dist, « Sire, ne vous poist mie Je menrai ariere m’amie Et se Ragidiax le m’otroie J’en menrai la soie et la moie Car eles n’ont o nous que faire Et ce pas ne li doit desplaire Se je l’en main, car je vous di Et loiaumant le vous afi Que bien l’en ert tenu le don Et tantost que nous revendron Je li rendrai sans contredit » Puis lor a devisé et dit Qu’il n’a en la forest trestor Sentele ne adreceor Qu’il ne sace, et qu’il les suirra Tantost com il armés sera Mais ains sera d’armes garnis Car, s’il en estoit desgarnis La endroit en si grant afaire U tel besoins ert de bien faire Ja mais nul jor joie n’aroit De la honte qu’il en aroit Cil s’en retorne et cil s’en vont En tel guisse com je vous cont De bien faire tout abrievé De ce a moi pas n’estrivés C’or ne soit cil sans non a aise Et k’a mervelle ne li plaise K’il a porcacie tel gent Dont le porcas est bel et gent Ki tant est bien aparellie Et de bien faire encoragie Ensi sox les elmes enclins Trespassent sentes et cemins Et erroient les grans galos Tant qu’il ont trovés les esclos Par mi une lande, des dex Qui cevaucoient devant ex Serreement oirrent aprés Entre Espinogre et Cadrés Qui erroient plus que le pas Estoient ja venu au pas U il atendent la venue Du chevalier et de sa drue Saciés bien que Cadrés ot non Bon chevalier et de grant non Cil a qui cele ouvre apendoit En itel maniere atendoit Et Espinogres aveuc lui N’estoient encore qu’il dui Quant il ont la route veüe Et cil qui conduisoit sa drue Est li premiers entrés el pas Cadrés lait corre en es les pas Tant com cevax li pot randir Si l’a feru par tel aïr En l’escu en la boucle amont K’il l’abati tout en un mont Lui et le ceval tot ensanble Et espinogres, ce me sanble A si l’autre aprés feru Que du ceval l’a abatu Tot envers en une sentele Devant les piés a la pucele Dont les escrie durement Si retorne menuement Et fiert et de lance et d’espee Onques mais ne fu tex meslee Par seul dex chevaliers souferte Sans enconbrier d’ax ne sans perte Moult soufrirent d’armes grans fais Et si vous di que onques mais A dex chevaliers çou n’avint K’il fuscent asanblé a vint D’un tel fais d’armes sostenir K’un mal pas a force tenir Que nus des vint passer n’i puet Cadrés trop hardiement muet Si a fait un trop rice encontre Et fiert le premier qu’il encontre El pis entre les dous mameles Ke sa lance vole en asteles Cil kaï jus tout a un frois Et fiert un autre del retrois Si grant caup par mi le visiere K’il l’abat sor l’arçon derriere De son ceval si qu’il caïst S’uns escuiers ne le tenist Ne fu pas jetés li tronçons Ains a feru des esperons Si fiert le tierc et puis le quart Et Espinogres de sa part Ne li doit de bien faire rien Cascuns d’ex le fait si tres bien Ke li autre s’en esbahiscent Neporquant si se ravertiscent Si se tienent moult a honi De çou qu’il ont esté laidi Par dous chevaliers seulement Car il quident seürement Ke il n’i ait un seul des vint Nes le pior qui o ex vint S’il trovast orains un de cex Si fuscent cors a cors parex K’il nel cuidast ocirre u prendre Que ja ne se peüst deffendre Por la vergongne qu’il en ont Du grant anui que cil lor font Ont tout ensanle un poindre pris Si ont sor ex le pas porpris Si que deguerpir lor couvint A Espinogre lors souvint De çou que ses conpains li dist Ançois que de lui departist Lors a pris son cor si le sone Si que tox li bos en resone Et cil qui sivent l’ont oï Cil sans non moult s’en esjoï K’il a au corner entendu Que il se sont bien deffendu Et que tant se porront tenir K’il i porra a tans venir Lors a feru des esperons Si a dit a ses conpaignons « Segnor, dist il, or en venés Car a cel cor qu’oï avés Sone uns de cex qui nous atendent Ki a grant anui se deffendent » Lors laiscent les cevax aler Quant vint a un tertre avaler Si ont les chevaliers veüs Espinogre ert au frain tenus Si ert trestoute la meslee El val desor lui arestee Cadrés a bien recouneü Celui sans non, qu’il a veü Qui li vient aidier sans faintise La lance sox l’aisele mise Et li autre qui aprés vienent Les lances alongies tienent Si ont les escus enbraciés D’aidier les tox encoragiés Quant il ont veü lor secors Ki en poi d’eure lor est sors Moult par en ont grant joie eüe Por lor force qui ert creüe A cascuns jetee la main Si prist un autre par le frain Cil sans non hardïement muet Tant com cevax rendre li puet Si se fiert en la gregnor presse Ke forment s’angousce et apresse De lor chevaliers retenir S’en fiert si un en son venir D’une lance qui moult ert forte K’a tere du ceval le porte Et li autre qui aprés vienent Les lances alongies tienent De tex i ot quin abatirent Les chevaliers qu’il en ferirent Moult hardiement les requissent Par force a la voie les missent Ferant ferant en lor venue K’onques regne n’i ot tenue Por un petit qu’il ne passerent Outre le pas, les entasserent Par force et par armes tox vint Si que d’ex tans d’onor avint De ce qu’il sont avant venus K’il ont dous des lor retenus Prison les fissent fiancier Puis se painent d’ex avancier Si se revont mesler a ex Bien aidierent li huit as dex K’il troverent si enconbrés Et si ont cex desbaretés Et quant li fuiant au pas vinrent A l’entree lor frains retinrent Puis ont arriere regardé Si ont veü et esgardé Ke cil que caçoient n’estoient Que seul dis, et si ne veoient Si garderent et lonc et prés Nul secors qui venist aprés Moult se tienent a entrepris Si ont lor hardement repris Ses requierent hardïement Et se li livres ne me ment U je trovai le conte escrit Onques nus chevaliers ne vit Si buen estor de tant de gent Car se cil vinrent radement Li dis qui preu et hardi erent Hardïement les encontrerent La ot desus l’erbe nouvele Maint trox de lance et mainte astele Et maint chevalier pris au frain Cadrés qui n’ot pas le cuer vain Ki grant piece s’estoit pris garde Et voit s’amie qui l’esgarde Point le ceval de grant aïr Et vait celui au frain saisir Ki le jor prendre le devoit Et cil sans non, qui tot çou voit Ki avoit brisie sa lance Broce le ceval, si se lance Entre lui et les chevaliers Lors esperonent les destriers Si conpaignon qui erent prés Si se sont tout lancié aprés Si ont les chevaliers forclos Ne lor ont pas torné le dos Si conpaignon, qui bien veoient Que lor segnor forclos avoient Si anemi qui son frain tienent Hardïement desqu’a lui vienent Por lui delivrer et secorre Grant painne ont mis a lui rescorre Mais il n’en peuent traire a cief Et Cadrés li ot ja du cief Le hiaume osté et esracié Sil tint par le col enbracié Com cil qui moult savoit de guere Si se laisça glacier a tere Quant Cadrés a terre le tint Prison fiancier li couvint Car del deffendre n’i ot point Bien fu l’estors en icel point Com vous m’oés conter et dire Car cil qui se dervoient d’ire De lor segnor qu’il voient pris L’ont moult hardïement enpris A faire por lui delivrer Mix se veulent o lui livrer K’en prison l’en maint Cadrés si Este vous que du bos issi Cadrovain le Rox, qui venoit Si durement com il pooit Radement entra en l’estor Si fiert un chevalier des lor Tel caup que lui et le destrier Fist a le tere trebucier Oseement outre se lance Si fiert del retrox de le lance Un des autres qu’il encontra Si qu’a peu qu’il ne l’effronta A terre tox pasmés caï Cadrovain le tierc renvaï Si qu’il li a caupé le pong Et qu’il vola el camp bien loig De l’espee que il tenoit Cil qui veoient qu’il venoit Si outrajeusement vers ex Ne cuident pas que il soit sex Ains cuident bien qu’aprés lui viegnent Si grans gens que ja les retiegnent Et que nul escaper n’en puisse Por ce que on ei camp le truisce Auques lor est li cuers faillis Si quident estre mal baillis Se cil en vienent el desus De la desfense n’i ot plus Lor segnor ont el camp laiscié Si s’en va cascuns eslaiscié Tant com il puet del ceval traire Et cil sans non, qui voloit faire La bonté qu’il avoit enprise A la damoisele au frain prise Ki gaires ne s’est deffendue Si l’a lués a Cadrés rendue Or a Cadrés joie trop grant Car s’amie qu’il aime tant Et qui tant est bele et cortoise A rescouse par sa prooise Et du chevalier qu’il a pris Ki avoit sor son pois enpris A mener la en sa contree Moult a bone aïe trouvee Ki si li a couvent tenu Lors sont li set frere venu Ki cacié orent longement Cex qui s’en vont vilainnement Moult li ont tout priié et quis Quant il orent son estre enquis K’il sejornast ensanble o ex Et il lor dist que par ex dex Par son cors et par l’Espinogre Par tout le roiame de Logre Sera tant l’aventure quise K’il ont devisee et enprise K’en aucun liu le troveront Et quant il trovee l’aront Si lor pramet que sans trestor Sera par ileuc son retor Et qu’il en fin ne se movra Al revenir, si lor dira Son contenement et son estre Car il ne porroit por rien estre Que son estre lor fust conté Desi qu’il ait son non trové Et l’aventure que il quiert Cascuns li prie et li requiert Ke il le laist aler o lui Et il s’afice que il dui Il ne puet estre autrement fait Ne le tiegnent mie a sorfait N’a orguel ni a vilonie Il iront sans plus conpaignie Puis lor a priié, ce me sanle Ke il sejornent tot ensanle Et k’al castel Codrovain soient Sejornant, tant qu’il le revoient Et qu’il oient parler de lui Car moult grant joie et grant anui Set de voir que il li afiert A l’aventure que il quiert A soufrir ains que il revignent Por çou lor prie qu’il se tignent Ensanble, tant qu’il le revoient Et il bonement li otroient K’en tel maniere l’atendront Mais moult lor poise qu’il ne vont Ensanble o lui, s’il li pleüst Car se il nul besoig eüst Moult li aidascent volentiers A tant se part des chevaliers Gavains, et va querre son non Entre lui et son conpaignon Entre Cadrés et Ragidel Ensanble alerent au castel Et Codrovains les i mena Ki d’ex grant joie demena Et qui moult grant honor lor fist Et cascuns des freres i mist Son pooir qu’il n’i fali rien A faire lor honor et bien Moult orent envoisié sejor Car onques ne passa nul jor Ke cascuns d’ex ne fust a cois D’aler en riviere u en bois A lor plaiscir pooient faire U corre as ciens u aler traire Car li sire ert moult poëstis Et saciés bien que ses païs Estoit aaisiés de tox biens Moult i avoit oisiax et ciens Lïemiers, saietes et ars Rivieres et forés et pars Ki tot lor est abandoné Et le don qui estoit doné A Ragidel, qu’il averoit S’amie quant il revenroit Li fu tenu moult loiaument Or me restuet dire conment Cil qui aloit por son non querre En aventure par la terre Puet traire a cief de son afaire Je ne vous porroie retraire Com il ala ne com il vint Ne mais que un jor li avint K’il erroit par mi un boscage Et qu’il trova un ermitage Et que de l’ermitage isçoit Uns chevaliers qui i avoit La messe a l’ermite escoutee Si ot une cape afublee D’escarlate a penne d’ermine Orlee d’une sebeline (A cel tans n’i avoit pas mances ) Si ot cemisse et braies blances A la guise galesce ouvrees S’ot une cauces decaupees Desus uns esperons dorés Ki moult estoient bien ouvrés Et saciés que le chevalier Seoit sor un moult bon destrier Tox desarmés, l’espee çainte Si ot une pucele atainte Ki moult ert avenans et bele Si li contoit une nouvele Ki ert el païs avenue Et cil bonement le salue Ki de son non mie n’avoit « Sire, dist il, Dix vous avoit De çou que vous alés querrant » Puis li a dit, « Je vous demant S’il vous plaist, que vous me donés Un don, qu’ensanble o moi venés Entre vous et cel chevalier Wi mais deduire et herbegier Et vous arés ostel si buen Com s’il estoit u vostre u suen Car il ert a vostre devise — Sire, fait il, je ai enprise Une aventure que je quier Por çou si vous pri et requier K’il ne vous poist se je n’i vois Par castiax, par viles, par bois Le querrai tant qu’ele ert trovee — Chevalier, s’il ne vous agree Fait il, a prendre mon ostel Dont vous pri jou et requier d’el Et de çou que je vous veul dire Ne me devés vous escondire K’il n’i eüst grant mesproison — Sans laideté et traïson Fait il, quant vous tant me proiiés Vous en ert li dons otroiiés » Et cil respont, « Vostre merci J’ai un castel moult prés de ci Un petit outre ce vaucel Si i est orendroit moult bel Mon disner prest et atorné Vous n’en serés pas destorné Le trait d’un arc de vostre voie Et por çou que je vostres soie Vous pri que vous sans demorer I vegniés aveuc moi disner » Et il li dist, « Jel vous otroi » A tant s’en tornerent tout troi Si sont dusqu’au castel venu Ançois qu’il fuscent descendu Estoient ja les tables mises Et li sergant avoient prises Les touailes et les bacins Les doubliers, li pains et li vins Fu tost aparelliés et mis Puis si sont au disner assis Des que l’iaue lor fu dounee K’il n’i ot autre demoree Et saciés bien que li mengiers Fu biax et rices et pleniers Et liement donés et pris Quant il orent longement sis Cil qui sire ert de le maison Mist ses dous ostes a raison « Segnor, fait il, je vous veul dire La dolor et l’anui et l’ire K’avenue est novelement Dont tout le mont ert en torment Quant il sera par tout seü J’ere l’autre soir esmeü Por aler en un mien afaire, Se on peüst celer et taire Ce que je vous veul ci conter Nus hom nel deüst reconter Mais l’uevre est ja par tout seüe K’el ne porroit estre teüe Ce poise moi que on le set Ahi ! Dix, tant fortune het Les dames et les damoiseles ! Quant eles saront ces noveles Ke vous m’orrés ja ci conter Moult s’en porront desconforter Car cil en cui Dix avoit mise Loiauté, prouece et francise K’il avoit fait cortois et sage Sans vilounie et sans outrage Sans orguel et sans desmesure (Il n’avoit de nul sorfait cure Ains amoit honor et raison ) Est mors par mauvaise ocoison Et quant je tant vous en ai dit Savoir poés sans contredit Dont la mesaventure sort Quant on le sara a la cort Moult en ara li rois grant ire A ! las, qui li osera dire Del Bon Chevalier c’on a mort Et decaupé a si grant tort ? C’est son neveu dont je vous cont — Ostes, por tox les sains du mont Fait cil sans non, que savés vous ? — Jel sai bien, dist cil, a estrox — Et vous coument ? — jel vous dirai Ke ja de mot n’en mentirai Je voloie aler l’autre soir En deduit por mes bos veoir Quant je dui de la porte iscir Si vi trois chevaliers venir Moult bien armés sor lor destriers Vers moi vint armés li premiers Tox seus par mi une quarriere Et si laisça les dous arriere Il me salua et je lui Aprés me dist, “ Sire, je cui Ke estes de cest ostel sire Por çou vous veul proiier et dire Si serai vostre a tox jors mais Ke vous me herbegiés wi mais, ” Et je li dis, “ Jel vous otroi, ” Lors s’en vint çaiens aveuc moi Li chevaliers, sel descendimes Et jel desarmai jou meïsmes Puis fis en sauf ses armes metre Et fis mes vallés entremetre De son ceval mettre a estable Mais se je fusce bien raisnable Bien ensegniés et bien cortois J’eüsce demandé ançois Ki il ert et dont il venoit Et kele aventure il querroit Car puis que je herbegié l’oi Et je le mal et l’anui soi Ke il ert alés porkacier Je nel poi de çaiens cacier Ne jeter de ma maison fors Lors vint çaiens a tout un cors Uns des chevaliers qui sivoit Li autres, qui aprés venoit Portoit les menbres et le teste Si en demenoit moult grant feste Et grant joie de l’aventure Je li demandai a droiture Ki ert li mors que il portoit Dont si grant joie demenoit Et por coi l’avoient ocis “ J’avoie, dist li uns, pramis La teste a une moie amie — Et je, se Dix me beneïe Dist l’autres, la moie le cors, ” Et je lor redemandai lors L’ocoison por quoi il l’avoient Ensi ocis com il disoient Lors me conmença l’uns un conte Dont jou ai duel et ire et honte De reconter le a nul home — Ostes, por tox les sains de Rome Fait cil sans non, dites le moi Car je vous di en bone foi C’est l’aventure que je quier Por çou si vous pri et requier Ke vous m’en contés tout le voir — Jel vous ferai moult bien savoir Fait li ostes, n’en doutés ja Si conme cil le me conta Li doi des chevaliers prioient Dex damoiseles qu’il amoient K’a grant mervelle estoient beles Trois ans priierent les puceles Si c’onques rien n’i esploitierent Un jor avint qu’i les prierent Moult bonement de tox lor cuers Les damoiseles erent suers Et li chevalier conpaignon Li ainsnee dist que le don De s’amor avoit ja doné Si n’ert pas le chevalier né Par quoi il fust ja retoloit Car tant ert biax et tant valoit Cil cui ele donoit s’amor Ke ja n’ameroit a nul jor Nul chevalier se celui non Lors li demanda cil son non Ki se dervoit de duel et d’ire “ Jel puis bien en toutes cors dire K’il est tant et dit et només Que ne puet estre en cort celés Car çou est monsegnor Gavain Cui li cortois et li vilain Et cil qui sont par tout le mont Loent sor tox ceus qui i sont, ” Li autres enquist maintenant A celi cui il amoit tant Le sien cuer et le sien pensé “Mon cuer en est bien porpense Dist ele, ja n’en doutés rien Je ne sai pas nomer le mien Ki il est ne quant jel ferai Mais une cose de voir sai Si l’avés vous tres bien oï Ke ma suer a fait son ami De monsegnor Gavain sans faille Si ne gart l’ore qu’ele i aille A la cort le roi por li querre Por sa drüerie requerre Et je irai ensanble o li Une cose de voir vous di Que se me suer ne li agree Ensi com el s’i est dounee Ke je meïsme m’i donrai En tel guise que j’amerai Un chevalier par son consel Et c’ert le Chevalier Vermel De qui je ferai mon ami Et saciés bien que je vous di Del bon chevalier, del seür Ki a la cort le roi Artur Vint antan estre chevalier Ki les armes et le destrier Conquist par son cors seulement Desarmés, par grant hardement Et li rois Artus li dona Del chevalier qui en porta Sa coupe d’or de devant lui ” Moult furent angousçox li dui Qui les puceles requerroient Puis lor discent que il estoient Mellor chevalier que cil n’erent Et les damoiseles jurerent Que se lor dis n’estoit provés Et qu’il se fuscent esprovés Cors a cors par lor dous escus Si qu’il les eüscent vencus Ke ja mais nul n’en ameroient Et se il issi nel faisoient Dedens un terme qui fust cort Eles iroient a la cort Et cil discent, “ Se nous vencons Qui tant proïes vous avons Dont n’arons nous vos drüeries ? En fin devenrons vos amies Disent eles, quant ce sera Mais ja se Dix plaist n’avenra Car ce seroit trop grant damage, ” Par tel sorfait et par tel rage S’esmurent cil por Gavain querre Tant errerent par ceste terre Un jor avint qu’il l’encontrerent Seul et desarmé le troverent Cil qui querroient por ocire C’est damages qu’il l’estuet dire Sa deffense rien ne valut Par itel ocoison morut Li niés le roi, ce saciés bien Onques n’oi si grant duel de rien Ne ja mais ne quit qu’il me viegne Si grant dolor por riens qu’aviegne Quant il fu issi avenu Et cil furent çaiens venu Ki tout l’avoient depecié Le destre bras, qu’il ot trencié Lor demandai, sel me dounerent A tout le sorplus s’en alerent Par matinet en lor païs Et saciés bien que il ert mis Se je puis vivre longement Si bien en or et en argent Se li orfevres ne se faint Onques nus bras a nul cors saint Ne fu mais si ricement mis Je l’ai bien voué et promis Et je m’en doi bien entremetre De faire le ricement mettre Car li prodom fist moult d’onor As chevaliers de ci entor Si devroit bien cascuns entendre Ki en porroit gueredon rendre — Biax dox ostes, fait cis sans non Por Diu et por sa raençon Counoisciés vous bien Gavain ? — Je vous mosterrai ja sa main Fait li ostes, se Dix me voie » Maintenant por le main envoie Ki en un coffre ert enfremee D’un drap de soie envolepee Et quant le bras fu hors isçu Ki estoit envox d’un boufu A mervelle l’ont esgardé Puis ont priié qu’il soit gardé A honor, tant qu’il soit seü Ki li cors ert dont li bras fu Il lor respont qu’isi ert il Ja rien de lui n’ert tenu vil La u il soit, ne bras ne main Car bien set que c’est de Gavain Si doit estre moult cier tenu Et cil qui ert sans non venu Li dist, « Sire, se Dix me gart Ja mar de çou arés regart Je vi, n’a pas quart jor, Gavain Vers Carduel tout delivre et sain Si aloit aventure querre Or vous veul proiier et requerre Par amor et par guerredon Ke me creantés un seul don Et je ne vous querrai sorfait — Dont ert il, fait li ostes, fait Par si que je faire le puisce — Ensengniés me dont u je truisce Ces qui ensi se sont vanté K’ont monsegnor Gavain maté Et que il par ex reçut mort Et saciés bien que il ont tort a C’onques par aus mort ne reçut b Voirs est c’uns chevaliers morut c Que seul et desarmé troverent d Et saciés bien qu il en ouvrerent Moult laidement quant il l’ocissent Sans çou que nul mot ne li dissent Ne qu’il n’avoit d’ex nul regart N’a sous ciel home qui n’esgart Ki en lui ot sens et raison K’i l’ociscent en traïson Fu ce prouece s’il l’ocissent ? Aprés se vanterent et dissent K’il avoient Gavain ocis Je l’ai ja mainte fois enquis N’onques encor ne peuc savoir Del chevalier, por nul avoir Son non, ne de quel terre il fu Fors qu’il portoit un tel escu Conme mesire Gavains porte » A mervelle se reconforte Li ostes, qui ot tex noveles Ki moult li sont plaisans et beles Puis dist, « Sire, se Dix me voie Je vous metrai bien en le voie Moult volentiers, quant vous vaurois Et ce est bien raisons et drois Ke de çou vous doie avoiier Je vous vaurai ja convoiier Tant que je vous avoierai Et por çou vous convoierai Ke jou vous mosterai la voie » Maintenant del tout les avoie Et de lor nons et de lor terre De quanques il vaurent enquerre « Sire, dist il, veïstes vous Onques le Faé Orgellox ? Je ne sai mie bien son non Mais je sai bien que son sornon Si est de la Roce Faee Ensi est sa vile apelee Li uns d’ex est ensi noumés Et li autres est apelés Par tout Goumerés sans Mesure — De cestui sornon n’ai jou cure Fait cil sans non, qu’il n’est pas buens — Et il est bien par raison suens Fait li ostes, qu’il est assés Orgellox et desmesurés Et si ai jou malement dit Je meïsme i met contredit Si est il bien dit et prouvés K’onques nus trop ne fu d’assés Le tiers ne sai je pas qui fu Ne mais qu’il ert o ex venu Ce li oï dire et retraire K’il n’i ala por nul mal faire Fors por tenir ex conpaignie — Ot la saisine de s’amie Biax dox ostes, fait cil sans non Nus d’ax dex par ceste ocoison ? — Nenil, dist il, ce me fu dit K’eles i miscent contredit Et si dissent a lor amis Ke il lor avoient pramis Le cors Gavain u mort u vif Si ot entr’ex moult grant estrif Car les damoiseles disoient Ke autre fois veü l’avoient Et ce n’ert mie illeuc son cors Et li chevalier dissent lors Ke si ert et sel prouveroient Car as marciés crier feroient Par tox les castiax du païs K’il avoient Gavain ocis Et se nus osoit ce desdire K’il feroient crier et dire K’il seroient prest du prouver Si ne porent encor trouver Ki i meïst nul contredit Et de ces dex qui ce ont dit N’i a il nul qui moult ne vaille Si veulent prouver par bataille Or est la cose alee tant S’aucuns ne vient demain avant Ki pruisse que ce n’est pas voir En fin lor convenra avoir Les puceles sans nul delai Eles en sont en tel esmai De ce que ne puent trouver Ke çou lor ost a faus prouver Ne par bataille contredire K’a poi que ne sont mortes d’ire Savés por quoi eles s’esmaient ? El doutent trop que cil nes aient En tel guisse com je vous cont Si dïent bien que s’ocirront S’il les ont par ceste raison Car eles erent ocoison Ke Gavains fu par eles mort Eles n’avroient ja confort — Oste, dist il, ne vous anuit Porron nous tant errer anuit Et demain dusqu’a mïedi ? Une cose de voir vous di Si nel di je pas por vantance Se Damedix tant nous avance Ke demain a tans i vegnon Je ai talent que nous venjon Le grant forfait que il ont dit Nous dui i metrons contredit A armes, conment que il aille Ne puet remaindre sans bataille » Lors dist li ostes, « Ce me sanle Vous ne trouverés pas ensanle Les chevaliers que vous querés Se par armes les conquerés Dont vous avés ceste ouvre enprise Moult avrés grant honor conquise Se ne faites trop grant demeure Vous i venrés moult bien a eures Et si vous dirai bien conment Goumerés sans Mesure atent Il a son pavellon tendu Si a longement atendu Por cest afaire en une lande Si enquiert ileuc et demande Savoir se nus vauroit desdire Ce qu’il a fait crier et dire Ke par ex dex est Gavains mors Tant est prox et hardis et fors K’il ne trouve qui l’en desdie Si quide avoir demain s’amie Li feés Orgellox atent A son castel tout ensement Por savoir se ja venroit nus Ki de ceste oeuvre feïst plus Et qui ossast vers lui enprendre U a prouver u a deffendre Ce qu’il dist, qu’il a mort Gavain S’aucuns ne vient avant demain Ki par armes l’en contredie En fin ara la soie amie » Lors se leverent del mengier Puis monta cascuns u destrier Et si se missent a la voie Et li ostes tant les convoie Conme cortois et ensegniés K’il lor a moult bien ensegniés Del païs trestox les assens K’il n’i fauroient a nul sens A trover çou qu’il vont querant Et quant il orent erré tant Ke li ostes retorner dut Espinogres lors s’aperçut K’il avoient forment mespris Si s’en tient moult a entrepris Si le dist a son conpaignon Ke il n’orent enquis son non Lors l’ont moult bel a raison mis « Sire, nous soumes vos amis Et ce est bien raisons et drois Ke bien avés a ceste fois Deservi que nous le soion Biax dox ostes, si vos prion Ke vostres nons nous soit nonmés Prodoume estes et renomés Si amon vostre acointement Et saciés bien seürement Ja mar en serés en doutance Ke nous en la vostre acointance Somes tous et sans contredit — J’ai a non Tristrans qui ne rit Ja, fait il, celer ne le quier Segnor, si vous pri et requier Par amor et par gueredon Ke vous me creantés un don Et je ne vous requerrai mie Ne outrage ne vilenie Ja mar de çou paour arois — Par foi, fait il, ce est bien drois Ke nous façons vostre plaissir Bien nous devés a vos tenir Tous jors mais des ore en avant — Segnor, fait il, je vous demant Par gueredon et par amor Ke par ci soit vostre retor Je nel sai, ne vous ne savés De l’aventure que querés Ke vous en est a avenir Mais savoir weul au revenir Conment vous ert de cest afaire Tout me conterés au repaire Ki vous estes ne de quel terre Et l’ocoison qui vous fait querre L’aventure que vous querés Se par armes cex conquerés Que vous avés longement quis Moult par arés grant pris conquis » Bounement li ont otroiié Quant assés les ot convoiié Si revient li ostes arriere Et cil oirrent en tel maniere Conme li ostes lor ot dit Tant errerent que li uns vit En un val une bele tor Qui estoit a un vavasor Moult estoit rices li porpris Et li sires moult poëstis Et moult prodom cui il estoit A son contenement paroit K’il estoit de moult grant pooir La se herbegierent le soir Andoi ciés le bon vavasor Si grant joie et si grant honor Li face Dix com il lor fist Moult se jua, et moult lor dist De ses aventures la nuit Et il a lui, si com je cuit Reconterent assés des lor Et l’endemain, quant il fu jor Et on ot armés les vassax Si monterent sor lor cevax Et quant il orent congié pris Si se sont a la voie mis Puis oirent un cemin ferré N’orent mie granment erré K’il ert encore assés matin K’il trouverent un forc cemin Si com Tristrans conté lor ot Et li uns des cemins aloit Si com Tristran dit lor avoit La u Goumerés atendoit Et li autres au castel vait U li Orgellox crier fait Ke il a mort Gavain sans faille Si quide le jor sans bataille Estre de s’amie saissis Lors ont entr’ex un ju partis Et si le parti cil sans non Bonement a son compaignon « Sire, dist il, vous coisirés L’un de ces dous cemins irés Por vostre besongne furnir Et quant venra au revenir Se Dix nous done si ouvrer Ke par armes puisçon prover K’il ont menti de cest afaire Ciés Tristran ert nostre repaire Et cil qui ançois i venra Son conpaignon i atendra Tant qu’il oie parler de lui — Quant je, fait Espinogres, sui A cois d’une de ces dous voies Et faire l’estuet toutes voies Si qu’il ne puet autrement estre Je irai cesti a senestre Ki me menra a Goumeret — Et je en cest’autre me met Fait cil sans non, si vous conmant Au gloriox, le roi poisçant Ki vous gart de honte et de mal » Lors broce cascuns le ceval Si oirrent moult grant aleüre Et Espinogres a droiture N’ot pas demie liue alee K’il a une forest trouvee Puis oirre longement issi C’onques de la forest n’issi Tant qu’il a trouvee la lande U Goumerés est qu’il demande Si com la parole est contee (Por noient seroit recontee Car ele est bien dite et oïe ) Si quide bien avoir s’amie Sans contredit que nus i mette Ne quide que nus s’entremete De prendre contre lui desraisne Et quoi que il si se desraisne Et il dist ses rices paroles Si orgellousses et si foles Com vous avés oï conter (Nes couvient mie reconter Car assés bien vous en souvient ) Estes vous qu’Espinogres vient Cortoisement li dist en pais « Dans chevaliers, ne dites mais Ke vous aiiés Gavain ocis Vilainnement avés mespris De ce que le desistes onques — Sire vassal, et por quoi donques Fait Goumerés, quant je di voir Ne l’os je bien faire savoir ? — Nenil, dist il, onques n’avint Il s’en conbatroit a tes vint L’un aprés l’autre, com vous estes Si trenceroit a tox les testes » Et Goumerés respondi lors « Par foi, fait il, j’en ai le cors Mais il n’i a ne bras ne quisse Et si sui tox pres que je pruisse Ke je l’ai et que li Faés En a les menbres aportés » Espinogres lors respondi « Apertement avés menti Je sui pres que je l’en deffende Et que mort u pris vous en rende Ains que g’isce de ceste lande » Et Goumerés tantost demande Ses armes, et on li aporte Cauces de fer a maille forte Plus blances qu’argens esmerés Puis fu li haubers aportés Fors et legiers, clers et trellis Et hiaume qui fu de Senlis Toute ert noire l’autre armeüre Quant armés fu a sa droture Il n’i a fait plus de demoure Son ceval ert plus noir que moure Et quant il se fu bien armés Sor le bon ceval est montés Tox pres de prouver erranment çou dont li autres le desment N’avoit entr’ex tertre ne vaus Il laiscent corre les cevax Tant com cascuns li pot aler Si se ferirent au joster Si grans caus par mi les escus K’estroés les ont et fendus Outre fissent passer les fers Sis assissent sor les haubers K’il ont trouvé tenans et fors Si se fierent de tel esfors Et par tel ire, des espiés K’il n’i remest ceval en piés Et de ce nes doit nus blasmer Quant les cevax estut verser S’il caïrent o les destriers Guerpir lor couvint les estriers Si sont tantost en piés sailli Si a li uns l’autre asailli Moult tost et moult seürement Et saciés bien certeinement Que nus qui esgardast l’estor N’en couneüst l’apeleor Cascuns apeleor se fait Espinogres les saus li vait Sel fiert et refiert a bandon Cent caus li doune en un randon Et cil qui de rien ne s’esmaie Hardiement li rent et paie Tox les caus qu’il li a donés Frais est li hiaumes et quassés Et tox detrenchiés li haubers Nes garirent ne fus ne fers Ke li sans en cent lius n’en saille Tant par fu fiere la bataille Ke nus ne vous seüst a dire Ki est li mieudre ne li pire Mais saciés qu’en itel maniere Dura la bataille si fiere Des qu’a ore de mïedi K’il se furent forment laidi Quant li estors ot tant duré Et il orent tant enduré K’il orent lor elmes fendus Et lor haubers tox deronpus Et que par mi li sans en saut Et c’on le voit vermel et caut A le parfin issi avint Ke Goumerés lé saus li vint Si le feri si de l’espee Ke ele est en l’escu coulee Ce m’est avis, pié et demi A peu ne le trencha par mi Car il i feri par grant force Au retraire tire et s’esforce Mais ains qu’il l’eüst a soi traite Fu l’espee les le heut fraite Si que li puins et l’entrecor Ki estoit adoubés a or Li remest en la main sans plus Et Espinogres li cort sus Sel fiert et refiert par grant ire Et Goumerés li prist a dire « Sire, dist il, or n’i a plus Ne soiiés pas mal el desus Quant je ne m’ai de quoi deffendre Par estovoir me couvient rendre Je me met en vostre merchi » Et Espinogres respondi Moult francement, « Et jel creant Mais ce ert par tel couvenant Que vous en venrés aveuc moi Orendroit a la cort le roi Si vous metrés en sa prison Et counistrés la mesproison Del chevalier que oceïstes Kar saciés que vous mespresistes Ki desistes que c’ert Gavain Que fort et bien delivre et sain Ce saciés de voir, le verrés A la cort quant vous i venrés » Et Goumerés issi l’otroie A tant se metent a la voie Qant il orent lor cevax pris E cil sans non, qui ot enpris A querre l’Orgellox Faé A tant cevaucié et erré K’il est venus a son castel U il faisoit tout de nouvel Crier moult hautement son ban En tel guise conme Tristran Li cortois chevaliers, li dist Et il tantost le contredist Sans çou qu’onques n’i dist outrage « Chevaliers, dist il, grant damage Seroit, se il estoit ocis K’il n’a de rien vers vous mespris Ne vers autre, ç’ai oï dire Onques ne fu en si grant ire Ke il por çou plus tost feïst Un outrage que on veïst Que nus hon le peüst veoir N’estes mie de grant savoir Ki vous vantastes de tel cose Je sui cil qui desdire l’ose Et qui par armes prouverai K’il est vis et sel mosterai » Li Faés lors li respondi « Je proverai çou que je di A cui que il doie desplaire » Lors fist avant ses armes traire Si s’est moult vistement armés Moult fu cointes et acesmés Quant il fu montés el destrier Il n’avoit sous ciel chevalier Se son grant tort ne li neüst Que il bien vaintre ne deüst Grant cerne ont fait la gent menue Lors n’i ot plus regne tenue N’il n’i ot de manechier point Cascuns d’eus le sien ceval point Tant com il pot plus esploitier Li Faés le feri premier Del bon espiel en mi le pis K’il en fist voler les esclis Cil sans non le feri aprés K’il trenche de l’escu les ais Si qu’il fist le hauberc fauser Par mi l’espaule fist passer Jusqu’as doiles le bon espié Si qu’il en parut bien plain pié Et plus encor devers le dos Tout trenche fust et fer et os Si l’enpaint par si grant vertu K’il a tout ensanle abatu En un mont lui et le destrier Lors mist le main au brant d’acier Sel vait ireement requerre Et cil qui gissoit a la terre Moult bleciés, li dist erranment « Sire chevalier, je me rent Quant si preu et si fort vous truis Vers vous deffendre ne me puis Je me met en vostre merchi » Et cil sans non li respondi Moult volentiers, « Et je vous praing Mais tant vous di jou et apraing Ains que jou vous voille reçoivre Je n’ai talent de vous deçoivre Que vous vendrés aveuques moi En prison a la cort de roi Si menrés o vous vostre amie Et se li rois la vous otrie Vous l’arés, et saciés de voir Ke vous ne la poés avoir S’au roi de nule rien desplaist » Et li chevaliers lors se taist Ceste parole moult li grieve Et cil sans non l’espee lieve Si fait de lui ferir sanlant Et cil qui bleciés estoit tant K’il n’a pooir de lui deffendre Li va la soie espee rendre « A ! chevalier, fait il, merci Faites tant que je vous merci Et que je soie vostres quites De ceste oeuvre que vous me dites Se je perdoie issi m’amie Je perdroie a estrox la vie Car je n’aim riens el siecle tant Tant par vous voi prox et vaillant Si ensegnié et si cortois Car je sai de voir que li rois Le me rendra, se l’en priiés — Chevalier, ne vous esmaiiés Fait cil sans non, que a amie Ce saciés, ne faurés vous mie » Moult en a cil grant joie eüe Lors atorne soi et sa drue Et si fist sa plaie atorner Puis s’en veut a la cort aler O le chevalier qui l’a pris Lors l’a moult bel a raison mis La u erroient le cemin « Biau sire, fait il, je devin Ne sai se ma pensee est fine Mais mes cuers ensi le devine Au sanlant que je pens et voi Vous estes de la gent le roi Por çou vous pri, s’il pooit estre Que vous me desisciés vostre estre Tant que j’en fusce bien certains — Par foi, fait il, je sui Gavains Ja mon non ne vous ert celé Puis que j’ai par armes prouvé Ke je suis delivres et sains An ex seroie et vilains Se jou a vous ni a autrui Celoie ja mais qui je sui Des que par terre ai tant esté Que je ai mon non recouvré Que j’avoie piecha perdu Il doit estre par tout seü Le grant orguel qu’aviés fait Il doit estre par tout retrait Que feïstes au chevalier Qu’el bois l’alastes detrenchier Puis en aportastes le cors Moult ains que del bois fuissiés fors Crevastes ambedeus les eus Au vallet, qui n’estoit pas seus Il avoit o lui trois puceles Qui molt erent gentes et beles Qui molt demenoient grant doel Chascune d’eles a son woel Morist iloeques en la place Tainte et persie avoit la face Tant avoit chascune ploré Quant je oi le duel escouté Si ving a eles tout errant Puis vi devant eles gisant Uns damoisel qui moult ert gent Mais moult li estoit malement Car on li avoit de novel Les eus tolois fors del cervel Quant jel vi si mal atorné Qu’il ot andeus les ex crevés si cuidai de voir sans doutance Que trestoute la doliance Qu’eles menoient fust por lui La grant ire et le grant anui Le grant doel qu’eles demenoient Demandai por quoi le faisoient La premiere respont errant “Sire, un chevalier molt vaillant Avons ci veü detrenchier Onc ne li peümes aidier ” Je demandai cui il estoit Et l’autre si me responnoit Que ce ert messire Gavains Qui ici erroit trestous sains Mais n’i avoit hauberc vestu Ne nule arme fors son escu Et une lance solement Ensi ert eschaitiement Qu’il n’ot serjant ni escuier Puis li vindrent dui chevalier Armé sor dous destriers d’Espaingne A travers par une champaigne Tant qu’il l’atainstrent en cel val Lors laissent corre le cheval Por lui ochirre et detrenchier Puis commenchierent a hucier “ Estés, estés, sire vassal, ” Cil s’arestut tout a estal Qui tenoit sa lance en sa main Li uns li dist en haut, “ Gavain Vous n’en irois en fin sans faille, ” A tant commencha la bataille Qui n’estoit mie paringal Li cuivert felon desloial Ont detrenchié Gavain et mort O fust a droit o fust a tort I ala cel vallet courant Qui moult estoit preus et vaillant Que il cuida Gavain aidier Mais ne li pot avoir mestier Que il estoit ja decaupés Li vallés ot les ex crevés Pour ce ke aidier li cuida Un chevalier le cors troussa Sour un destrier, par mi l’arbroie Se mistrent errant a la voie S’i s’en vont moult grant aleüre Et je lor pramis a droiture Que le vallet seroit vengié Tornai m’en, quant j’oi pris congié Que je n’i fui pas coneüs Je vous ai tant quis et seüs Que j’ai sour vos la poesté Qu’il sera molt bien amendé Le grant outrage et le desroi Vous quidastes que ce fust moi Quant vous feïstes le mesfait — Par foi, biau sire, autrement vet » Respont li Orguelleus Faé De chief en chief li a conté L’acoison, por quoi el fu faite « Ne doit estre en tel mal retraite Puis qu’ele puet estre amendee Voiant cels de vostre contree Vous renderai cel chevalier Et ses armes et son destrier Tout sain si com onques fu plus Et si vous di por voir que nus Ne vit onques encor plus cler Que cil dont je vous oi conter Fera, des que j’avrai tant fet Qu’aval le vis li avrai trait Tant solement ma destre main Si sera tout gari et sain » Gavains li dist, « Dous ami chier S’or pooie tant esploitier Que li vallés ses eus eüst Et qu’au chevalier ne neüst La traïson ke vous feïstes Encor porriés estre quites A ce que je vous aiderai — N’en soiés vos ja en esmai Sire, fait l’Orgeullous Faé Que onkes en si grant santé Ne fu encor li chevaliers Ne li vallés, biaus sire chiers Com a la court le vous rendrai De ce ne soiés en esmai » Ensi tindrent parlant lor voie Tant que il vindrent a la voie Iloec endroit ou il parti D’Espinogre, son bon ami Si descendent iloec a pié Par un cemin qui ert forchié Lors i vint poignant sans demeure Sor un noir ceval plus que meure Un chevalier grant aleüre Son destrier ert a desmesure Isniax, qui voir en vaudroit dire On ne porroit pas tel eslire En la terre le roi Artus Li chevalier ert molt seürs Il estoit si armé sans faille Ne cremoit pas une maaille Caup d’espee ne de nule arme Il est descendus sous un charme Pour son destrier cengler estroit Li Orguelleus Faés le voit Si dist Gavain tout erramment « Sire, dist il, mon escient Com je voi la un chevalier Veés com cengle son destrier Et lace son elme gemé Saciés bien qu’il a en pensé A faire vous aucun hontage Je voel estre en vostre homage S’irai vostre message querre Dont il vient et que il va querre » Que que cil parloit a Gavain Es vous venir par mi un plain Deus chevaliers molt bien armés De toutes armes acesmés Si paroit bien a lor escus Que forment s’erent combatus Il erent tuit covert de sanc Li uns sist sor un destrier blanc Et li autres sist sour un sor Cil avoit non Gomeret Mor Molt estoit chevalier vaillant Espinogres aloit devant Qui sour le blanc destrier seoit Et li noirs chevaliers le voit Si com venoient traversant Lors monte el bon destrier corant S’enbrace l’escu et la lance D’esperoner vers els s’avance Si broce pour els encontrer A Espinogre vait jouster Quant cil le voit ver lui apoindre Iriement vait a lui joindre Sans parler et sans desfiances Fierent es escus de lor lances Et li escu perchent et croissent Nule de lor lances ne froissent Que trop erent roides et fors Et cil l’empaint de tel esfors Volsist Espinogres ou non Que il l’abati el sablon De sen poindre a son cop repris Fiert Gomeret en l’escu bis Que par la crupe del destrier Le fait a terre trebuchier Puis a saisi les dous chevaus Si a guerpi les deus vassaus Si s’en revient toute la voie Vers les deus qui sent en l’ombroie Qui l’avoient piecha veü Le ceval blanc ot couneü Mesire Gavains le courtois Si sot bien trestout demanois Que ce estoit son compaignon Que cil abati el sablon Il s’estoit pris au bon destrier Pour aler au noir chevalier Jouster, qui par grant desmesure Aloit tout sol querre aventure Car il ne quidoit pas que fust Nus hom qui de prouece eüst [Qui de lui se peüst desfendre Ne quide pas les cevals rendre Par nul chevalier qui soit nés « Sire, dist l’Orguillos Faés Je li dirai qu’il viengne a vos Et se il est si orguillous Que n’i veulle venir por moi Je vos jur et afi par foi Qu’il ne puet passer sans bataille Ma bone espee qui bien taille Li enbatrai ens el cervel Je vos proi que il vos soit bel Que je par vostre gré i voisse » Molt durement cil s’en envoisse Qu’il estoit estoit costume a cel jor S’uns chevaliers en un estor Venoit por joster ne por poindre N’en doit que uns seus a lui jondre Et se doi i vienent ensanble Il serroient, si com moi sanble Trestot recreant et honni Ja mais ne serroient servi En cort a roi, s’il ert seü Por ce s’est premiers esmeü Por joster au chevalier noir Mais il cuidoit a son espoir Que cil le tenist a beubant A tant s’en part sor le bauçant Si point droit a noir chevalier Et cil qui n’ot soig de tencier Repoint a lui grant aleüre L’Orguillous par grant desmesure Le fiert primes sor l’escu noir Si vos di bien a mon espoir Se la lance ne fust brissie Qu’il eüst la sele widie Mais sa lance brise erranment Et cil si com il vient corant L’avoit feru sor l’escu paint Del bien ferir pas ne se faint Car mervelles ert aïrous L’escu li perça a estrous Et l’auberc a tot desronpu Mais un porpoint qu’il ot vestu Qui fu fais par molt grant maistrie Li a le jor sauvé la vie Et neporquant par tel vertu L’avoit del cheval abatu Qu’il li desjointa le braic destre Ilueuc ne vaut pas longes estre Ains le laissa demaintenant S’en mena le destrier corant Les Espinogre et Gomerés En a avuecques lui menés A tant s’en parti, si s’en vait A Gavain mervelles desplaist Quant li Orguillous fu ceüs Il est au Gringalet venus ] Si monte par l’estrier senestre Et prist sa lance a la main destre Puis dist a l’amie au Faé « Damoisele de grant biauté Vous remaindrois ci sans esmai Sous cest ormel que je chi voi Et g’irai vostre ami aidier Et si li rendrai son destrier Que cel chevalier la en mainne Je sousferrai ains molt grant paine Que il l’en maint, se Diex me gart » Sous l’ormel la laist, si s’em part Si vient a lui par mi la lande Li noirs chevaliers li demande Qui cele damoisele estoit « Sire, fait il, se vous plaisoit Ele seroit et moie et vostre — Ja par saint Pol le bon apostre N’i avrois part avoeques moi » Gavains li dist, « Sire, par foi Vous requier et pri par franchise Par guerredon et par servise Que me rendois cel blanc destrier Et puis celui au chevalier Que abatistes en la lande La damoisele le vos mande Que vous li rendés par amor Si ert cortoisie et hounor Sire, encor vos revoel priier Que me rendois l’autre destrier Si m’avrois dont grant honor faite L’onor ert en tel lieu retraite Ou il vous orra maint prodome — Par trestous les consaus de rome Fait soi li chevaliers hidous Vilains estes et ennuious Vous m’avés tel cose requise Je nel feroie en nule guise Pour vos ne por vostre priere Ja nes avrois en tel maniere Mais tant sachiés, dans chevaliers Que se vous li volés aidier O moi vos convendra combatre Ou je les en menrai tous quatre S’ert li vostre en la compaignie Et si en merrai vostre amie Que je voi la desous cel orme Si avrois sollers en la forme O les autres les ont eüs Qu’iloec gisent tout estendus Si serés tous quatre assamblés » Lors dist Gavains, « Vous me samblés Moult faus et de moult male chiere Si sai tres bien que par priiere Ne m’en feriés vos rien plus Mais se de vos vieng au dessus Je les quit bien trestous vengier — Laissiés ester le manechier Fait le noir chevalier, vassal Si nous combatons parigal Il n’a ichi que vous et moi Li autre sont tuit en reqoi Qui la gisent tuit abaubi Or sachiés que je vos desfi » Sans nesun point de demorance Prent cascun l’escu et la lanche Si se fierent par tel angoisse Que l’une lance et l’autre froisse Sor les escus devant les pis Volent des lances les esclis Quant cascuns a sa lance fraite Vistement a l’espee traite Si commencent lor envaïe Qui molt sevent de l’escremie Et molt orent de hardement Cil qui ert noir com arrement Vait ferir monsegnor Gavain Amont sor le hiaume de plain Tout le fent jusqu’el cercle d’or Li cols descent desus la cor De l’escu a sinnople taint Et cil de tel aïr l’empaint Qu’ambedui li ceval caïrent Li dui chevalier sus saillirent Gavains sailli sus vistement De lui vengier olt grant talent Sore li keut par grant vertu Et celui rest vers lui couru Li uns d’els velt l’autre empirier Mais Gavains pour le coup vengier Que celui li avoit douné L’en a resouse la bonté Il l’a feru tout a bandon A escremie de tel ton Sus en l’iaume el coing amont Que tout li trencha en roont Jusqu’al chapelier l’a fendu A poi qu’i ne l’a abatu Li nois chevaliers li passa Tout l’escu li trenche et quassa Si vint li cols de tel vertu Quant il fu parti de l’escu Qu’il trencha le pan del hauberc Et el braiel li fist un merc Qu’il li embati plaine paume En mi la place sor le hiaume S’il l’eüst droit aconseü Je cuit qu’il l’eüst abatu Et Gavains ne resorti pas Ains vait vers lui plus que le pas Sel fiert sor le hiaume a bandon O l’espee li met un son Amont sor le hiaume forbi Et cil l’a moult bien recuelli Qui savoit toute la mestrie Ne crient nus de chevalerie Il fiert Gavain par grant outrage Sor l’escu, li fait tel damage Que il li trencha maintenant Cent mailles de l’auberc luisant Et que de la cote a armer Li fist contreval devaler Bon plain pié jusqu’à la chainture Molt fu bele cele aventure Quant ne li a le cors trenchié Tant est le brant escoulorgié Par entre l’aissele et l’escu Et Gavains a lui referu Par grant ire sor l’escu noir Nus hom qui le poïst veoir N’en seüst dire le meillour Jusc’au vespre que faut le jor Se combatent issi sans faille Que le miudre de la bataille N’en sorent eslire li troi Qui erent a pié en l’aunoi Vindrent vers els grant aleüre Et cil qui jusqu’a la chainture L’avoit tout desarmé errant Li dist, « Franc chevalier vaillant Arai je garde de cil troi Qui vienent ci armé sour moi ? » Gavains li dist isnelepas « Par foi, amis, ce n’est pas gas Bien loiaument le vous plevis N’en i a nul si mes amis S’il vous adesoit sor mon pois Je nel ferisse demanois Ja ne me sera reprouvé » Lors avoit dit et commandé As trois qu’il s’en traient ariere Et cil le font en tel maniere Si com Gavains le commanda Onques nus d’els mot ne souna Por riens que il lor avenist Et li noirs chevaliers lor dist « Vassal, fait il, je loeroie Que vos meïssiés a la voie Tout sain et tout sauf o ces trois Et ces quatre cevaus norois Me laississois tout quitement Et cele pucele ensement Qui vous atent sous cel ormel Si vous sera mils et plus bel Qu’os avrois salve vostre vie » Dist Gavains, « Molt oi grant folie Que vos dites, se Dix me saut Se ceste espee ne me faut Je vos movrai tel contenchon Ains que moi et vous departon Qu’avrai la dame et les chevaus » Lors s’entrevienent les vassaus Si fierement, par tele angoisse Qu’ançois que l’un l’autre connoisse Se sont il molt forment grevé Gavains li a un coup douné Amont sor le hiaume vergié Que l’espee li a trenchié L’iaume, desi en la cervele En est coulee l’alemele Son cop estort de grand aïr A la terre le fist venir As dous genous moult vistement Mais il relieve isnelement Si est Gavain alés requerre Onques encor en nule terre Dui homes tant ne se greverent Et li troi chevalier qui erent Iloec pres d’els, quis esgardoient Dient que merveilles faisoient Qui se combatent a cele ore Li noirs chevaliers sans demore A dit a monseignor Gavain « Vassal, ne soiés pas vilain Mais soions huimais a repos Quant li jors ert demain esclos Si resoions ci pié a pié Veés com il est anuitié Si avrois ces chevaus o vos Par un covent que entre nous Les ramenrons demain ichi Et la damoisele autresi De ce vol jou estre certains — Par foi, ce li a dit Gavains Je n’en voel ja nesun mener Se vers vos nes puis conquester Que trop vos voi fel et gaingnart — Dans chevaliers, il est trop tart Fait li noirs chevaliers oscur Mais soiés trestout aseür Que je vendrai le matin ça » Dist Gavains, « Ce n’avendra ja Se Dieu plaist, que nos departons Desi que je savrai ou non Se je en merrai les cevals Et la pucele et les vassaus Sans calonge et sans contredit — Et vos me prisiés molt petit Dans chevaliers, ce m’est avis Pour ce que je vos ai requis De la trive premierement Ja mais ne me troverés lent Ains vos troverai molt bataille Ja del mien qui un denier vaille N’en avrois en tout mon aage Se par force ou par vasselage Nel poés conquerre vers moi Et si sai molt bien et si croi Q’os estes cortois et vaillans Pour ce vos requier et demant Que me desissiés vostre non Que ce est bien drois et raison Que je le sace et vos le mien Et puis vos pri sor toute rien De faire tout vostre pooir Mais je voel vostre non savoir Et itant savoir de vostre estre Car ice m’ensegna mon mestre C’a home ne me combatisse Que son non ne li enqueïsse Si n’iere pas faus ne vilain — Par foi, fait il, j’ai non Gavain — Gavain, voire, neveu le roi ? — Issi ai je non, par ma foi Fait Gavains, vos avés bien dit Ja mais mon non, se Diex m’aït Nel celerai a chevalier » Et cil se volt agenoillier Devant lui pour merci crier « Bien porroie, fait il, jurer Que ja mais home ne creïsse Se a mes eus ne vos veïsse Qu’en dit que l’Orguellex Faé Vous avoit mort et decaupé Par orguel et par estoutie Nel tenés pas a vilenie Frans chevaliers prex et cortois Foi que je doi Artus li rois Qui est mé sire et mes amis Vous m’avés vencu et conquis Ves m’espee, je la vous rent Molt sui courechiés et dolent De ce que je ne vous counui Bien sai que vos ai fait anui Si m’en repent, se Diex me saut Ce vos di bien, de cest assaut Sui je tout matés et conquis Si vous di bien ce m’est avis Que por cent mars ou encor plus N’en porroie je souffrir plus Et pour ce que je sui matés Je me renc a vos, recevés M’espee, que je la vous rent » Et Gavains li dist erramment « Biaus amis, or gardés l’espee Qu’ele est en vos bien aloee Que hardis estes et osés Et quel non estes apelés ? — Sire, j’ai non li Lais Hardis Del lait ne sui je pas fardis L’autre soir m’esmui de ma terre Por aler cerquier et enquerre Se de vos noveles oïsse Sachiés bien que tant vos queïsse Que bien en oïsse parler Ains que volsisse retorner Or m’en sui a vos combatus Si m’en est moult bien avenu Que s’eüst plus duré l’estour G’eüsse de ma mort paour » Quant Gavains a ce entendu Que c’ert son ami et son dru Gete l’escu, l’iaume deslace L’un d’els l’autre acole et embrace Si s’entrefirent moult grant joie Je ne quit mais que nus hom voie Deus chevaliers si bien apris Cascuns d’els ert de moult grant pris Or ert moult l’un vers l’autre estous Or sont moult paisibles et dous Si vindrent andui erramment A cele qui encor l’atent Si l’ont delivrement montee Puis si ont lor voie aroutee Entre Gavain et le Faé Et Espinogre, ont amené Gomeret a sa damoisele A Gavain conte la nouvele Comment il s’estoit combatu Et com cil s’ert a lui rendu Com doit venir en sa merchi Et Gavains li a dit, « Amis Moult m’avés grant servise fait Ensi grant bone aventure ait Vostre cors, comme je vaudroie » Ensi chevauchent tote voie Car il estoit moult pres de vespre L’un d’els conte a Gavain son estre Tant que chascun li a conté Com il l’ont fait, com ont erré Tant ont lor parlement tenu Qu’il sont tuit ensamble venu A l’ostel Tristran qui ne rit Qui a Gavain grant honor fist Et Espinogres ensement Tristran saut sus isnelement Maintenant qu’il les ot veüs « Segnors, bien soiés vos venus » Fait soi Tristran qui moult fu sage Et n’ert pas de trop grant aage Ains ert chevalier bel et gent A l’estriu sailli erramment A Gavain, si le fist descendre Vaslet corent son ceval prendre Dont moult i avoit de cortois Les autres chevaliers tous trois Firent descendre isnelement Assés ot iloec quis descent Les damoiseles ambedeus Et sachiés bien que avoec eus Estoit a pié li Lais Hardis Qui n’ert couars ne alentis De servir monsegnor Gavain Et Tristrans le prent par la main Si le maine el palais amont Si com franchise le semont Si s’est del servir molt penés La nuit orent a grant plenté Pain et vin et oisiaus rostis Ploviers et faisans et pertris Et grans cisnes, a lor mengier Car molt en avoit el vergier Tristran, qui bien garni estoit De quainque prodom covenoit Lor a la nuit tele onor faite Ne l’aroie en piece retraite L’onor qu’il a fait a chascun Bien les coucha par un et un Pour dormir et pour reposer Qu’il estoient las de l’errer Et traveilliés et confondus Il paroit bien a lor escus Qu’il orent sosfert grant estour Grant joie ot Tristran de l’onor Qui la destre Gavain acointe Et saciés que moult se fait cointe Qu’il a deus fois esté son oste Vers le Lai Hardi se racoste Qui molt estoit gentils et frans « Sire, fait il, je croi et pans Que vos estes molt travelliés Bien sai que vos estes plaiés Et navrés sos la coiffe blance Et j’ai une fille molt franche Qui tel entrait vos i metra Que la dolor vous en traira Ja puis angoisse n’i avrois Que il i ert mis une fois Sempres ert la plaie garie » Li noirs chevaliers l’en mercie Qui de la pramesse a grant joie Et mesire Gavains li proie Qu’il li aït, s’il onkes puet Et Tristran maintenant s’esmuet En la chambre ou sa fille estoit Si li prie, s’ele savoit Aidier a itel chevalier Que li aït sans demorier Et cele qui n’ert pas vilaine Li dit, « La plaie n’ert pas saine Se Diex m’aït, hui en cest jour » Une herbe de molt grant valor Qui estoit toscane apelee Sour la plaie li a bendee Puis se dormi a grant loisir Tant que fist Diex le jor venir Qu’il se lievent et atornerent El chastel andui sejornerent Trestout le jor jusqu’au demain Puis parla monsegnor Gavain Comme par courous et par ire A l’oste commencha a dire « Biax dous ostes, frans, debonaire Vous savés bien tout nostre afaire Ensi com nos avons erré Or voil que il nos soit mostré Et l’escrin et le bras ensamble Que me moustrastes, ce me samble La nuit que primes chaiens jui » Et Tristran regarda celui Qui Orguelleus Faé a non « Sire, il vos dit droit et raison Ce respont l’Orguelleus Faé Tant m’a a armes demené Qu’il m’estuet en sa segnorie Contenir et moi et m’amie Mais il i a tel covenant Se je pooie vivre tant Que le cors que je vos baillai Tout sain et sauf le vos rendrai Tel covenant ai a Gavain Que sel vos rent et fort et sain Que je avrai sa druerie Et me rendra quite m’amie Mais que je li ferai itant Le vaslet trestout cler veant Li rendrai et tout sain sans faille Covenant l’oi en la bataille Et Gavains le m’a creanté — Certes, fait il, c’est verités Que issi le vous creantai N’en soiés ja point en esmai — Sire, dist l’Orguelleus Faé Isnelement soit aporté Le bras et le cors et l’escrin » Et Tristran se mist al cemin Si li aporte maintenant L’escrin li avoit mis devant Et le Faé l’a descosu Et l’escrin estoit ja venu Ou le bras ert au chevalier Et le Faé sans delaier A le bras de l’escrin osté Et el cors ariere posé Puis fu plus sains que nul poisson Et cels en orent fait le don A l’Orgelleus qui ert faé Le chevalier lor a conté Comme cil el bois le trova Et comment a lui se mesla Et comment il se combati Com il morut, ainc nel senti Com il a esté en repos Dedens le cuir de cerf enclos Molt s’en est Gavains mervellié De la merveille s’est sengnié Et le Lai Hardi ensement Et Tristran et toute sa gent Qui ont la merveille veüe De demander forment s’argue Qui li dona tel destinee Et cil dit, « El me fu donee En cele nuit que je fui né » Et Gavains a lors demande Le non del chevalier ocis « Sire, fait il, je vos plevis Que le Cortois de Huberlant M’apeloient mi conoissant » Grant joie firent tuit ensamble Toute la cort de joie tramble Et demainent molt grant deduit Tout le jor desi a la nuit A la nuit se sont tuit cochié Au matin, quant fu esclairié Il metent les frains et les seles Et montent les dous damoiseles (L’une ert amie Gomeré Et l’autre a l’Orguelleus Faé) Puis se mistrent tuit a la voie Tristran lor oste les convoie Desi ke outre le vaucel Et dit, « Sire, s’il vos ert bel G’iroie a cort ensamble o vos Et si merroie avocques nos Ma fille, qui est bele et gente Ou Nature a mise s’entente Et je l’ai ja bien atornee Ves la sor la mule montee » Gavains l’entent, sin a grant joie « Sire, fait il, se Diex me voie Molt avés or dit que cortois » Or sont les damoiseles trois Et li chevalier set par conte Si com l’estoire le reconte Tant ont erré et chevauchié Qu’endroit midi ont aprocié Le chastel Cadroain le Rous Qui moult est fiers et corajous Iloec estoient a sejour Icil qui furent en l’estour O Cadrés, quant rescoust s’amie Qui ot secours et bone aïe S’i fu Raguidel de l’Angarde Celui pucele le regarde Cele qui vea a Gavain Le vin et le char et le pain Et tuit cil l’orent couneü Tantost com Gavains fu venu Qui l’atendoient au chastel Savoir poés molt li fu bel Tout son conte lor a conté Si com je vos ai chi conté Comment il a puis esploitié Et comment il se combatié Encontre l’Orguelleus Faé Et Espinogre a Gomeré Comment lor acorde fu faite Cascun d’els forment s’en rehaite Et molt li firent grant hounor Et dit que por la soie amor Sejorneront un jor tot plain « Segnor, ce lor a dit Gavain Vous dites bien, vostre merchi Mais ains que soit demain midi Vaudroie estre a Carlion Entre moi et mi compaignon Si merrai avoec mes puceles Qui molt sont courtoises et beles — Sire, sire, ce dist Cadrés Je vos herbergerai hui mes En cest chastel a Cadroain Quant vos verrois le jor demain S’irons en vostre compaignie » Dist Gavains, « Je nel refus mie Tel compaignie ne tel route » Ne vos aconterai ja toute La joie qu’il ont demenee Quels lus i ot et quel povree Quel pain ne quel poisson de mer Quels vins il burent au souper La nuit furent a grant deduit Au matin sont monté trestuit Sor lor chevaus delivrement Cadeain fait monter sa gent Soissante et quatre chevalier Trestous armés sor lor destriers Por l’amour monsegnor Gavain Li chevalier oirrent a plain Au chevauchier ont entendu Tant qu’en la forest sont venu Iloec ou l’Orguelleus Faé Ot le vaslet les eus crevé Tant enquist Gavains des noveles Qu’il a trovees les puceles Qui li conterent del Faé Si com li contes a conté En la forest ert lor manoir Cascuns a le cuer tristre et noir Del doel de monsegnor Gavain Tuit quidoient estre certain Que il fust mors et decoupé Et Gavains lor a demandé Del vaslet, comment li estait « Sire, fait ele, issi li vait Com cil qui ne voit ciel ne terre — Alés le moi, dist Gavains, querre Sel m’amenés delivrement » Et cele i ala erramment Ele a le vaslet amené Qui molt estoit bien atorné Il estoit sages et cortois S’il fust fils de conte ou de rois Si fust il bel et avenant Et l’Orguelleus Faé a tant Li trait sa main aval sa chiere Si li a rendu sa lumiere Si vit plus cler que cerf ne dain Si connut erramment Gavain Tout maintenant qu’i l’ot veü « Sire, bien soiés vous venu Fait li vaslés molt doucement Je quidoie, se Diex m’ament Que vos fussiés tout detrenchié Mais bien sai q’os fustes cangié A cel chevalier la devant C’est le Cortois de Huberlant Qui onques de cort ne volt estre » Li vaslés conte tout son estre Si com li livres l’a conté Mais Damlediex l’a regardé Qui li a rendu sa veüe Ne fist iloec plus atendue Anchois monterent enislore Mesire Gavains sans demore Fist les trois puceles monter Et si n’i volt pas oublier Le vaslet, qui ot non Martin Sel fait monter sor un roncin Puis chevaucent a grant esploit A Carlion vindrent tot droit A l’ore que on doit souper L’en ot ja fait l’eve corner Et si asistrent au mengier A tant es vous un chevalier Qui lor avoit dit ces noveles Au roi furent bones et beles Et a trestous chels de la court Tous li pueples contre lui cort Li rois i cort et la roïne N’i a pucele ne meschine Qui de lui n’ait joie molt grant Et li rois le baise en riant Qui de sa venue ot grant joie Et cil li conte toute voie Comment il avoit puis erré Tout li a le conte conté Comment il li ert avenu Il sont tuit a pié descendu Il n’i ot conte ne baron Ne roi ne prince, en la maison Qui ne se paint molt de servir Cels q’o Gavain virent venir Le roi a forment onourés Les chevaliers, et apelés Et la roine, d’autre part Et la damoisele s’em part Si les en a toutes menees En ses chambres encortinees Si lor a fait molt grant honor Por la franchise et por l’amor Qu’ele a de monsegnor Gavain Cele nuit jusqu’a l’endemain Furent trestuit paisible et qoi Au matin se leva le roi Si est venus devant la sale Et Gavains les degrés avale Si s’est jouste lui acosté Si li a dit et reconté Com il a de grant paine traite Icele que il prist en l’etre Puis li dist com il conquesta Cele qu’Escanor amena Toutes conte les aventures Qu’il a trovés pesmes et dures Puis si lor prent a aconter Qu’il li estuet guerredoner L’onor que trestuit li ont faite Qu’il li a conté et retraite Li rois en est liés a merveille As bontés rendre ne somelle Ains li plaist molt et vient a gré Quant il fait honor et bonté Et li dist, « A vostre plaisir Me voil je de ce contenir Mais je voel ains estre vengié De cil qui tant m’a coroucié Qui as gens se vantoit a tort Qu’il vous avoit ocis et mort De ce voil jou venjance avoir » Gavains respont, « Por nul avoir Sire, nel voldroie je mie Qu’il vindrent en ma compaingnie Si oi o els tel covenant Dont il ont fait tot mon creant Por quoi il sont tuit aseür — Par foi, ce dist li rois Artur Il ert issi com vos vaudrois — Sire, fait Gavains, vos dorrois As deus chevaliers lor amies Onques puis le tans Jeremies Ne veïstes deus plus cortois La soe Espinogre dorrois S’espousera Cadrés s’amie Et Raguidel n’i faudra mie A la soe, qu’il m’ot mestier Qu’il me douna un bon destrier » Li rois li a dit et conté Del roi de la Rouge Chité Com il s’estoit a lui rendus Com il fu de cort revenus Qu’il onques mais n’i ot esté Et comment il li a juré Que il tendra chiere s’amie Et monsegnour Gavain li prie Des deus vaslés q’ot amenés Q’erramment soient adoubés Et chevaliers face noviaus Et lor donst terres et chastiaus Trestout ont lor orre apresté Si com il dui l’ont devisé Si ont les mariages fais Sans contredit et sans grans plais Au moustier les mainent errant La procession fu molt grant Si com a tel cose dut estre Li evesque Reniés de Cestre Les a maintenant espousees As chevaliers qui creantees Erent par le conseil le roi Le mostier ne fu mie quoi Anchois i ot joie molt grant Que font li petit et li grant Cil jougleour de pluisors terres Cantent et sonent lor vieles Muses, harpes et orcanons Timpanes et salterions Gigues, estives et frestiaus Et buisines et calemiaus Cascuns d’els grant joie demainne De joie est toute la cors plaine Car molt ert li rois Artus rices Onques ne fu malvais ne chices Molt lor fist bien a tous aidier De quainques il lor fu mestier Et jut cascuns o s’espousee Si comme li plest et agree Au matin, quant il fu grant jour Furent paié les jougleor Li un orent biax palefrois Beles robes et biaus agrois Li autre lonc ce qu’il estoient Tuit robes et deniers avoient Tuit furent paié a lor gré Li plus povre orent a plenté Quant li jougleour sont paié En lor païs sont repairié Et la cours estoit departie Cascuns chevaliers o s’amie S’en vait a joie et a baudor Trestuit li grant et li menor S’en repairent en lor contrees Quant les noces furent finees Si sacent bien tuit bas et haut Car li Aitres Perilleus faut Des que Gavains a tant erré Qu’il est a cort a sauveté Si fine ichi nostre romans Que Diex nos donst vivre cent ans En grant joie et en grant honor Et il nos donst joie et baudor Explicit de l’atre perelleus